മസ്കത്ത്: കർവ മോട്ടോഴ്സ് പൂർണമായി ഒമാനിൽ നിർമിക്കുന്ന സ്കൂൾ ബസുകൾ ഈ അധ്യയന വർഷം നിരത്തിലിറങ്ങും. സ്കൂൾ ബസുകൾ പുനർനിർമിക്കുന്ന പദ്ധതി പ്രയോഗത്തിൽ വരുത്തുന്നതിന്റെ ഭാഗമായി അംഗീകൃത രൂപകൽപന മാതൃകയോടെ നിർമിച്ച കർവ ബസുകൾ ഈ അധ്യയന വർഷത്തിന്റെ തുടക്കത്തിൽ തന്നെ സർവിസ് ആരംഭിക്കുമെന്നും, അടുത്ത അഞ്ചു വർഷത്തേക്ക് പദ്ധതി തുടരുമെന്നും കർവ കമ്പനി അധികൃതർ പ്രസ്താവനയിലൂടെ അറിയിച്ചു.
ഗവൺമെന്റ് സ്കൂളുകൾക്കായി അത്യാധുനിക സുരക്ഷ സംവിധാനങ്ങളടങ്ങിയ ബസുകൾ നിർമിക്കാൻ കഴിഞ്ഞ വർഷമാണ് കർവ മോട്ടോഴ്സ് വിദ്യാഭ്യാസ മന്ത്രാലമായും, ഒമാൻ വികസന ബാങ്കുമായും കരാർ ഒപ്പിട്ടത്.
ധാരണ പ്രകാരം പഴയ വാഹനങ്ങൾക്ക് പകരം പ്രതിവർഷം 1000 ബസുകൾ നിർമിക്കാനാണ് കർവ മോട്ടോഴ്സിനുള്ള നിർദേശം. വിദ്യാർഥികളുടെ സുരക്ഷ ഉറപ്പാക്കുന്നതിനായി സേഫ്റ്റി പാത്ത് അടക്കം അത്യാധുനിക സുരക്ഷ സംവിധാനങ്ങൾ ഉൾപ്പെടുത്തിയ ബസുകളാണ് കർവ പുറത്തിറക്കുന്നത്. 23 വിദ്യാർഥികൾ ഉൾക്കൊള്ളുന്നതാണ് ബസുകൾ.
അകത്തും പുറത്തും പ്രവർത്തിക്കുന്ന നിരീക്ഷണ ക്യാമറകൾ, സുരക്ഷിതമായ സീറ്റുകൾ, എമർജൻസി എക്സിറ്റ് ഡോറുകൾ, ഡ്രൈവർക്കും യാത്രക്കാർക്കും സുതാര്യമായ കാഴ്ച അനുഭവം, ഓട്ടോമാറ്റിക് അഗ്നിശമന സംവിധാനം, ഉയർന്ന നിലവാരത്തിലുള്ള എയർകണ്ടീഷൻ, വാതിലുകളുടെ സുരക്ഷാ ലോക്ക്, സെൻസർ, ജി.പി.എസ്, ഫസ്റ്റ് എയ്ഡ് ബോക്സ്, എക്സ്റ്റേണൽ സെൻസർ സംവിധാനം, ഡ്രൈവർ പെർഫോമൻസ് മോണിറ്ററിങ് എന്നിവ ബസിന്റെ പ്രത്യേകതകളാണ്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.