സമിശ്രം വാണിജ്യമേഖല

2016 ഇന്ത്യൻ വ്യാപാര മേഖലയെ സംബന്ധിച്ചിടത്തോളം നിരവധി നാടകീയ സംഭവങ്ങളാൽ സമ്പന്നമാണ്​. പ്രധാനമന്ത്രിയുടെ നോട്ട്​ പിൻവലിക്കൽ തീരുമാനവും സൈറസ്​ മിസ്​ത്രിയെ ടാറ്റയുടെ ​ചെയർമാൻ സ്​ഥാനത്ത്​ നിന്ന്​ മാറ്റിയതുമെല്ലാം കഴിഞ്ഞ വർഷത്തെ പ്രധാന സംഭവങ്ങളാണ്​. ഇതിനൊടപ്പം തന്നെ ഉൽപന്ന സേവന നികുതി ബില്ലും പുതിയ ആദായ നികുതി നിയമവുമെല്ലാം കഴിഞ്ഞ വർഷം സാമ്പത്തിക മേഖലയിൽ നിർണായക സ്വാധീനം ചെലുത്തിയ വിഷയങ്ങളാണ്​.

നവംബറിൽ അമേരിക്കൻ പ്രസിഡൻറായി ഡൊണൾഡ്​ ട്രംപ്​ തെരഞ്ഞെടുക്കപ്പെട്ടതും വ്യാപര മേഖലയെ തെല്ലൊന്നുമല്ല ഉലച്ചത്​. ഒാഹരി വിപണിയിലും വൻ നേട്ടങ്ങളുണ്ടാക്കാൻ സാധിച്ചില്ലെന്ന്​ മാത്രമല്ല 2016 നവംബറിന്​ ശേഷം വിപണി വൻ തിരിച്ചടി നേരിടുകയും ചെയ്​തു. ഒാഹരി നിക്ഷേപത്തേക്കാൾ കൂടുതൽ സുരക്ഷിതമായ നിക്ഷേപങ്ങൾ ആളുകൾ തേടാൻ തുടങ്ങിയതും 2016ലെ കാഴ്​ചകളിലൊന്നാണ്​.​ കേരളത്തിലും വ്യാപാര മേഖലയെ പിടിച്ചുലച്ചത്​ നോട്ട്​ പിൻവലിക്കൽ തീരുമാനം തന്നെയായിരുന്നു.

തിരിച്ചടിയായി നോട്ട്​ പിൻവലിക്കൽ
നവംബർ എട്ടാം തീയതി രാത്രിയാണ്​  പ്രധാനമന്ത്രി നരേന്ദ്ര മോദി 500, 1000 രൂപയുടെ നോട്ട്​ പിൻവലിക്കാനുള്ള തീരുമാനം പ്രഖ്യാപിച്ചത്​. തീരുമാനം മുലം ഒാഹരി വിപണിയിലും രാജ്യത്തെ ഉൽപാദന മേഖലയിലും തിരിച്ചടി നേരിട്ടു. പല വ്യവസായ പ്രമുഖർ തീരുമാനത്തെ അനകൂലിച്ച്​ രംഗത്ത്​ വന്നെങ്കിലും സാമ്പത്തിക വിദഗ്​ധരുടെ അഭിപ്രായത്തിൽ സാമ്പത്തിക മേഖലയിൽ തീരുമാനം പ്രതികൂലമായി ബാധിച്ചു എന്നത്​ തന്നെയാണ്​. വിവിധ കമ്പനികളുടെ മുന്നാംപാദ ലാഭ ഫലം കൂടി പുറത്ത്​ വന്നാൽ മാത്രമേ ഇന്ത്യൻ കോർപറേറ്റ്​ മേഖലയെ തീരുമാനം എത്രത്തോളം ബാധിച്ചു എന്നറിയാൻ കഴിയുകയുള്ളു.

