ബീച്ചുകളിലെത്താം, കാലാവസ്​ഥ മുന്നറിയിപ്പുകൾ പാലിച്ച്​

ദോഹ: രാജ്യത്ത്​ ചൂടുകൂടിവരുന്നതിനാൽ ബീച്ചുകളിൽ കുടുംബവുമായി എത്തുന്നവർ കൂടിവരുകയാണ്​. കനത്ത ചൂടിൽനിന്ന്​ രക്ഷനേടി വെള്ളത്തിൽ കളിച്ചുല്ലസിക്കാൻ വരുന്നവർ ഏറെ ജാഗ്രത പാലിക്കണമെന്നും അധികൃതർ മുന്നറിയിപ്പ്​ നൽകുന്നുണ്ട്​. കുട്ടികളും കുടുംബങ്ങളുമായി ബീച്ചുകളിലേക്ക് ഒഴിവുവേളകൾ ചെലവഴിക്കാൻ പോകുന്നതിനുമുമ്പ് കാലാവസ്​ഥാ വകുപ്പി​െൻറ മുന്നറിയിപ്പുകൾ പ്രത്യേകം ശ്രദ്ധിക്കണം.

കടൽത്തീരങ്ങളിൽ ശക്തമായ കാറ്റിനും ഉയർന്ന തിരമാലകൾക്കും സാധ്യതയേറെയാണ്​. അതിനാൽ, കാലാവസ്​ഥാ മുന്നറിയിപ്പുകൾ ഇടവിട്ട് ശ്രദ്ധിക്കണം. എന്നിട്ട്​ മാത്രമേ ബീച്ചുകളിൽ പോകാവൂ. ബീച്ചുകളിലും പൂളുകളിലും നീന്താൻ ഇറങ്ങുമ്പോൾ സുരക്ഷാ മുൻകരുതലുകൾ പാലിക്കണം. കുട്ടികൾ വെള്ളത്തിലിറങ്ങുമ്പോൾ രക്ഷിതാക്കളും മാതാപിതാക്കളും അവരുടെ തൊട്ടടുത്ത് ഉണ്ടാകണം. അവരെ എപ്പോഴും നിരീക്ഷിക്കണം. നിശ്ചയിക്കപ്പെട്ട ഭാഗങ്ങളിൽ മാത്രം നീന്തണം. നീന്തുന്നതുമായി ബന്ധപ്പെട്ട അടിസ്​ഥാനകാര്യങ്ങൾ കുട്ടികളെ പഠിപ്പിച്ചിരിക്കണം.

ബീച്ചുകളിലിറങ്ങുമ്പോൾ ലൈഫ് ജാക്കറ്റ് പോലെയുള്ള സുരക്ഷാ സംവിധാനങ്ങൾ ധരിക്കണം. വെള്ളത്തിൽമുങ്ങി അപകടം പറ്റുന്നവർക്കുള്ള പ്രാഥമിക ശു​​ശ്രൂഷയായ സി.പി.ആർ സംബന്ധിച്ച്​ ആളുകൾക്ക് അറിവുണ്ടായിരിക്കണം. ബീച്ചുകളിലേക്ക് തിരിക്കും മുമ്പ് കാലാവസ്​ഥാ മുന്നറിയിപ്പുകൾ സംബന്ധിച്ച് ബോധവാന്മാരായിരിക്കണമെന്ന് ആഭ്യന്തര മന്ത്രാലയവും മുന്നറിയിപ്പ്​ നൽകുന്നുണ്ട്​. കടലിലും തീരത്തും കടൽക്ഷോഭത്തിനും കടൽചുഴികൾക്കും സാധ്യതയേറെയാണ്​. രക്ഷിതാക്കളും കുട്ടികളും കുടുംബങ്ങളും ഇക്കാര്യം പ്രത്യേകം ശ്രദ്ധിക്കണം. തീരക്കടലിൽ കണ്ടുവരുന്ന റിപ് കറൻറ് പ്രതിഭാസം ഉണ്ടാകാൻ സാധ്യതയുള്ളതിനാൽ കടലിൽ കുളിക്കാനിറങ്ങുന്നവർ ഏറെ ശ്രദ്ധിക്കേണ്ടതുണ്ട്​.

തീരപ്രദേശങ്ങളിൽ കടൽ പരപ്പ് നീന്തുന്നതിന് പാകമായ ശാന്തതയോടെ കാണും. എന്നാൽ, അടിയിൽ ആഴക്കടലിലേക്ക് വലിച്ചുകൊണ്ട് പോകാൻ തക്കം ചുഴിയോടുകൂടിയ ശക്തമായ നീരൊഴുക്ക്​ ഉണ്ടാകുന്നതാണ്​ റിപ് കറൻറ് പ്രതിഭാസം. ചുഴിത്തിരയിൽ പെടുന്നതോടെവെ ള്ളത്തിലിറങ്ങിയ വ്യക്തിക്ക് തിരിച്ചുവരാൻ ഏറെ പ്രയാസമായിരിക്കും. റിപ് കറൻറ് സമയങ്ങളിൽ തീരത്ത് കടൽ ശാന്തമായിരിക്കും. വെള്ളത്തി‍െൻറ നിറം ഇരുണ്ടതുമായിരിക്കും.

ചുഴിയിൽ പെട്ടാൽ എതിർവശത്തേക്ക് നീന്താൻ ശ്രമിക്കാതെ ശാന്തമായി നിലകൊള്ളുകയും പതിയെ തുഴഞ്ഞ് മുകളിലേക്കെത്താൻ ശ്രമിക്കുകയുമാണ്​ വേണ്ടത്​. സഹായത്തിനായി കൈ വീശുകയും ഉച്ചത്തിൽ വിളിച്ച് ശ്രദ്ധ നേടുകയും ചെയ്യണമെന്നും അധികൃതർ നിർദേശിക്കുന്നു.

