ബൈറൂത്: വെടിനിർത്തൽ ചർച്ചകൾക്ക് ശ്രമം നടക്കുന്നതിനിടെ, ഹിസ്ബുല്ലയെ ലക്ഷ്യമിട്ട് ലബനാനിൽ ആക്രമണം രൂക്ഷമാക്കി ഇസ്രായേൽ. ശനിയാഴ്ച വ്യോമാക്രമണത്തിൽ എട്ടുനില കെട്ടിടം പൂർണമായും തകർന്നു. 11 പേർ കൊല്ലപ്പെടുകയും 33 പേർക്ക് പരിക്കേൽക്കുകയും ചെയ്തതായി ആരോഗ്യ വകുപ്പ് ഉദ്യോഗസ്ഥരെ ഉദ്ധരിച്ച് ഹിസ്ബുല്ലയുടെ അൽ മനാർ ചാനൽ റിപ്പോർട്ട് ചെയ്തു. പുലർച്ച നാലിന് അഞ്ച് മിസൈലുകൾ ഉപയോഗിച്ച് തലസ്ഥാനമായ ബൈറൂത്തിലെ ബാസ്തയിലുള്ള അൽ മാമൂൻ തെരുവിലായിരുന്നു ആക്രമണം. കെട്ടിടം നിലനിന്ന ഭാഗത്ത് ആക്രമണത്തെ തുടർന്ന് വൻ ഗർത്തം രൂപപ്പെട്ടു. തൊട്ടടുത്ത കെട്ടിടങ്ങൾക്ക് കാര്യമായ നാശനഷ്ടമുണ്ടായതിന്റെ ദൃശ്യങ്ങൾ അൽ ജദീദ് ചാനൽ പുറത്തുവിട്ടു. മുന്നറിയിപ്പില്ലാതെയായിരുന്നു മിസൈൽ പ്രയോഗം. മൂന്ന് കനത്ത സ്ഫോടനങ്ങളുടെ ശബ്ദം കേട്ടതായി എ.എഫ്.പി വാർത്ത ഏജൻസി റിപ്പോർട്ട് ചെയ്തു.
തെക്കൻ ലബനാനിൽനിന്ന് പലായനം ചെയ്തവരടക്കം തിങ്ങിപ്പാർക്കുന്ന മധ്യ ബൈറൂത്തിൽ ഇസ്രായേൽ ഈയാഴ്ച നടത്തിയ നാലാമത്തെ ആക്രമണമാണിത്. തെക്കൻ തീരനഗരമായ തൈറേയിൽ ഡ്രോൺ ആക്രമണത്തിൽ രണ്ടുപേർ കൊല്ലപ്പെട്ടതിന് പിന്നാലെയാണ് മധ്യ ബൈറൂത്തിനെ ലക്ഷ്യമിട്ട് മിസൈൽ പ്രയോഗിച്ചത്. ഒരു വർഷത്തിലേറെയായി തുടരുന്ന അധിനിവേശത്തിൽ 3500ലേറെ പേരുടെ ജീവനാണ് പൊലിഞ്ഞത്. ഇതിൽ 200ലേറെ ആരോഗ്യ പ്രവർത്തകരാണ്. 12 ലക്ഷം ജനങ്ങൾ കുടിയൊഴിപ്പിക്കപ്പെട്ടു.
അതേസമയം, ഗസ്സയിലും അധിനിവേശ സൈന്യം ബോംബിടുന്നത് തുടർന്നു. ശനിയാഴ്ച ഖാൻ യൂനിസിൽ കൊല്ലപ്പെട്ട ആറു പേരിൽ പകുതിയും കുട്ടികളാണ്. രണ്ട് സ്ത്രീകൾക്കും ജീവൻ നഷ്ടപ്പെട്ടു. 13 മാസത്തെ വംശഹത്യയിൽ ഗസ്സയിൽ 44,176 പേർ കൊല്ലപ്പെട്ടെന്നാണ് ആരോഗ്യ മന്ത്രാലയത്തിന്റെ കണക്ക്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.