ബ്രസീലിയ: കായിക പ്രേമികൾ പ്രത്യേകിച്ച് അർജന്‍റീന-ബ്രസീൽ ആരാധകർ ഒരിക്കലും മറക്കാൻ സാധ്യതയില്ലാത്ത ദിവസമാണ് 2021 ജൂലൈ 10. മറക്കാനയിൽ ബ്രസീലിനെ തകർത്ത് അർജന്‍റീന പതിറ്റാണ്ടുകൾക്ക് ശേഷം ഒരു മേജർ കിരീടം സ്വന്തമാക്കിയ ദിവസമായിരുന്നു ശനിയാഴ്ച.
സമകാലീന ഫുട്ബാളിലെ ഏറ്റവും മികച്ച കളിക്കാരൻ ആരെന്ന ചോദ്യത്തിന് ബാഴ്സ താരത്തിന്‍റെ കുറവായി പലരും രേഖപ്പെടുത്തിയ ആ അന്താരാഷ്ട്ര കിരീടവും ഒടുവിൽ മെസ്സി എത്തിപ്പിടിച്ചു. അവിചാരിതമെന്ന് പറയെട്ട, ക്രിസ്റ്റ്യാനോ റൊണാൾഡോ തന്‍റെ ആദ്യത്തെ സീനിയർ അന്താരാഷ്ട്ര കിരീടം സ്വന്തമാക്കിയ ദിവസവും ജൂലൈ 10 നായിരുന്നു.
2016 യൂറോ കപ്പിലായിരുന്നു അത്. അധിക സമയത്തേക്ക് നീണ്ട ഫൈനലിൽ കരുത്തരായ ഫ്രാൻസിനെ ഏകപക്ഷീയമായ ഒരു ഗോളിന് വീഴ്ത്തിയാണ് ക്രിസ്റ്റ്യാനോയുടെ പേർചുഗൽ അന്ന് യൂറോപ്പിലെ രാജാക്കൻമാരായത്.
സബ്സ്റ്റിറ്റ്യൂട്ടായ എഡറാണ് പറങ്കിപ്പടക്കായി ഗോൾ നേടിയത്. 2004ൽ സ്വന്തം മണ്ണിൽ ഗ്രീസിനോട് പരാജയപ്പെട്ട് 12 വർഷത്തിന് ശേഷമാണ് പോർചുഗൽ യൂറോപ്യൻ ചാമ്പ്യൻഷിപ്പ് നേടുന്ന പത്താമത്തെ ടീമായത്. ടൂർണമെന്‍റിൽ മൂന്ന് ഗോളുകളുമായി ക്രിസ്റ്റ്യാനോ ടോപ് സ്കോറർമാരുടെ പട്ടികയിൽ രണ്ടാമതായിരുന്നു.
കപ്പിനും ചുണ്ടിനുമിടയിൽ നാലു തവണ നഷ്ടപ്പെട്ട അന്താരാഷ്ട്ര കിരീടമാണ് ലയണൽ മെസ്സി മറക്കാന സ്റ്റേഡിയത്തിൽ എത്തിപ്പിടിച്ചത്. അർജന്‍റീന ജഴ്സിയിൽ ഒരു അന്താരാഷ്ട്ര കിരീടമെന്ന മെസ്സിയുടെ ദീർഘ നാളത്തെ കാത്തിരിപ്പിനാണ് വിരാമമായത്. ബ്രസീലിയൻ പ്രതിരോധ നിരയുെട പിഴവിൽ നിന്ന് ആദ്യ പകുതിയിൽ വലകുലുക്കിയ എയ്ഞ്ചൽ ഡിമരിയയാണ് അർജന്‍റീനയുടെ വിജയശിൽപി.
1993ലായിരുന്നു അവസാനമായി അർജന്‍റീന ഒരു മേജർ കിരീടം നേടിയത്. അന്താരാഷ്ട്ര കരിയറിൽ മെസ്സി ഒരു ലോകകപ്പിന്‍റെയും മൂന്ന് കോപ അമേരിക്കയുടെയും ഫൈനലിൽ പരാജയപ്പെട്ടു. ഒളിമ്പിക് സ്വർണ മെഡലും അണ്ടർ 20 ലോകകപ്പ് കിരീടവും മാത്രമായിരുന്നു ആശ്വാസത്തിനുണ്ടായിരുന്നത്.
കൊളംബിയയുടെ ലൂയിസ് ഡയസിനൊപ്പം ടൂർണമെന്‍റിലെ ഏറ്റവും മികച്ച ഗോൾവേട്ടക്കാരനാണ് മെസ്സി. ഇരുവരും നാലു തവണയാണ് സ്കോർ ചെയ്തത്. അഞ്ച് ഗോളുകൾക്ക് വഴിയൊരുക്കിയതും മെസ്സിയാണ്. അർജന്‍റീന നേടിയ 11ൽ ഒമ്പത് ഗോളുകളിലും മെസ്സി നേരിട്ട് പങ്കാളിയായിട്ടുണ്ട്. മെസ്സിയുടെ ഗോളുകളിൽ രണ്ടെണ്ണം ഫ്രീകിക്കിലൂടെയായിരുന്നുവെന്നത് എടുത്തു പറയണം.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.