ഒാവൽ: ഇന്ത്യയിയെ ബാങ്കുകളിൽ നിന്നും വൻതുക വായ്പയെടുത്ത് മുങ്ങിയ വ്യവസായി വിജയ് മല്യക്ക് ഇന്ത്യൻ ആരാധകരുടെ പരിഹാസം. ഒാവലിൽ ഇന്ത്യാ- ദക്ഷിണാഫ്രിക്ക മത്സരം കാണാനെത്തിയ മദ്യവ്യവസായിയെ കളി കാണാനെത്തിയ ആരാധകർ കൂവുകയും കള്ളനെന്ന് വിളിക്കുകയും ചെയ്തു. തങ്ങളുടെ രാജ്യത്തിൻറെ പണം തിരികെയേൽപിക്കൂവെന്നും അവർ മല്യയോട് പറയുന്നുണ്ടായിരുന്നു. എന്നാൽ ഇതൊന്നും ശ്രദ്ധിക്കാതെ മല്യ നടന്നുപോയി.
നേരത്തേ ഇന്ത്യൻ ക്യാപ്റ്റൻ വിരാട് കോഹ്ലിയുടെ സന്നദ്ധ സംഘടന ലണ്ടനിൽ സംഘടിപ്പിച്ച ചാരിറ്റി ഡിന്നറിലേക്കെത്തി മല്യ പരിഹസിക്കപ്പെട്ടിരുന്നു.ക്ഷണിക്കാതെയാണ് മല്യ പരിപാടിക്കെത്തിയത്. വിവാദം ഭയന്ന് ഇന്ത്യൻ ക്രിക്കറ്റ് ടീമംഗങ്ങൾ മല്യയെ ചടങ്ങിൽ അവഗണിച്ചു. മല്യയുടെ സാന്നിദ്ധ്യം ചടങ്ങിൽ നിന്നും പെട്ടെന്ന് ഒഴിവാകാൻ ഇന്ത്യൻ താരങ്ങൾ നിർബന്ധിതരാക്കുകയും ചെയ്തിരുന്നു. പാകിസ്താനെതിരായ ഇന്ത്യയുടെ മത്സരം കാണാൻ മല്യയെത്തിയത് വൻ വാർത്തയായിരുന്നു. സുനിൽ ഗവാസ്കർ മല്യയോട് സംസാരിക്കുന്ന ചിത്രങ്ങളും സാമൂഹിക മാധ്യമങ്ങളിൽ വൈറലാവുകയും ചെയ്തു. ഇന്ത്യാ- പാക് മത്സരത്തിനിടെ തനിക്ക് കിട്ടിയ മാധ്യമ ശ്രദ്ധ കാരണം ഇന്ത്യയുടെ മറ്റു മത്സരങ്ങൾക്കും താനുണ്ടാവുമെന്ന് മല്യ ട്വിറ്ററിൽ കുറിച്ചിരുന്നു.
ഇന്ത്യയിലെ വിവിധ ബാങ്കുകളിൽ നിന്ന് 9,000 കോടി രൂപ വായ്പയെടുത്ത് വിജയ് മല്യ രാജ്യം വിടുകയായിരുന്നു. മല്യയെ നാട്ടിലെത്തിക്കാനുള്ള ശ്രമങ്ങൾ ഇന്ത്യ നേരത്തെ നടത്തിയിരുന്നു. ഇന്ത്യയുടെ പരാതിയെ തുടർന്ന് രാജ്യാന്തര കുറ്റാന്വേഷണ എജൻസിയായ ഇൻറർപോൾ മല്യയെ അറസ്റ്റ് ചെയ്തിരുന്നു. അറസ്റ്റിലായി മണിക്കൂറുകൾക്കകം ജാമ്യം തേടി മല്യ പുറത്തെത്തുകയായിരുന്നു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.