സൈറസ്​ മിസ്​ത്രിയുടെ പുറത്താക്കൽ
ഒക്​ടോബർ 24നാണ്​ ഇന്ത്യൻ വ്യവസായ ലോകത്തെ ​െഞട്ടിച്ച്​ കൊണ്ട്​ സൈറസ്​ മിസ്​ത്രിയെ ടാറ്റ ഗ്രൂപ്പ്​ ചെയർമാൻ സ്​ഥാനത്ത്​ നിന്ന്​ മാറ്റിയത്​. ടാറ്റ ഗ്രൂപ്പിൽ ടാറ്റയുടെ കുടുംബാധിപത്യം തിരിച്ച്​ കൊണ്ട്​ വരുന്നതി​െൻറ ഭാഗമായാണ്​ മിസ്​ത്രിയെ പുറത്താക്കിയതെന്ന്​ പരക്കെ വിമർശനം ഉയർന്നിരുന്നു. തീരുമാനത്തിന്​ ശേഷം രത്തൻ ടാറ്റയെ താൽകാലിക ചെയർമാൻ ആക്കിയതും വിമർശനങ്ങൾക്ക്​ ആക്കം കൂട്ടി. പിന്നീട്​ രത്തൻ ടാറ്റയും സൈറസ്​ മിസ്​ത്രിയും പരസ്​പരം ആരോപണ പ്രത്യാരോപണങ്ങളുമായി രംഗത്ത്​ വരുന്നതിനും 2016 സാക്ഷിയായി.

ബാങ്കുകളുടെ ലയനം
ആറ്​ അസോസിയേറ്റ്​ ബാങ്കുകളെ എസ്​.ബി.​െഎയിൽ ലയിപ്പിക്കാനുള്ള തീരുമാനമാണ്​ ബാങ്കിങ്​ മേഖലയിലെ പ്രധാന സംഭവം. സ്റ്റേറ്റ്​ ​ബാങ്ക്​ മൈസുരു, സ്റ്റേറ്റ്​ ബാങ്ക്​ ഒാഫ്​ പട്യാല, സ്റ്റേറ്റ്​ ബാങ്ക്​ ഒാഫ്​ ജയ്​പൂർ, സ്റ്റേറ്റ്​ ബാങ്ക്​ ഒാഫ്​ ട്രാവൻകൂർ, സ്റ്റേറ്റ്​ ബാങ്ക്​ ഒാഫ്​ ഹൈദരാബാദ്​, മഹിള ബാങ്ക്​ എന്നിവയെ എസ്​.ബി.​െഎയിൽ ലയിപ്പിക്കാനാണ്​ കേന്ദ്ര സർക്കാർ തീരുമാനം​. എന്നാൽ, തീരുമാനത്തിനെതിരെ അസോസിയേറ്റ്​ ബാങ്കുകളുടെ തൊഴിലാളി സംഘടനകളിൽ നിന്ന്​ വൻ എതിർപ്പുയർന്നിരുന്നു. എന്നാൽ, ആർ.ബി.ഐയുടെ അനുമതിയോടെ 2017ൽ ബാങ്ക് ലയനം നടപ്പാക്കാനുള്ള നീക്കത്തിലാണ്​ കേന്ദ്രം.

സമവായമാകാതെ  ജി.എസ്​.ടി
ഉൽപന്ന സേവന നികുതിയിൽ ഇതുവരെയായിട്ടും സമവായമുണ്ടാക്കാൻ കേന്ദ്ര സർക്കാറിന്​ സാധിച്ചിട്ടില്ല. രാജ്യം മുഴുവൻ ഒറ്റ നികുതി എന്ന നിലയിലാണ്​ ഉൽപന്ന സേവന നികുതി സർക്കാർ അവതരിപ്പിച്ചത്​. എന്നാൽ, പല സംസ്​ഥാനങ്ങളും വരുമാനം നഷ്​ടം ചുണ്ടിക്കാട്ടി നികുതിയെ എതിർത്തതോടെയാണ്​ കേന്ദ്ര സർക്കാരിറിന്​ തിരിച്ചടിയുണ്ടായത്​. ഉൽപന്ന സേവന നികുതിയുമായി ബന്ധപ്പെട്ട്​ ജി.എസ്​.ടി കൗൺസിൽ രൂപീകരിച്ചെങ്കിലും എതിർപ്പ്​ മൂലം തീരുമാനം അനന്തമായി നീളുകയാണ്.

