ഗൾഫിന്‍റെ സ്വന്തം ഗഫൂർക്ക ദോസ്ത്​

കുവൈത്ത് സിറ്റി: ഏതു​ മതത്തിൽപെട്ടവരാണെങ്കിലും ഗൾഫിലേക്ക്​ വിമാനം കയറുന്നതിന്​ രണ്ടു​ വാക്യങ്ങൾ മനസ്സിൽ കുറിച്ചിട്ടുണ്ടാവും, അസ്സലാമു അലൈക്കും, വ അലൈക്കും അസ്സലാം. ഇത്​ പഠിപ്പിച്ചത്​ മുതൽ ഗഫൂർക്കയും ഗൾഫും തമ്മിൽ അഭേദ്യമായ ബന്ധമുണ്ട്​. പ്രവാസലോകത്തിനും ഓർത്തുവെക്കാൻ ഒരുപിടി കഥാപാത്രങ്ങളെ സമ്മാനിച്ചാണ്​ മാമുക്കോയ വിടപറയുന്നത്​. അതിൽ പ്രധാനമാണ്​ നാടോടിക്കാറ്റിലെ ഗഫൂർക്ക.

ഗൾഫിലേക്ക്​ കപ്പൽ കയറാൻ ആദ്യമായി വഴി കാണിച്ചുകൊടുത്തയാളാണ്​ ഗഫൂർക്ക. അവിടെയെത്തി ‘ഗഫൂർക്ക ദോസ്ത്’ എന്നു​ പറഞ്ഞാൽ മതി എന്ന ഡയലോഗ്​ പ്രവാസലോകത്ത്​ ​ഇപ്പോഴും പറഞ്ഞ്​ പഴകിയിട്ടില്ല. ഈ സിനിമയോടെ ഗൾഫിലുള്ള ഗഫൂറുമാരെല്ലാം ഗഫൂർക്ക ദോസ്തായി മാറിയതും ചരിത്രം. ഈ കഥാപാത്രമാണ്​ മാമുക്കോയക്ക്​ മലയാള സിനിമയിൽ തന്‍റേതായ ഇടം ഉണ്ടാക്കിയത്​. ഇതിന്‍റെ രണ്ടാം ഭാഗമായ പട്ടണപ്രവേശത്തിലും ​അദ്ദേഹമെത്തി. 2001ൽ പുറത്തിറങ്ങിയ അന്നത്തെ ഏറ്റവും വലിയ ബിഗ്​ ബജറ്റ്​ ചിത്രമായ മമ്മൂട്ടിയുടെ ‘ദുബായ്​’ എന്ന സിനിമയിലും മുഴുനീള വേഷത്തിൽ മാമുക്കോയ എത്തി. ഈ സിനിമ പൂർണമായും ചിത്രീകരിച്ചത്​ യു.എ.ഇയിലായിരുന്നു. മകളുടെ വിവാഹത്തിനുപോലും നാട്ടിൽ പോകാൻ കഴിയാത്ത കുഞ്ഞാപ്പുക്കുട്ടി എന്ന കഥാപാത്രം ഓരോ പ്രവാസിയുടെയും പ്രതിനിധിയായിരുന്നു. പെരുമഴക്കാലത്തിൽ പ്രവാസിയുടെ പിതാവായി വേഷമിട്ട മാമുക്കോയക്ക്​ 2004ൽ സംസ്ഥാന സർക്കാറിന്‍റെ പ്രത്യേക ജൂറി പരാമർശം ലഭിച്ചിരുന്നു. ഗുരു ശിഷ്യൻ എന്ന സിനിമയിൽ ‘ഇക്കാക്ക്​ ഗൾഫിലെന്താണ്​ ജോലി’ എന്ന്​ കലാഭവൻ മണി ചോദിക്കുമ്പോൾ മാമുക്കോയയുടെ കഥാപാത്രമായ മുസ്തഫയുടെ മറുപടി ഇതാണ്​ ‘ഗൾഫിൽ ഷെയ്ഖാ’ണ്​. ഷവ്വൽ എടുത്ത്​ മണ്ണിലിട്ടൊരു ഷെയ്​ഖ്​, പിന്നെ മണ്ണ്​ ഷവ്വലിൽ നിന്ന്​ ചട്ടിയിലിട്ടൊരു ഷെയ്​ഖ്​, ചട്ടിയിൽ നിന്ന്​ മെഷീനിലേ​ക്കൊരു ഷെയ്​ഖ്​, പിന്നെ മെഷീൻ, അവിടെ മൊത്തത്തിലൊരു ഷെയ്​ഖ്​’. നിരവധി സിനിമകളിൽ ഗൾഫിൽനിന്നെത്തുന്ന പ്രവാസിയായി വേഷമിട്ടിട്ടുണ്ട്​.

മഴവിൽ കാവടിയിൽ വിദേശത്തെ ലെതർ ഫാക്ടറിയിൽനിന്നു​ വരുന്നു എന്ന വ്യാജേന എത്തുന്ന മാമുക്കോയ അടിച്ചുമാറ്റിയ പഴ്​സുകൾ വാരിവിതറുന്ന സീനുണ്ട്​. ബേപ്പൂരിലെ ഉരു നിർമാണത്തിന്‍റെ പശ്ചാത്തലത്തിൽ പ്രവാസികളുടെ ജീവിതകഥ പറഞ്ഞ ‘ഉരു’വിൽ ശ്രീധരൻ ആശാരി എന്ന കഥാപാത്രമായി മാമുക്കോയ എത്തി. അയൽസംസ്ഥാന പ്രവാസിയുടെ റോളിലും മാമുക്കോയ ആസ്വാദകരെ കുടുകുടാ ചിരിപ്പിച്ചു. ക്രൊയേഷ്യൻ ടീമിന്‍റെ ജഴ്​സിയുടെ നിറമുള്ള ടീ ഷർട്ടുമായി​ പുറംനാട്ടിൽ നിന്നെത്തുന്ന മാമുക്കോയയുടെ ചിത്രം ഓരോ ഫുട്​ബാൾ ലോകകപ്പ്​ കാലത്തും വൈറലാകാറുണ്ട്​. ബോംബെയിലെ കുക്കായി നാട്ടിലെത്തി അടുക്കള ഭരിക്കുന്ന മാമുക്കോയയുടെ സീനുകൾ ഇനിയും മലയാളികളെ ചിരിപ്പിച്ചുകൊണ്ടിരിക്കും. കൃത്യം ഒരുമാസം മുമ്പാണ് മാമുക്കോയ ദുബൈയിലെത്തി മടങ്ങിയത്​. ഇ.സി.എച്ചിൽനിന്ന്​ ഗോൾഡൻ വിസ സ്വീകരിക്കാനെത്തിയ അദ്ദേഹം ഇന്നസെന്‍റിന്‍റെ മരണ വാർത്തയറിഞ്ഞ്​ ഉടൻ നാട്ടിലേക്ക്​ മടങ്ങുകയായിരുന്നു. വിസ വേണ്ടാത്ത ലോകത്തേക്ക്​ മാമുക്കോയ മടങ്ങുമ്പോൾ പ്രവാസലോകത്തിനും ഓർത്തുവെക്കാൻ ഒരുപാട്​ കഥകളും കഥാപാത്രങ്ങളും ബാക്കിയുണ്ട്​.