എണ്ണിയാലൊടുങ്ങാത്ത ശബ്​ദങ്ങൾ... ശബ്​ദ വിശേഷങ്ങളറിയാം

ശബ്​ദമില്ലാത്ത ഒരു ലോകത്തെക്കുറിച്ച് നമുക്ക് ചിന്തിക്കാനാവില്ല. സംഗീതം മാത്രമല്ല, എണ്ണിയാലൊടുങ്ങാത്ത അത്രയും ശബ്​ദങ്ങൾ നിറഞ്ഞ ചുറ്റുപാടിലാണ് നാം ജീവിക്കുന്നത്. വളരെ ഉച്ചത്തിലുള്ള ശബ്​ദം നമുക്ക് പലപ്പോഴും അസഹനീയമാവാറുണ്ട്. ഇത് മനുഷ്യ​െൻറ മാത്രമല്ല, മറ്റു ജീവികളുടെയും ആരോഗ്യത്തിന്​ ഹാനികരമാണെന്ന് നമ്മൾ മനസ്സിലാക്കേണ്ടിയിരിക്കുന്നു. ശബ്​ദവിശേഷങ്ങളറിയാം.

ബാഹ്യകർണം എന്ന് പേരിട്ടിരിക്കുന്ന ഭാഗമാണ് ശബ്​ദത്തെ സ്വീകരിച്ച് നമ്മുടെ ശരീരത്തിനുള്ളിലേക്ക് കൊണ്ടുവരുന്നത്. നാം ചെവിക്കല്ല് എന്ന് വിളിക്കുന്ന ചർമത്തിൽ ശബ്​ദം എത്തിച്ചേരുകയും ശബ്​ദത്തിനൊത്ത് ചലിക്കുകയും ആ ചർമത്തോട് തൊട്ടിരിക്കുന്ന മൂന്ന് എല്ലിൻ കഷണങ്ങൾ ആ ചലനത്തെ കോക്ലിയ എന്ന് പേരുള്ള ആന്തരിക കർണത്തിലേക്ക് എത്തിക്കുകയും ചെയ്യുന്നു. കോക്ലിയക്കുള്ളിലെ ഒരു ഭാഗമാണ് ഓർഗൻ ഓഫ് കോർടി എന്ന് വിളിക്കുന്നത്. ഇതിൽ കാണപ്പെടുന്ന ചെറിയ രോമംപോലെയുള്ള കോശങ്ങളാണ് ശബ്​ദത്തെ വൈദ്യുതതരംഗങ്ങളാക്കി നാഡീവ്യൂഹത്തിലേക്ക് എത്തിക്കുന്നത്. അവിടെനിന്നും വൈദ്യുതസ്പന്ദനങ്ങൾ തലച്ചോറിലെത്തുമ്പോഴാണ് നാം ശബ്​ദം കേൾക്കുന്നത്.

ശ്രവണപരിധി

വ്യത്യസ്ത ആവൃത്തിയിലുള്ള ശബ്​ദങ്ങൾ പ്രകൃതിയിൽ ഉണ്ടാകുന്നുണ്ട്. എല്ലാ ആവൃത്തിയിലുള്ള ശബ്​ദവും മനുഷ്യന് കേൾക്കാൻ സാധ്യമല്ല. ശരിയായവിധത്തിൽ കേൾവിശക്തിയുള്ള ഒരു വ്യക്തിയെ സംബന്ധിച്ചിടത്തോളം കേൾക്കാൻ കഴിയുന്ന ശബ്​ദത്തി​െൻറ കുറഞ്ഞ പരിധി ഏകദേശം 20 Hz ഉം കൂടിയ പരിധി ഏകദേശം 20000 Hz ഉം ആണ്.

ജീവികൾക്ക് കേൾക്കാവുന്ന ശബ്​ദം

നിശാശലഭം    300,000 (കേൾക്കാവുന്ന ആവൃത്തി (Hz ൽ)

കോഴി    125 - 2000

വവ്വാൽ    2000-110,000

പൂച്ച    45-64,000

ആട്    100-30,000

നായ    67-45,000

ആന    16-12,000

ഇൻഫ്രാസോണിക്, അൾട്രാസോണിക് ശബ്​ദങ്ങൾ

20 Hz ന്​ താഴെയുള്ള ശബ്​ദങ്ങളെ ഇൻഫ്രാസോണിക് ശബ്​ദങ്ങളെന്നും 20000 Hz ന്​ മുകളിലുള്ള ശബ്​ദത്തെ അൾട്രാസോണിക് ശബ്​ദങ്ങളെന്നും പറയുന്നു. സമുദ്രത്തി​െൻറ ആഴമളക്കാനും ജലത്തിനടിയിലെ സ്ഥലങ്ങളുടെ മാപ്പുകൾ തയാറാക്കാനും അൾട്രാസോണിക് ശബ്​ദം ഉപയോഗപ്പെടുത്തുന്നു. ഭൂകമ്പം, സൂനാമി എന്നിവയുണ്ടാകുന്നതിന്​ മുമ്പ്​ ഇൻഫ്രാസോണിക് ശബ്​ദം ഉണ്ടാകാറുണ്ട്. തിമിംഗലം, ആന തുടങ്ങിയ ജീവികൾക്ക് ഈ ശബ്​ദം തിരിച്ചറിയാനാവും.