കോവിഡ്–19 നിയന്ത്രണങ്ങൾ നീക്കുന്നതി​െൻറ ഭാഗമായാണ്​ രാജ്യത്തെ ബീച്ചുകളെല്ലാം പൊതുജനങ്ങൾക്കായി തുറന്നു കൊടുത്തത്​. കോവിഡ്–19 പശ്ചാത്തലത്തിൽ കർശന നിയന്ത്രണങ്ങളോടെയും മുൻകരുതലുകളോടെയുമാണ് ബീച്ചുകളിലേക്കുള്ള പ്രവേശനം അനുവദിച്ചിരിക്കുന്നത്.

അതേസമയം, കടലാമകളുടെ സംരക്ഷണവുമായി ബന്ധപ്പെട്ട പദ്ധതികൾ നടക്കുന്നതിനാൽ ഫുവൈരിത്​ ബീച്ച്​ അടച്ചിടുന്നത്​ മുനിസിപ്പാലിറ്റി പരിസ്​ഥിതി മന്ത്രാലയം നീട്ടിയിട്ടുണ്ട്​. വംശനാശ ഭീഷണി നേരിടുന്ന വിവിധയിനം കടലാമകളെ സംരക്ഷിക്കുന്ന തുടർപദ്ധതിയാണ്​ ഖത്തർ പെട്രോളിയത്തിൻെറ സാമ്പത്തിക സഹായത്തോടെ ഖത്തർ യൂനിവേഴ്​സിറ്റിയുടെ പരിസ്​ഥിതി വകുപ്പിൻെറ നേതൃത്വത്തിൽ നടക്കുന്നത്​.

കോവിഡ്​ 19 പ്രതിരോധ നടപടികളുടെ ഭാഗമായി രാജ്യത്തെ ബീച്ചുകൾ അടച്ചിട്ടത്​ വംശനാശ ഭീഷണി നേരിടുന്ന ഹോക്സ്​ബിൽ വർഗത്തിൽ പെട്ട കടലാമകളുടെ സംരക്ഷണത്തിന്​ ഏറെ ഗുണകരമായി എന്നാണ്​ വിലയിരുത്തൽ. ഫുവൈരിത് ബീച്ച് പോലെയുള്ള സംരക്ഷിത പ്രദേശങ്ങളിൽനിന്ന് 2016 മുതൽ 2019 വരെ 15,799 കടലാമക്കുഞ്ഞുങ്ങളെയാണ് കടലിലേക്ക് ഒഴുക്കിയത്​. ഹോക്സ്​ബിൽ കടലാമകൾക്ക് പ്രജനനത്തിനായി ഏറ്റവും അനുയോജ്യമായ ഇടമാണ് ഫുവൈരിത് ബീച്ചെന്നാണ് പഠനം. പ്രദേശത്തി​െൻറ ഭൂമിശാസ്​ത്രപരമായ കിടപ്പും പ്രകൃതവും പൊതുജനങ്ങളുടെയും കെട്ടിടങ്ങളുടെയും വാഹനങ്ങളുടെയും ശബ്​ദങ്ങളിൽനിന്ന് മുക്തമായതുമാണ് ഇതിന് കാരണം. കോവിഡ്–19 പ്രതിസന്ധികൾക്കിടയിലും മുൻ വർഷങ്ങൾക്ക് സമാനമായി ഈ വർഷവും ഹോക്സ്​ബിൽ കടലാമകളുടെ സംരക്ഷണത്തിന് വിപുലമായ പരിപാടികളാണ് ആസൂത്രണം ചെയ്തിരിക്കുന്നത്. 

കതാറയിലെ ബീച്ചുകളുടെ പ്രവർത്തന സമയം

കതാറയിലെ ബീച്ചുകളുടെ പ്രവർത്തന സമയം കതാറ കൾചറൽ വില്ലേജ് ഫൗണ്ടേഷൻ പുറത്തുവിട്ടു. കതാറയിലെ 3, 4, 5 ബീച്ചുകളുടെ പ്രവർത്തന സമയമാണ് ഫൗണ്ടേഷൻ പുറത്തുവിട്ടത്. വൈകീട്ട് മൂന്ന്​ മുതൽ രാത്രി 10 വരെയാണ് ബീച്ചുകളുടെ പ്രവർത്തന സമയം. എന്നാൽ, സൂര്യാസ്​തമയം വരെ മാത്രമേ കടലിൽ ഇറങ്ങാനും നീന്താനും അനുവദിക്കൂ.

ബീച്ചിലേക്ക് പ്രവേശിക്കുന്നതിന് ഈയടുത്ത് കതാറ ഫീസ്​ ഏർപ്പെടുത്തിയിട്ടുണ്ട്. മുതിർന്നവർക്ക് 50 റിയാലാണ് പ്രവേശന ഫീസ്​. ഏഴു വയസ്സു മുതൽ 18 വയസ്സു വരെ 25 റിയാൽ. ഏഴു വയസ്സു വരെയുള്ള കുട്ടികൾക്ക് പ്രവേശനം സൗജന്യമായിരിക്കും. ബീച്ചുകളിലെ കസേരകൾക്ക് ഒന്നിന് 5 റിയാലാണ് നിരക്ക്. കൂടുതൽ വിവരങ്ങൾക്ക് 55449862 എന്ന നമ്പറിൽ ബന്ധപ്പെടണം.