ഇഞ്ചിയിൽനിന്ന്​ ‘ജിൻജറോൾ’; കാർഷിക സർവകലാശാലക്ക്​ പേറ്റന്‍റ്​

തൃശൂർ: കേരള കാര്‍ഷിക സര്‍വകലാശാല പുറത്തിറക്കിയ ഇഞ്ചി ഇനമായ ‘കാര്‍ത്തിക’യില്‍നിന്ന് സ്ഥിരതയുള്ള ‘ജിൻജറോള്‍’ ഉൽപന്നം വികസിപ്പിച്ചതിന് സര്‍വകലാശാലക്കും ആലുവയിലെ സ്വകാ​ര്യ സ്ഥാപനത്തിനും ഇന്ത്യൻ പേറ്റന്‍റ്​ ലഭിച്ചു. കേന്ദ്ര ബയോ ടെക്നോളജി വകുപ്പിന്‍റെ ധനസഹായത്തോടെ നടത്തിയ സഹകരണ ഗവേഷണ പദ്ധതിയുടെ ഫലമാണ് ഈ പേറ്റന്റ്.

ഔഷധ നിര്‍മാണത്തിനും ന്യൂട്രാസ്യൂട്ടിക്കല്‍, ഹെല്‍ത്ത് ഫുഡ് വ്യവസായങ്ങളിലും ഇഞ്ചി ധാരാളം ഉപയോഗിക്കുന്നുണ്ട്​. ഇഞ്ചിയില്‍ അടങ്ങിയ സംയുക്തങ്ങളില്‍ ഏറ്റവും ശക്തവും ഔഷധ ഗുണമുള്ളതുമാണ്​ ജിൻജറോള്‍. സ്ഥിരതയുള്ള പൊടിരൂപത്തിലുള്ള ജിൻജറോളിനും അത്​ വികസിപ്പിക്കുന്ന പ്രക്രിയക്കുമാണ് പേറ്റന്‍റ്​.

വികസിപ്പിച്ച ഉൽപന്നം വാണിജ്യവത്കരിക്കപ്പെടുന്ന മുറക്ക് രാജ്യത്തും വിദേശത്തും ഉയര്‍ന്ന വിപണി സാധ്യതയുള്ള ന്യൂട്രാസ്യൂട്ടിക്കല്‍/ ഫാര്‍മസ്യൂട്ടിക്കല്‍ ഘടകമായി ഉപയോഗിക്കാം. ഇത് ഇഞ്ചി കര്‍ഷകര്‍ക്ക് സുസ്ഥിരവും മെച്ചപ്പെട്ടതുമായ വരുമാനം ലഭിക്കാൻ സഹായകമാകും. ഡോ. എം.ആര്‍. ഷൈലജ, ഡോ. മെറീന ബെന്നി, ഡോ. സാമുവല്‍ മാത്യു, ഡോ. പി. നസീം, ഡോ. ഇ.വി. നൈബി, ഡോ. ബെന്നി ആന്‍റണി എന്നിവരാണ്​ ഗവേഷണം നടത്തിയത്​.