ഓട്ടോണമസ് ഇ മൊബിലിറ്റി ഫോറം വാർത്താ സമ്മേളനത്തിൽ ഗതാഗത മന്ത്രാലയം ഉദ്യോഗസ്ഥരും മറ്റും പങ്കെടുക്കുന്നു
ദോഹ: പുതുതലമുറ ഗതാഗത സംവിധാനമായ ‘ഓട്ടോണമസ് ഇ മൊബിലിറ്റി’യുടെ പുതിയ സാധ്യതകൾ തേടുന്ന അന്താരാഷ്ട്ര സമ്മേളനത്തിന് ദോഹ വേദിയാകുന്നു. പരിസ്ഥിതി സൗഹൃദ വാഹനങ്ങൾ, ഡ്രൈവറില്ല ഓട്ടോണമസ് വാഹനങ്ങൾ തുടങ്ങിയവ സംബന്ധിച്ച വിശാല ലോകത്തേക്ക് ഇടം തുറന്നാണ് ഇ മൊബിലിറ്റി ഫോറത്തിന് ഖത്തർ ഗതാഗത മന്ത്രാലയം ആതിഥേയരാകുന്നത്. ഏപ്രിൽ 30 മുതൽ മേയ് രണ്ട് വരെയായി നടക്കുന്ന ഫോറത്തിൽ 20ഓളം രാജ്യങ്ങളിൽനിന്നായി 40ലധികം വിദഗ്ധർ പങ്കെടുക്കുമെന്ന് ഗതാഗത മന്ത്രാലയം അധികൃതർ വാർത്തസമ്മേളനത്തിൽ അറിയിച്ചു. സ്പോൺസർമാരും പങ്കാളികളുമായി 20ലധികം കമ്പനികൾ ഭാഗമാകും. ഖത്തർ റെയിൽവേയും (റെയിൽ), മൈക്രോസോഫ്റ്റ് കോർപറേഷനുമാണ് സ്പോൺസർമാർ. നയരൂപകർത്താക്കൾ, സർക്കാർ ഏജൻസി പ്രതിനിധികൾ, അക്കാദമിക് വിദഗ്ധർ, വ്യവസായ വിദഗ്ധർ, എൻജിനീയർമാർ, കൺസൽട്ടന്റുമാർ, പ്രമുഖ നേതാക്കൾ തുടങ്ങിയ മേഖലകളിൽ നിന്നുള്ളവർ ത്രിദിന പരിപാടിയിൽ സംസാരിക്കും. ഓട്ടോണമസ് ഇ-മൊബിലിറ്റി മേഖലയിലെ അന്തർദേശീയ, പ്രാദേശിക കമ്പനികളുടെ നൂതനാശയങ്ങൾ ഉയർത്തിക്കാട്ടുന്ന പ്രദർശനവും സംഘടിപ്പിക്കും. സ്വയംപ്രവർത്തിക്കുന്ന സാങ്കേതികവിദ്യയുടെ സാധ്യതകൾ, ഇ-മൊബിലിറ്റി ഇക്കോസിസ്റ്റവും സാങ്കേതികവിദ്യ, ഗവേഷണം, നയം എന്നിവയിലൂടെ ലോക സമൂഹങ്ങളിൽ അവയുടെ സ്വാധീനം എന്നീ വിഷയങ്ങൾ ചർച്ച ചെയ്യുന്നതിനും ആശയങ്ങൾ കൈമാറ്റം ചെയ്യുന്നതിനുമുള്ള ഏകീകൃത വേദിയായി ഫോറം മാറുമെന്നാണ് പ്രതീക്ഷിക്കുന്നതെന്ന് വാർത്താ സമ്മേളനത്തിൽ വ്യക്തമാക്കി. സുസ്ഥിര ഗതാഗതം എന്ന ലക്ഷ്യത്തിൽ ലോകം നിർണായക വഴിത്തിരിവിലാണ് എത്തിയിരിക്കുന്നതെന്ന് മന്ത്രാലയത്തിലെ കര ഗതാഗത വിഭാഗം ആക്ടിങ് അസി. അണ്ടർ സെക്രട്ടറി ഹമദ് ഇസ്സ അബ്ദുല്ല പറഞ്ഞു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.