മേഗൻ വെളിപ്പെടുത്തലുകൾക്ക്​ എന്ത്​ മറുപടി പറയും? ബ്രിട്ടീഷ്​ രാജകുടുംബത്തിൽ തിരക്കിട്ട ചർച്ചകൾ

ലണ്ടൻ: വംശവെറിയുടെ വിളനിലമാണ്​ ബക്കിങ്​ഹാം കൊട്ടാരമെന്ന്​​​​ ഞായറാഴ്ച അമേരിക്കൻ ടെലിവിഷൻ ചാനൽ അഭിമുഖത്തിൽ മുൻ രാജകുടുംബാംഗങ്ങളായ ഹാരി രാജകുമാരനും മേഗനും നടത്തിയ ​വെളിപ്പെടുത്തലുകൾക്ക്​ എന്തു മറുപടി പറയുമെന്നറിയാതെ കുഴങ്ങി രാജകുടുംബം. വിഷയം ചർ​ച്ച ചെയ്​ത്​ അടിയന്തര യോഗങ്ങൾ കൊട്ടാരത്തിനകത്ത്​ പുരോഗമിക്കുകയാണ്​. മേഗന്‍റെയും ഹാരിയുടെയും ആരോപണങ്ങൾ ലോകമൊട്ടുക്കും ഏറ്റെടുത്ത സാഹചര്യത്തിൽ മറുപടി നൽകാതെ തരമില്ലെന്ന്​ ബന്ധപ്പെട്ടവർ വിശ്വസിക്കുന്നു. എന്നാൽ, തിരക്കിട്ട്​ മറുപടി നൽകി വിവാദങ്ങൾ കൊഴുപ്പിക്കുന്നതിൽ കാര്യമില്ലെന്നാണ്​ പ്രാഥമികമായെത്തിയ തീർപ്​. രാജ്​ഞിയുടെ സാന്നിധ്യത്തിൽ ചാൾസ്​, വില്യം തുടങ്ങി പ്രമുഖർ പ​ങ്കെടുത്ത യോഗങ്ങൾ ഒന്നിലേറെ നടന്നതായാണ്​ റിപ്പോർട്ട്​.

ഇരുവരുടെയും ആദ്യ കുഞ്ഞായി ആർച്ചി പിറക്കുംമുമ്പ്​ മകന്​ കറുപ്പ്​ നിറം കൂടുതലാകുമോ എന്ന്​ രാജകുടുംബത്തിലെ ഒരാൾ ആശങ്ക പ്രകടിപ്പിച്ചിരുന്നതായി കഴിഞ്ഞ ദിവസം മേഗൻ പറഞ്ഞിരുന്നു. രാജ്​ഞിയോ ഭർത്താവായ എഡിൻബർഗ്​ പ്രഭു ഫിലിപ്​ രാജകുമാരനോ അല്ല അത്​ പറഞ്ഞതെന്ന്​ പിന്നീട്​ ഹാരി രാജകുമാരൻ വിശദീകരണം നൽകിയിരുന്നു.

ഞായറാഴ്ച യു.എസിൽ സി.ബി.എസ്​ ചാനൽ വഴിയും യു.കെയിൽ ഐ.ടി.വിയിലും സ​ംപ്രേഷണം ചെയ്​ത രണ്ടു മണിക്കൂർ അഭിമുഖത്തിലുടനീളം ഇരുവരും അനുഭവിച്ച ഭീഷണികളും അവഗണനകളും തുറന്നുപറയുന്നുണ്ട്​. ​െകാട്ടാരത്തിൽ സുരക്ഷ നിഷേധിക്കപ്പെട്ട്​ വഴികളടഞ്ഞ്​ ഇനി ജീവിക്കേണ്ടെന്നുവരെ തീരുമാനമെടുത്ത സമയമുണ്ടായിരുന്നതായി മേഗൻ വ്യക്​തമാക്കി. മകൻ ആർച്ചിക്ക്​ രാജകുടുംബ പദവി ബോധപൂർവം നിഷേധിക്കുകയായിരുന്നുവെന്നും അതുവഴി അവർക്ക്​ ലഭിക്കേണ്ട പൊലീസ്​ സുരക്ഷ തടയലായിരുന്നു ലക്ഷ്യമെന്നും കുറ്റപ്പെടുത്തി. രാജ്​ഞിയും മുതിർന്ന രാജകുടുംബാംഗങ്ങളും തമ്മിലെ അഭിപ്രായ ഭിന്നതകളു​ം തീരുമാനമെടുക്കുന്നതിലെ പ്രശ്​നങ്ങളും ഇരുവരും പങ്കുവെച്ചിരുന്നു. പിതാവ്​ തന്നെ സാമ്പത്തിക സഹായത്തിൽനിന്ന്​ ഒഴിവാക്കിയതായി ഹാരിയും വ്യക്​തമാക്കി.

ആരോപണങ്ങൾ ഏറ്റെടുത്ത ബ്രിട്ടീഷ്​ പ്രതിപക്ഷമായ ലേബർ കക്ഷി, വംശവെറി നടന്നിട്ടുണ്ടെങ്കിൽ കൊട്ടാരം അന്വേഷിച്ച്​ നടപടി​ സ്വീകരിക്കണമെന്ന്​ ആവശ്യപ്പെട്ടു.

2018ലാണ്​ ഇരുവരും വിവാഹിതരാകുന്നത്​. തുടർന്ന്​, ബന്ധം വഷളായ കുടുംബത്തിൽ കഴിഞ്ഞ വർഷം ആരംഭതേതാടെ ഹാരിക്ക്​ സാമ്പത്തിക സഹായം നിർത്തുകയും പിതാവ്​ മൊബൈൽ​ ഫോൺ കോളുകൾ സ്വീകരിക്കാതാകുകയും ചെയ്​തിരുന്നു. 2020 മാർച്ചിൽ​ രാജകുടുംബ പദവി വേണ്ടെന്നുവെച്ച്​ ഹാരി- മേഗൻ ജോഡി യു.എസിലെ കാലിഫോർണിയയിലേക്ക്​ ജീവിതം പറിച്ചുനടുകയായിരുന്നു​. ഇനിയൊരിക്കലും രാജകുടുംബമാകാൻ തിരിച്ചുവരില്ലെന്ന്​ അടുത്തിടെ ഹാരി വ്യക്​തമാക്കുകയും ചെയ്​തു.

അഭിമുഖം ചർച്ചയായതോടെ ബ്രിട്ടനിൽ ഇരുവരെയും പരമാവധി അപമാനിക്കാൻ ടാ​േബ്ലായ്​ഡുകൾ മത്സരിക്കുന്നതായി റിപ്പോർട്ടുകൾ പറയുന്നു. ഇതിന്‍റെ ഭാഗമായി മേഗന്‍റെ പിതാവിനെ പോലും പ്രതിസ്​ഥാനത്തുനിർത്തി റ​ിപ്പോർട്ടുകൾ വന്നിരുന്നു.