തിരിച്ചടിയായി ട്രംപി​െൻറ വിജയം
കഴിഞ്ഞ വർഷം നവംബറിലായിരുന്നു അമേരിക്കൻ പ്രസിഡൻറായി ഡൊൾഡ്​ ട്രംപ്​ തെരഞ്ഞെടുക്കപ്പെട്ടത്​. അമേരിക്കൻ തെരഞ്ഞെടുപ്പ്​ ഇന്ത്യൻ വ്യാവസായിക ലോകത്തെ സംബന്ധിച്ചടുത്തോളം നിർണായകമായ വിഷയമായിരുന്നു. വ്യവസായ ലോകത്തിന്​ ട്രംപിനെക്കാ​ളേറെ ഹിലരിയോടായിരുന്നു താൽപര്യം. അമേരിക്കക്ക്​ കൂടുതൽ പ്രാധാന്യം നൽകുന്ന ട്രംപി​െൻറ വ്യവസായ നയം രാജ്യത്തെ വ്യവസായ ലോകത്തിന്​ തിരിച്ചടിയാവുമെന്നതാണ്​ അപ്രിയത്തിനുള്ള കാരണം. എച്ച്​1-ബി വിസയുടെ കാര്യത്തിലടക്കം ട്രംപ്​ സ്വീകരിക്കുന്ന നിലപാടുകൾ ​ഐ.ടി മേഖലക്കും നിർണായകമാണ്​.

ആദായ നികുതി ബിൽ​
നോട്ട്​ പിൻവലിക്കലി​ന്‍റെ പശ്​ചാത്തലത്തിലായിരുന്നു ആദായ നികുതി ബിൽ​ കേന്ദ്ര സർക്കാർ അവതരിപ്പിച്ചത്​. ബില്ലി​ലെ വ്യവസ്​ഥകൾ പ്രകാരം കണക്കിൽപ്പെടാതെ നിക്ഷേപിച്ച പണം വെളിപ്പെടുത്തിയാൽ 50 ശതമാനം പിഴയൊടുക്കി ബാക്കി പണം സ്വന്തമാക്കാം. എന്നാൽ, ഇതിൽ 25 ശതമാനം മാത്രമെ വ്യക്​തികളുടെ അക്കൗണ്ടിലേക്ക്​ ലഭ്യമാവും. ബാക്കി വരുന്ന 25 ശതമാനം തുക പ്രധാനമന്ത്രിയുടെ ഗരീബ്​ കല്യാൺ യോചനയെന്ന പദ്ധതിക്കായി നാലു​ വർഷം ഉപയോഗിക്കും. നാലു​ വർഷത്തിന്​ ശേഷമേ ഈ പണം അക്കൗണ്ട്​ ഉടമകൾക്ക്​ ലഭ്യമാവും. ബില്ലിന്‍റെ അവതരണവേളയിൽ നോട്ട്​ പിൻവലിക്കലിനെ കുറിച്ച്​ ലോക്​സഭയിൽ ചർച്ച വേണമെന്ന ആവശ്യം പ്രതിപക്ഷം ഉയർത്തിയെങ്കിലും സർക്കാർ  വഴങ്ങിയില്ല.

സഹകരണ ബാങ്ക്​ പ്രതിസന്ധി
കേരള സമ്പദ്​വ്യവസ്​ഥയുടെ നട്ടെല്ലായ സഹകരണ ബാങ്കുകളിൽ നോട്ട്​ പിൻവലിക്കലി​ന്‍റെ പശ്​ചാത്തലത്തിൽ  ഉടലെടുത്ത പ്രതിസന്ധിയാണ്​ കഴിഞ്ഞ വർഷം കേരള സമ്പദ്​വ്യവസ്​ഥയിലെ ​പ്രധാന സംഭവം​. നോട്ട്​ പിൻവലിച്ചപ്പോൾ പഴയ​ നോട്ടുകൾ മാറ്റി നൽകാനോ മറ്റ് ഇടപാടുകൾ നടത്താനോ കേന്ദ്ര സർക്കാർ സഹകരണ  ബാങ്കുകളെ അനുവദിച്ചില്ല. തീരുമാനം നടപ്പിലായതിന്​ ശേഷം സഹകരണ ബാങ്കുകൾക്ക്​ ആഴ്​ചയിൽ വിതരണം ചെയ്യാൻ കഴിയുമായിരുന്ന തുക 24,000 രൂപയാണ്​. സഹകരണ ബാങ്കുകളിൽ ​കെ.വൈ.സി നിബന്ധനകൾ പാലിക്കില്ലെന്ന്​ ആരോപിച്ചായിരുന്നു പണമിടപാടുകൾക്ക്​ കേന്ദ്ര സർക്കാർ നിയന്ത്രണമേർപ്പടുത്തിയത്​.