വവ്വാലും പ്രതിധ്വനിയും

വവ്വാലിന് അൾട്രാസോണിക് ശബ്​ദങ്ങൾ പുറപ്പെടുവിക്കാൻ കഴിയും. അൾട്രാസോണിക് ശബ്​ദതരംഗം ഉപയോഗിച്ചാണ് സഞ്ചാരപാതയിലെ തടസ്സങ്ങൾ വവ്വാലുകൾ മനസ്സിലാക്കുന്നതും ഇരതേടുന്നതും. ചെറു തരംഗങ്ങളായിട്ടാണ് വവ്വാലുകൾ ശബ്​ദം പുറത്തുവിടുന്നത്. ഒരിക്കൽ പുറത്തുവിട്ട ശബ്​ദത്തി​െൻറ പ്രതിധ്വനി ലഭിച്ചാൽ മാത്രമേ വവ്വാലുകൾ അടുത്ത ശബ്​ദം പുറത്തുവിടൂ.

സംഗീതവും ഒച്ചയും

ശബ്​ദങ്ങളിൽനിന്ന്​ ഉയർന്നുവന്നതാണ് സംഗീതം. സംഗീതസ്വരം ചെവിക്ക് ശല്യം തോന്നാത്ത ശബ്​ദമാണ്. ഒച്ചയെന്നാൽ ചെവിക്ക് ശല്യമുണ്ടാക്കും. വ്യത്യസ്തമായുള്ളതും കൃത്യമായ ഇടവേളകളില്ലാത്തതുമായ ശബ്​ദമാണിത്.

ഇടിമുഴക്കം

ചൂടുപിടിച്ച വായു വികസിച്ച് അതിവേഗത്തിൽ തെന്നിമാറുകയും ചുറ്റുപാടുനിന്നും ആ ഭാഗത്തേക്ക് തണുത്ത വായു പ്രവഹിക്കുകയും ചെയ്യുമ്പോൾ ഉണ്ടാകുന്ന ശബ്​ദമാണ് ഇടിമുഴക്കം. ഇടിയും മിന്നലും ഒരുമിച്ചാണ് ഉണ്ടാവുന്നതെങ്കിലും മിന്നൽ കണ്ടതിനുശേഷമാണ് നമ്മൾ ഇടിയുടെ ശബ്​ദം കേൾക്കാറുള്ളത്. പ്രകാശം ശബ്​ദത്തേക്കാൾ വേഗത്തിൽ സഞ്ചരിക്കുന്നതാണ് ഇതിന്​ കാരണം.

മാക്നമ്പർ

മിസൈലുകളുടെയും സൂപ്പർസോണിക് വിമാനങ്ങളുടെയും വേഗം നിർണയിക്കുന്ന യൂനിറ്റാണ് മാക്നമ്പർ. ശബ്​ദത്തി​െൻറ വായുവിലൂടെയുള്ള വേഗമാണിത്. ഒരു മാക്നമ്പർ 340 മീറ്റർ / സെക്കൻഡ്​ ആണ്. സൂപ്പർസോണിക് വിമാനങ്ങൾ രൂപപ്പെടുത്തുന്നതിന്​ വളരെ മുമ്പുതന്നെ ശബ്​ദത്തി​െൻറ ആഘാത തരംഗങ്ങളെക്കുറിച്ച് ആസ്‌ട്രേലിയക്കാരനായ ഭൗതികശാസ്ത്രജ്ഞൻ ഏണസ്​റ്റ്​ മാക് വിശദീകരിച്ചിരുന്നു. ആദ്ദേഹത്തി​െൻറ പേരിലാണ് ഈ നമ്പർ അറിയപ്പെടുന്നത്.

ഭൂമിയിൽ മാത്രം

ശബ്​ദം ഭൂമിയിൽ മാത്രമേയുള്ളൂ. കാരണം വായു ഇവിടെ മാത്രമാണുള്ളത്. മറ്റു ഗ്രഹങ്ങളിൽ വായുവില്ലാത്തതിനാൽ ശബ്​ദമില്ല. ശബ്​ദത്തിന് സഞ്ചരിക്കാൻ വായു വേണം. ബഹിരാകാശത്ത് നടക്കുന്ന സ്ഫോടനങ്ങൾ നമ്മൾ കേൾക്കാത്തത് ഭൂമിക്കും ബഹിരാകാശത്തിനുമിടയിൽ വായുവില്ലാത്തത് കൊണ്ടാണ്.

ശബ്​ദമലിനീകരണം

ജീവജാലങ്ങൾക്ക് അസഹനീയമായ രീതിയിൽ ശബ്​ദമുണ്ടാക്കുന്നതാണ് ശബ്​ദമലിനീകരണം. അമിതമായ ശബ്​ദം ബധിരത, ആസ്ത്മ, പഠനവൈകല്യം എന്നിവക്ക്​ കാരണമാകുന്നു.

ശബ്​ദമലിനീകരണം കുറക്കാം

1. വാഹനങ്ങളിൽ എയർ ഹോൺ ഒഴിവാക്കുക.

2. വാഹനങ്ങളുടെ സൈലൻസറുകൾ ശരിയായ വിധം പ്രവർത്തിപ്പിക്കുക.

3. ധാരാളം മരങ്ങൾ വെച്ചുപിടിപ്പിക്കുക. മരങ്ങൾക്ക് ശബ്​ദത്തെ ആഗിരണം ചെയ്യാനുള്ള കഴിവുണ്ട്.

4. ആശുപത്രി, വിദ്യാലയങ്ങൾ തുടങ്ങിയ ഇടങ്ങളിൽ 50 db ക്ക് മുകളിൽ ശബ്​ദമുണ്ടാക്കാതിരിക്കുക.

5. ശബ്​ദമലിനീകരണം കുറക്കുന്നതിനാവശ്യമായ മാർഗങ്ങളെക്കുറിച്ച് ജനങ്ങളെ ബോധവാന്മാരാക്കുക.