രാജ്യത്ത്​ സമാധാനം പുനഃസ്​ഥാപിക്കാൻ തയാ​െറന്ന്​ അഫ്ഗാൻ പ്രസിഡൻറ്

ദോഹ: പ്രതിസന്ധികൾ മറികടന്ന് അഫ്ഗാനിസ്​താനിൽ സമാധാനം പുനഃസ്​ഥാപിക്കാൻ രാജ്യം തയാറാണെന്ന് പ്രസിഡൻറ് ഡോ. മുഹമ്മദ് അശ്റഫ് ഗനി. സമാധാനത്തിനായുള്ള ഇച്ഛാശക്തിയും മൂലധനവും അഭിനിവേശവും അഫ്ഗാനിനുണ്ട്. അതോടൊപ്പം, ഈ സമാധാനം തിരികെ സ്​ഥാപിക്കുന്നതിന് പ്രതിബദ്ധതയും ധീരതയും കൂടെയുണ്ടാകണം. ദോഹ ഇൻസ്​റ്റിറ്റ്യൂട്ട് ഓഫ്​ ഗ്രാജ്വേറ്റ് സ്​റ്റഡീസിലെ സെൻറർ ഫോർ കോൺഫ്​ലിക്ട് ആൻഡ് ഹ്യൂമാനിറ്റേറിയൻ സ്​റ്റഡീസ്​ സംഘടിപ്പിച്ച പരിപാടിയിൽ സംസാരിക്കുകയായിരുന്നു അദ്ദേഹം.

അഫ്ഗാൻ ജനതയുടെ അഭിലാഷമാണ് സമാധാനം. സമാധാനത്തിനായി അഫ്ഗാ‍െൻറ ചരിത്രവും സംസ്​കാരവും മതവും സാമ്പത്തികവും പരിഗണിക്കേണ്ടിയിരിക്കുന്നു.ഖത്തറിലെ നയതന്ത്ര സമൂഹത്തിലെ നിരവധി പ്രതിനിധികൾ പരിപാടിയിൽ പങ്കെടുത്തു.സമാധാനമെന്നത് ഒരു സംഘത്തി‍െൻറ മാത്രമായിരിക്കരുത്. അത് അഫ്ഗാൻ ജനതയുടേത് മുഴുവനുമായിരിക്കണം. അവരാണ് ഏറ്റവും പ്രധാനപ്പെട്ടത്. സംഘർഷങ്ങളുണ്ടാക്കാൻ എളുപ്പമാണ്. സമാധാനം പുനഃസ്​ഥാപിക്കാനാണ് പ്രയാസം. നിരപരാധികളാണ് അവരുടെ പ്രവർത്തനങ്ങളുടെ ഫലമായി കൊല്ലപ്പെടുന്നതെന്ന് സംഘർഷങ്ങൾക്ക് പിന്നിലുള്ളവർ തിരിച്ചറിയണം.

സമാധാനത്തിനായി നാം സധൈര്യം മുന്നോട്ടുവരണം. നാം പ്രതിബദ്ധരായിരിക്കണം. അതൊരു എളുപ്പത്തിലുള്ള പ്രവർത്തനമല്ല. അഫ്ഗാനിൽ ദേശീയാടിസ്​ഥാനത്തിൽ വെടിനിർത്തൽ പ്രഖ്യാപിക്കേണ്ട സമയം അതിക്രമിച്ചിരിക്കുന്നു–ഡോ. ഗനി വിശദീകരിച്ചു.

അഫ്ഗാനിസ്​താനിലേത് സിവിൽ യുദ്ധമല്ല, വിരുദ്ധ ശക്തികളുടെ സംഘട്ടനവുമല്ല. അത് അധികാരത്തിനായുള്ള സംഘർഷമാണ്. അഫ്ഗാനിസ്​താനിലെ എല്ലാവർക്കും ജീവിക്കണം. സമാധാനം എന്നതിന് അഫ്ഗാനിസ്​താനിൽ വലിയ സ്​ഥാനവും പ്രാധാന്യവുമാണുള്ളത്. നമുക്കിടയിലെ 99 ശതമാനവും ഇസ്​ലാംമതവിശ്വാസികളാണ്. ഇസ്​ലാമി‍െൻറയും ഇസ്​ലാമിക നാഗരികതയുടെയും ദീർഘകാല ചരിത്രം അഫ്ഗാനിസ്താനുണ്ട്. രാജ്യത്തെ വിഭജിക്കുന്നതല്ല, ഒരുമിപ്പിക്കുന്നതാണ് മതമെന്ന ഘടകമെന്നും അദ്ദേഹം വ്യക്തമാക്കി.

