മഴ പെയ്യുന്നുണ്ടാകുമിപ്പോൾ

നീയോർക്കാറുണ്ടോ

മഴനനഞ്ഞ

വെയിലുകളെക്കുറിച്ച്

നിറംമങ്ങിയ

ഉടയാടകളെക്കുറിച്ച്

ഇതൾവാടിയ

റോസാപ്പൂക്കളെക്കുറിച്ച്

കറുത്തമേഘങ്ങൾ

കീഴടക്കിയ

എന്റെ നീലാകാശങ്ങളെക്കുറിച്ച്

ഋതുക്കളാൽ

വഞ്ചിക്കപ്പെട്ട

ഇലകൊഴിയും

വനങ്ങളെക്കുറിച്ച്

ഓർക്കാതെപെയ്ത

മഴയെക്കുറിച്ച്

മാറിപ്പോയ

കൊടിയടയാളങ്ങളെക്കുറിച്ച്

ചിറകറ്റുപോയ

ഈയാമ്പാറ്റകളെക്കുറിച്ച്

അല്ല

നീയോർക്കാറുണ്ടോ?

യുദ്ധക്കൊതിയന്മാർ

നിന്റെ ആകാശങ്ങളെ

ഇരുട്ടാക്കി,

നിന്റെ കുഞ്ഞുങ്ങളെ

കൊന്നൊടുക്കി,

നിന്റെ സ്വപ്നങ്ങളിൽ

ടാങ്കറുകൾ കയറ്റി,

നിന്റെ ആലയത്തിൽ

ബോംബു വർഷിച്ചു

മഴപെയ്യുന്നുണ്ടാകുമിപ്പോളെന്ന്

ഞാനാശിച്ചുപോയതാണ്

ഒരു മിസ്സൈലെങ്കിലും

പൊട്ടാതെപോയെങ്കിൽ

ചിലപ്പോൾ

ഒരു നീയെങ്കിലും

ബാക്കിയായാലോ?

ഒരു ഞാനെങ്കിലും

കരയാതിരുന്നെങ്കിലോ?

ഇവിടെ

ചില്ലകളിൽ

ഇലച്ചാർത്തുകൾ തെളിയുന്നുണ്ട്

വസന്തത്തിലും

മഴപെയ്യുന്നുണ്ട്. 

|

(കഥ, കവിത, പുസ്തകാസ്വാദനം തുടങ്ങി വായനക്കാരുടെ സ്വതന്ത്ര രചനകൾ മാധ്യമം ഓൺലൈനിൽ പ്രസിദ്ധീകരിക്കാനായി online@madhyamam.com എന്ന ഇ-മെയിൽ വിലാസത്തിലേക്ക് ഫോട്ടോയും ഫോൺനമ്പറും സഹിതം അയക്കാം...)