അമീർ കപ്പ് ഷൂട്ടിങ്ങിനും അമ്പെയ്ത്തിനും ലുസൈലിൽ തുടക്കം

ദോഹ: അമീർ കപ്പിനായുള്ള ഷൂട്ടിങ്​, അമ്പെയ്ത്ത് ടൂർണമെൻറിന് ലുസൈലിലെ ഖത്തർ ഷൂട്ടിങ്​ ആൻഡ് ആർച്ചറി അസോസിയേഷൻ ഷൂട്ടിങ് കോംപ്ലക്സിൽ തുടക്കമായി. കോവിഡ് -19 കാരണം ദീർഘകാലമായി മുടങ്ങിയിരുന്ന ഷൂട്ടിങ്, അമ്പെയ്ത്ത് മത്സരങ്ങൾ വീണ്ടും ആരംഭിച്ചതോടെ ഖത്തറിലെ പ്രമുഖ താരങ്ങൾ ഷൂട്ടിങ് റേഞ്ചിലെത്തും. നവംബർ 28ന് അവസാനിക്കുന്ന ചാമ്പ്യൻഷിപ്പ് പി.ഇ.ടി ട്രാപ്പ് മത്സരത്തോടെയാണ് ആരംഭിച്ചത്. ട്രാപ്പ്, പി.ഇ.ടി സ്​കീറ്റ്, പി.ഇ.ടി ഡബിൾ ട്രാപ്പ്, പി.ഇ.ടി 25 മീറ്റർ റാപിഡ് ഫയർ, പിസ്​റ്റൾ ഇനങ്ങളിലും ഷൂട്ടർമാർ മത്സരിക്കാനിറങ്ങും.

അമീർ കപ്പിനായുള്ള എല്ലാ ഒരുക്കങ്ങളും നേരത്തേ തന്നെ പൂർത്തിയായതായും ഷൂട്ടർമാർക്ക് എല്ലാ വിജയാശംസകളും നേരുന്നതായും ക്യു.എസ്​.എ.എ സെക്രട്ടറി ജനറൽ മാജിദ് അഹ്മദ് അൽ നഈമി കഴിഞ്ഞദിവസം അറിയിച്ചിരുന്നു. കോവിഡ് സാഹചര്യത്തിൽ എല്ലാവരുടെയും സുരക്ഷ ഉറപ്പാക്കുന്നതിനാവശ്യമായ മുൻകരുതൽ നടപടികൾ സ്വീകരിച്ചിട്ടുണ്ട്​. രോഗവ്യാപനം തടയുന്നതിെൻറ ഭാഗമായി എല്ലാ മാനദണ്ഡങ്ങളും കർശനമായി നടപ്പാക്കുമെന്നും അദ്ദേഹം പറഞ്ഞു.

ഷൂട്ടിങ് റേഞ്ചിലെ പുതിയ താരങ്ങളുടെ പിറവിക്കും ചാമ്പ്യൻഷിപ്പ് സഹായമാകുമെന്ന് ടൂർണമെൻറ് എക്സിക്യൂട്ടിവ് ഡയറക്ടർ മുഹമ്മദ് അഹ്മദ് താഹിർ പറഞ്ഞു. വളർന്നുവരുന്ന നിരവധി ഷൂട്ടർമാരാണ് ഖത്തറിലുള്ളത്​. കഴിഞ്ഞ അമീർ കപ്പിനിടെ ഒരുപിടി മികച്ച താരങ്ങൾ ഉയർന്നുവന്നതായും അദ്ദേഹം വ്യക്തമാക്കി.

ചാമ്പ്യൻഷിപ്പിെൻറ ഷോട്ട് ഗൺ റഫറീസ്​ സമിതിക്ക് സഈദ് ഹമദ് അൽ ഖഹ്താനി നേതൃത്വം നൽകും. ഗൺ, പിസ്​റ്റൾ റഫറീസ്​ സമിതിക്ക് അഹ്മദ് അബ്​ദുറഹ്മാൻ അൽ ജൈദയാണ് നേതൃത്വം വഹിക്കുക. നവംബർ 20ന് സ്​കീറ്റ്, ഡബിൾ ട്രാപ്പ് മത്സര ഇനങ്ങൾ നടക്കും. സ്​കീറ്റ് മിക്സഡ് ടീമിന മത്സരങ്ങൾ നവംബർ 28നാണ് നടക്കുക. ഇന്നലെ തുടങ്ങിയ അമ്പെയ്ത്ത് മത്സരം ഇന്ന് അവസാനിക്കും.