അഫ്ഗാൻ വനിതകളുടെ ധീരതയെ പ്രസിഡൻറ് ഡോ. ഗനി പ്രത്യേകം ചൂണ്ടിക്കാട്ടി. അഫ്ഗാനിസ്​താനിലെ സ്​ത്രീകൾക്കുവേണ്ടി എഴുതുന്നവരെയോ സംസാരിക്കുന്നവരെയോ അവർ ആവശ്യപ്പെടുന്നില്ല. അവർക്കുവേണ്ടി സംസാരിക്കാനും അവരെ പ്രതിനിധാനംചെയ്യാനും അവർ മതിയാകും. അഫ്ഗാനിസ്​താനിലെ അധിനിവേശങ്ങൾക്കെതിരെ ആയുധമെടുത്ത വനിതകൾ ചരിത്രത്തിലിടം നേടിയിട്ടുണ്ട്. ധീരതയോടെ അവരുടെ നാടിനെ വൈദേശിക ശക്തികളിൽനിന്ന് അവർ സംരക്ഷിച്ചിട്ടുണ്ട്. അദ്ദേഹം പറഞ്ഞു.

ഖത്തറിൻെറ മധ്യസ്​ഥതയിൽ ദോഹയിൽ അഫ്​ഗാൻ സർക്കാറും താലിബാനും തമ്മിലുള്ള സമാധാന ചർച്ചകൾ പുരോഗമിക്കുന്നതിനിടയിലാണ്​ അഫ്​ഗാൻ പ്രസിഡൻറ്​ കഴിഞ്ഞ ദിവസം ഔദ്യോഗിക സന്ദർശനത്തിനായി ഖത്തറി​ െലത്തിയത്​. നേരത്തേ അഫ്ഗാൻ പ്രസിഡൻറ് ഡോ. മുഹമ്മദ് അശ്റഫ് ഗനി അമീർ ശൈഖ് തമീം ബിൻ ഹമദ് ആൽഥാനിയുമായി ചർച്ച നടത്തിയിരുന്നു.അമീരി ദീവാനിൽ നടന്ന ചർച്ചയിൽ ഖത്തറും അഫ്ഗാനിസ്​താനും തമ്മിലുള്ള ഉഭയകക്ഷി ബന്ധവും വിവിധ മേഖലകളിൽ സഹകരണം ശക്തമാക്കുന്നതും ഇരുരാഷ്​ട്ര നേതാക്കളും ചർച്ച ചെയ്തു. ഖത്തറും അഫ്ഗാനിസ്​താനും തമ്മിലുള്ള ബന്ധത്തിൻറ പ്രാധാന്യം വ്യക്തമാക്കിയ പ്രസിഡൻറ് ഡോ. ഗനി, അഫ്ഗാൻ സമാധാന ചർച്ചകൾക്കായി മധ്യസ്​ഥത വഹിച്ച ഖത്തറിനെ പ്രശംസിക്കുകയും അഫ്ഗാനിസ്​താനിൽ സമാധാനം പുനഃസ്​ഥാപിക്കുന്നതിൽ ഖത്തറി‍െൻറ പങ്ക് പ്രധാനപ്പെട്ടതാണെന്നും ചൂണ്ടിക്കാട്ടി.അഫ്ഗാൻ സമാധാന ചർച്ചകളുമായി ബന്ധപ്പെട്ട പുതിയ സംഭവവികാസങ്ങളും അമീർ–അഫ്ഗാൻ പ്രസിഡൻറ് കൂടിക്കാഴ്ചയിൽ വിശകലനം ചെയ്തു.ഖത്തറിൽനിന്നുള്ള മന്ത്രിമാരും ഉന്നത ഉദ്യോഗസ്​ഥരും അഫ്ഗാൻ പ്രസിഡൻറിനൊപ്പം ഖത്തറിലെത്തിയ ഉന്നതതല സംഘവും കൂടിക്കാഴ്ചയിൽ സംബന്ധിച്ചു.