സമിശ്രം ഒാഹരി വിപണി
ഒാഹരി വിപണിയിൽ കഴിഞ്ഞ വർഷം സമിശ്ര പ്രതികരണമായിരുന്നു.  2015 വർഷാവസാനം 26,000  പോയിൻറിന്​ താ​ഴെയായിരുന്നു ബോംബൈ സൂചിക സെൻസെക്​സ്​ വ്യാപാരം നടത്തിയിരുന്നത്​. 2016 ഫെബ്രുവരിയിൽ ഇത്​ 22,000 പോയിൻറിന്​ താഴെ പോയി.  പിന്നീട്​ ബോംബെ സൂചിക പല മാസങ്ങളിലും മുന്നേറിയെങ്കിലും നോട്ട്​  പിൻവലിക്കൽ തീരുമാനം  മൂലം 2016 അവസാന വർഷങ്ങളിൽ വിപണിയിൽ നഷ്​ടമുണ്ടായി. നിഫ്​റ്റിയിലും സ്​ഥിതി വ്യത്​സതമല്ല പല ഘട്ടങ്ങളിലും മുൻ വർഷങ്ങളെക്കാൾ നിഫ്​റ്റി നേട്ടമുണ്ടാക്കിയെങ്കിലും വർഷാവസാനത്തെ സർക്കാറിന്‍റെ നോട്ട്​ പിൻവലിക്കൽ തീരുമാനം ​ദേശീയ സൂചിക നിഫ്​റ്റിക്കും തിരിച്ചടിയാവുകയായിരുന്നു.

ചിത്ര രാമകൃഷ്​ണ​െൻറ രാജി
എൻ.എസ്​.ഇയുടെ തലപ്പത്ത്​ നിന്നുള്ള ചിത്ര രാമകൃഷ്​ണ​െൻറ രാജിയായിരുന്നു പോ​യ വർഷത്തെ പ്രധാനപ്പെട്ട സംഭവങ്ങളിലൊന്ന്​. ത​ന്‍റെ അധികാര കാലാവധിയിൽ 15 മാസം പൂർത്തിയാകാനിരിക്കെയാണ്​ ചിത്ര രാമകൃഷ്​ണൻ എൻ.എസ്​.ഇയുടെ സി.ഇ.ഒ സ്​ഥാനം രാജി​വെച്ചത്​. വ്യക്​തിപരമായ കാരണങ്ങൾ മൂലമാണ്​ രാജിയെന്നാണ്​ എൻ.എസ്​.ഇ നൽകുന്ന വിശദീകരണം. എൻ.എസ്​.ഇയുടെ ആദ്യ വനിത മേധാവിയാണ്​ ചിത്ര രാമകൃഷ്​ണൻ.

കേന്ദ്ര ബജറ്റ്​
ഫെബ്രുവരി 28നാണ്​ ധനമന്ത്രി അരുൺ ജെയ്​റ്റ്​ലി കേന്ദ്ര സർക്കാർ ബജറ്റ്​ സഭയിൽ അവതരിപ്പിച്ചത്​. 3.9 ശതമാനത്തി​ന്‍റെ കമ്മി ബജറ്റാണ്​ ധനമന്ത്രി അവതരിപ്പിച്ചത്​ .ഗ്രാമീണ മേഖല, സാമൂഹ്യ സുരക്ഷ, അടിസ്​ഥാന സൗകര്യ വികസനം എന്നിവക്കാണ്​ ബജറ്റ്​ പ്രധാനമായും ഊന്നൽ നൽകിയത്​.  രാജ്യത്തി​ന്‍റെ അഭ്യന്തര ഉൽപാദന വളർച്ച ഉയർത്താനുള്ള  നിർദേശങ്ങളും ബജറ്റിലുണ്ടായിരുന്നു. എന്നാൽ, കോർപറേറ്റ്​ ടാക്​സ്​, വിദേശ നിക്ഷേപം എന്നീ മേഖലയിലെ ഇളവുകൾ ബജറ്റിനെതിരെ വിമർശനങ്ങൾ ഉയരുന്നതിന്​ കാരണമായി.

തയാറാക്കിയത്: വിഷ്ണു ജെ.