കോവിഡ്​ ചതിച്ചു; നിരാശയിൽ​ ശൈത്യകാല തമ്പുപകരണ വിപണി

കുവൈത്ത്​ സിറ്റി: കോവിഡ്​ പശ്ചാത്തലത്തിൽ ഇത്തവണ ശൈത്യകാല തമ്പ്​ നിർമാണത്തിന്​ അനുമതി നൽകാതിരുന്നതോടെ ഇതുമായി ബന്ധപ്പെട്ട്​ തൊഴിലും വ്യാപാരവും നടത്തിയിരുന്നവർക്ക്​ നിരാശ. സീസണിൽ മാത്രം ലഭിക്കുന്ന ബിസിനസ്​ നഷ്​ടമാവുന്നതോടെ ഇതു​ തിരിച്ചുപിടിക്കാൻ മറ്റൊരു അവസരമില്ല. പലതരം കൂടാരങ്ങളും വിളക്കുകളും കയറുകളുമാണ്​ ഉപഭോക്​താക്കളെ കാത്ത്​ കൂട്ടിയിട്ടിരിക്കുന്നത്​.

ലോക്​​ഡൗണിനുശേഷം ജൂലൈയിൽ വീണ്ടും തുറന്നെങ്കിലും കച്ചവടമില്ല. വീടുകളുടെ പിറകുവശത്ത്​ തമ്പുകെട്ടുന്ന കുവൈത്തികളുടെ ഒറ്റപ്പെട്ട കച്ചവടം മാത്ര​മാണ്​ ഇപ്പോൾ ഉള്ളത്​. ഇവിടത്തെ നിരവധി കടക​ൾക്ക്​ ഇത്​ അപര്യാപ്​തമാണ്​. 20 വർഷമായി ഇൗ മേഖലയിൽ ജോലിയെടുക്കുന്നവർക്ക്​ ഇങ്ങനെയൊരു ക്ഷാമകാലം മുൻപരിചയമില്ല.

പലരും സ്ഥാപനങ്ങൾ പൂട്ടി കുവൈത്ത്​ വിടാനുള്ള തീരുമാനത്തിലാണ്​. 70 ശതമാനം വ്യാപാരം കുറവാണെന്ന്​ പാകിസ്​താനി കടയുടമ പ്രതികരിച്ചു. പലരും ജീവനക്കാരെ പിരിച്ചുവിട്ടു. അഞ്ചോ ആറോ തൊഴിലാളികൾ ഉണ്ടായിരുന്ന സ്ഥാനത്ത്​ ഇപ്പോൾ കടയുടമയും ഒരു സഹായിയും മാത്രമാണ്​ ഉള്ളത്​.

കടയിൽനിന്ന്​ വരുമാനമില്ലാത്തതിനാൽ മറ്റു ജോലിതേടി പോവാൻ തൊഴിലാളികൾക്ക്​ നേരത്തേ തന്നെ അനുമതി നൽകുകയായിരുന്നു.വിൽപന കുറവായതി​െൻറ സമ്മർദത്തിലായ കച്ചവടക്കാരെ കൂടുതൽ സമ്മർദത്തിലാക്കി ഉപഭോക്​താക്കൾ വിലപേശുന്നു. കോവിഡ്​ പ്രതിസന്ധി ഉപഭോക്​താക്കളുടെ വാങ്ങൽ ശേഷിയെ ബാധിച്ചിട്ടുണ്ടെന്നതും യാഥാർഥ്യമാണ്​. വിവിധ രാജ്യങ്ങളില്‍നിന്ന് വ്യത്യസ്ത തരം തമ്പുകെട്ടുന്നതിനാവശ്യമായ വസ്തുക്കള്‍ മാര്‍ക്കറ്റുകളിലേക്ക് ഇറക്കുമതി ചെയ്​തിരുന്നവർ ഇത്തവണ ഇടിവ്​ മുൻകൂട്ടി കണ്ട്​ കുറ​ച്ചുമാത്രമേ വാങ്ങിയിരുന്നുള്ളൂ. എന്നാൽ, തമ്പ്​ സീസൺ തന്നെ ഇല്ലാതാവുമെന്ന്​ അവർ കണക്കുകൂട്ടിയിരുന്നില്ല.

പാകിസ്​താന്‍, ഇറാനി തമ്പുകൾക്കാണ്​ കുവൈത്തിൽ മുൻകാലത്ത്​ ഡിമാൻഡ്​ ഏറെ ഉണ്ടായിരുന്നത്​. തൊഴിലാളികളിൽ അധികവും ഇൗ രാജ്യക്കാരാണ്​. ഇന്ത്യക്കാരും ഉണ്ട്​.കുവൈത്തിൽ പാർലമെൻറ്​ തെരഞ്ഞെടുപ്പിന്​ ഏതാനും മാസങ്ങളേയുള്ളൂ. തെരഞ്ഞെടുപ്പ്​ പ്രചാരണ തമ്പുകൾ നിർമിക്കാനും ഇത്തവണ അനുമതിയുണ്ടാവില്ലെന്നാണ്​ റിപ്പോർട്ടുകൾ. ഇൗ വകയിൽ പ്രതീക്ഷിച്ചിരുന്ന വരുമാനവും ഇല്ലാതാവുമെന്ന നിരാശയിലാണ്​ കടയുടമകൾ.