മണ്ണ്​ അറിഞ്ഞ്​ കൃഷി ചെയ്യാം; മൊബൈല്‍ ആപ്പ് 'മണ്ണ്' റെഡി

മണ്ണ്​ അറിഞ്ഞ്​ കൃഷി ചെയ്യാൻ ഇനി കർഷകർക്ക്​ മണ്ണിലിറങ്ങേണ്ട. നിങ്ങള്‍ ചവിട്ടി നില്‍ക്കുന്ന മണ്ണിന്‍റെ പോഷകഗുണങ്ങളും അനുയോജ്യവിളകളും വിരല്‍ത്തുമ്പ്​ കൊണ്ട്​ തൊട്ടറിയാനുള്ള സംവിധാനമൊരുക്കുകയാണ്​ 'മണ്ണ്​' എന്ന മൊബൈൽ ആപ്ലിക്കേഷൻ. മണ്ണ് പര്യവേഷണ-സംരക്ഷണ വകുപ്പും കൃഷിവകുപ്പും ശേഖരിച്ച വിവരങ്ങള്‍ അടിസ്ഥാനമാക്കിയാണ്​ 'MAM (Mobile Application on Mannu-മണ്ണിനെ അറിയാം മൊബൈലിലൂടെ) എന്ന മൊബൈല്‍ ആപ്പ് തയാറാക്കിയിരിക്കുന്നത്​.

മണ്ണിന്‍റെ ഫലപുഷ്​ടി നിർണയിക്കുന്നതിൽ പ്രധാന മൂലകങ്ങള​ുടെയും മറ്റ്​ ഭൗതിക ഗുണങ്ങളുടെയും അളവ്​ ശാസ്​ത്രീയമായി നിജപ്പെടുത്തുന്നതിനെയാണ്​ മണ്ണ്​ പരിശോധന എന്ന്​ പറയുന്നത്​. പ്രത്യേക രീതിയില്‍ മണ്ണ് ശേഖരിച്ച് ഉണക്കി കൃഷിഭവന്‍ വഴി ലാബില്‍ കൊടുത്ത്​ കാത്തിരുന്നാണ്​ സാധാരണ ഫലം അറിയുന്നത്​. ഇതിനുപകരം, ഓരോ തുണ്ട്​ ഭൂമിയിലേയും മണ്ണിന്‍റെ ​പോഷകനില മനസ്സിലാക്കുവാനും അതനുസരിച്ച്​ വളപ്രയോഗം നടത്താനുമുള്ള വിവരങ്ങളാണ്​ MAM മൊബൈൽ ആപ്ലിക്കേഷനിലൂടെ നൽകുന്നത്​.

MAM മൊബൈലിൽ ലഭ്യമാക്കാൻ പ്ലേസ്​റ്റോറിൽ നിന്നും Mannu ഡൗൺലോഡ്​ ചെയ്യണം. കൃഷിയിടത്തിൽപോയി ജി.പി.എസ്​ ഓണാക്കിയതിന്​ ശേഷം MAM ഓപ്പൺ ചെയ്യുക. സ്​ക്രീനിൽ മുകളിൽ ഇടത്​ ഭാഗത്തുള്ള നക്ഷ​ത്ര അടയാളത്തിൽ അമർത്തണം. അപ്പോൾ 'ജി.പി.എസ്​ ആവറേജിൻ' എന്ന്​ കാണാം. അപ്പോൾ ഓപൺ ചെയ്​ത്​ കിട്ടുന്ന സ്​ക്രീനിൽ താഴെയായി 'പോഷകനില പരിശോധിക്കുക' എന്ന്​ കാണാം. അവിടെ അമർത്തിയാൽ ആ സ്​ഥലത്തുള്ള ഓരോ മൂലകത്തിന്‍റെയും പോഷകനില മനസ്സിലാക്കാം. ഒാര്‍ഗാനിക് കാര്‍ബണ്‍, ഫോസ്ഫറസ്, കോപ്പര്‍, സിങ്ക് പിഎച്ച് മൂല്യം എന്നിവയെല്ലാം വിശദീകരിക്കും.

സ്​ക്രീനിൽ താഴെയായി 'വള ശുപാർശ' എന്ന്​ കാണാം. അതിൽ അമർത്തിയാൽ 'വിള തിരഞ്ഞെടുക്കുക' എന്ന്​ കാണാം. അത്​ ഓണാക്കിയാൽ വിളകളുടെ ലിസ്റ്റ്​ വരുമ. അതിൽനിന്നും നാം കൃഷി ചെയ്യുന്ന വിള തിരഞ്ഞെടുക്കുക. അതിൽ അമർത്തിയാൽ ആ വിളക്ക്​ പ്രസ്​തുത സ്​ഥലത്ത്​ ആവശ്യമായ ജൈവ വളത്തിന്‍റെയും രാസ വളത്തിന്‍റെയും അളവ്​ ലഭ്യമാകും.