ഒരു ഭാഗത്ത് താഴേക്ക് നീണ്ടു പരക്കുന്ന താഴ്വാരം, മറുവശത്തു മുന്നോട്ടുള്ള വഴി അവസാനിച്ചു നീണ്ടു പരന്ന് ആകാശവുമായി മുട്ടിയുരുമ്മി കിടക്കുന്ന മരുഭൂമിയുടെ അമ്പരപ്പിക്കുന്ന കാഴ്ച. ഭൂമിയെ ഒരറ്റത്ത് വന്നു നിന്ന് വഴിമുട്ടി നിൽക്കുന്ന അവസ്ഥ. ഇളം തണുപ്പുള്ള ശക്തമായ കാറ്റ് അടിച്ചു വീശുന്നുണ്ടായിരുന്നു. കാറ്റിൽ ബാലൻസ് നഷ്ടപ്പെട്ടാൽ അപ്പുറത്തെ കുഴിയിലേക്ക് വീഴാനുള്ള സാധ്യതയുണ്ട്. ആ വലിയ മലയുടെ തുഞ്ചത്തിരുന്നു ചുറ്റിലും കണ്ണോടിക്കുമ്പോൾ പ്രപഞ്ചമെന്ന മഹാത്ഭുത വിസ്മയം നമ്മെ അമ്പരപ്പിക്കും.