തനി കർഷകനായി മോഹന്‍ലാല്‍; ജൈവകൃഷി വിഡിയോ ഏറ്റെടുത്ത്​ ആരാധകർ

കൊച്ചി: ലോക്ഡൗണ്‍ കാലത്ത്​ എളമക്കരയിലുള്ള വീട്ടിലെ ജൈവകൃഷിയുടെ വിഡിയോ പങ്കു​െവച്ച് നടന്‍ മോഹന്‍ലാല്‍. മുണ്ടും മടക്കിക്കുത്തി, തലയില്‍ കെട്ടുമായി, തനി കർഷകന്‍റെ സ്റ്റൈലില്‍ ലാൽ കൃഷിയിടത്തിലേക്ക്​ വരുന്ന വിഡിയോ ആരാധകർ ഏറ്റെടുത്തുകഴിഞ്ഞു.

ജൈവകൃഷി ഒരു ശീലമാക​ട്ടെ, ജീവിതം സുരക്ഷിതമാക​ട്ടെ എന്ന സന്ദേശം നൽകുന്ന വിഡിയോ ഫേസ്ബുക്ക് പേജിലൂടെയാണ് ലാൽ പങ്കു​െവച്ചിരിക്കുന്നത്. തക്കാളിയും പയറും പാവലും കാന്താരിയുമെല്ലാം ലാലിന്‍റെ തോട്ടത്തില്‍ നിറഞ്ഞു നില്‍ക്കുന്നത്​ കാണാം. വീട്ടിലേക്കുള്ള പച്ചക്കറികളെല്ലാം ഈ തോട്ടത്തില്‍ നിന്നാണ് എടുക്കുന്നത്. തോട്ടം നനയ്ക്കുന്നതും വിളവെടുക്കുന്നതും വളമിടുന്നതുമെല്ലാം വിഡിയോയിലുണ്ട്​.

'എറണാകുളത്തെ എളമക്കരയിൽ ഉള്ള എന്‍റെ വീടാണ്. കഴിഞ്ഞ നാല് അഞ്ചു വർഷമായി ഈ ചെറിയ സ്ഥലത്ത് നിന്നാണ് ഞങ്ങൾക്ക് വേണ്ടുന്ന പച്ചക്കറികൾ ഞങ്ങൾ ഉണ്ടാക്കി എടുക്കുന്നത്. നമുക്ക് പാവയ്ക്ക, പയർ, വെണ്ടയ്ക്ക, തക്കാളി, പച്ചമുളക്, മത്തങ്ങ, ചോളം, കപ്പ എല്ലാമുണ്ട്. എല്ലാവർക്കും ചെയ്യാവുന്ന കാര്യമാണ്. ചെറിയ സ്ഥലത്ത് നിന്ന് നമുക്ക്​ ആവശ്യമുള്ള കൃഷി ഉണ്ടാക്കിയെടുക്കാം. അതിന് ആളുകൾ തയ്യാറാകണം. സ്ഥലം ഇല്ലാത്തവർക്ക് ടെറസിന് മുകളിൽ ഉണ്ടാക്കി എടുക്കാം. ഞാൻ ഇവിടെ വരുമ്പോഴൊക്കെ ഈ പച്ചക്കറികളാണ് ഉപയോഗിക്കുന്നത്' -ലാൽ പറയുന്നു.