അൽഅഹ്സ യൂത്ത് മീഡിയ ഹൗസ് നിലവിൽവന്നു

ദമ്മാം: സൗദി യുവാക്കളെ പത്രപ്രവർത്തന രംഗത്ത് സജീവമാക്കാൻ അൽഅഹ്സയിൽ യൂത്ത് മീഡിയ ഹൗസ് നിലവിൽവന്നു. സൗദി ജേണലിസ്​റ്റ്​ അസോസിയേഷന് കീഴിലാണ് മീഡിയ ഹൗസ് യാഥാർഥ്യമായത്. ഇൻറർനാഷനൽ യൂത്ത് ഡേയുടെ ഭാഗമായി അഗസ്​റ്റ്​ 19ന് മാധ്യമ രംഗത്തെക്കുറിച്ച് കൂടുതൽ ചർച്ചകളിലൂടെയും മറ്റു പരിപാടികളിലൂടെയും ഔദ്യോഗികമായി ഹൗസി​ൻെറ പ്രവർത്തനങ്ങൾ തുടങ്ങും. സൗദി പത്രപ്രവർത്തന മേഖലയിലെ പ്രമുഖരാണ് മീഡിയ ഹൗസി​ൻെറ പ്രവർത്തനത്തിന് പിന്നിലുള്ളത്. കിങ് ഫൈസൽ യൂനിവേഴ്സിറ്റി കമ്യൂണിക്കേഷൻ ആൻഡ്​ മീഡിയ തലവൻ ഡോ. അബ്​ദുൽ അസീസ് സുഊദ് അൽഹലിബി മീഡിയ ഹൗസി​ൻെറ ഉദ്ഘാടനം നിർവഹിച്ചു.

യുവതയെ അവരുടെ ശരിയായ സമയത്തുതന്നെ രാജ്യത്തി​ൻെറ വികസന പാതയിലേക്ക് തിരിച്ചുവിടാൻ കഴിയുന്ന രീതിയിൽ മീഡിയ ഹൗസ് പ്രവർത്തിക്കുമെന്ന് അൽഅഹ്സ ജേണലിസ്​റ്റ്​ അതോറിറ്റി ഡയറക്ടർ ആദിൽ സഅദ് പറഞ്ഞു. ആൺ- പെൺ വ്യത്യാസമില്ലാതെ ആർക്കും ഇതി​ൻെറ ഭാഗമാകാം. ഇതിലൂടെ അവരെ രാജ്യത്തി​ൻെറ ഉന്നമനത്തിനായി ശാക്തീകരിക്കാനും കഴിയും. ഈ രംഗത്ത് കഴിവ് തെളിയിക്കുന്നവർക്ക് സൗദി ജേണലിസ്​റ്റ്​ അസോസിയേഷനിൽ അംഗത്വം നൽകുമെന്നും അദ്ദേഹം പറഞ്ഞു. വിഷൻ 2030​ൻെറ ഭാഗമായാണ് മീഡിയ ഹൗസ് പ്രവർത്തനമാരംഭിച്ചത്. വ്യത്യസ്ത പരിപാടികളിലൂടെ ജനങ്ങളിലേക്ക് ഇറങ്ങിച്ചെന്ന് പ്രവർത്തിക്കാനൊരുങ്ങുകയാണ് അണിയറപ്രവർത്തകർ.