ഗൾഫ് പ്രതിസന്ധി: പരിഹാരശ്രമങ്ങളുമായി ഫ്രഞ്ച് വിദേശകാര്യമന്ത്രിയും ഖത്തറിലേക്ക് 

ദോഹ: ഖത്തറിനെതിരായ അയൽരാജ്യങ്ങളുടെ ഉപരോധമുൾപ്പെടെയുള്ള ഗൾഫ് പ്രതിസന്ധിക്ക് പരിഹാരം കാണുന്നതിനുള്ള ശ്രമങ്ങളുമായി ഫ്രഞ്ച് വിദേശകാര്യമന്ത്രി യീൻവെസ്​ ലേ ഡ്രിയാൻ ഖത്തർ സന്ദർശിക്കും. 
ഖത്തറിന് പുറമേ, ഉപരോധ രാജ്യങ്ങളായ സൗദി അറേബ്യ, യു.എ.ഇ രാജ്യങ്ങളിലും പ്രതിസന്ധിയുടെ ആരംഭം മുതൽ മധ്യസ്​ഥ ശ്രമങ്ങൾക്കായി മുൻനിരയിലുള്ള കുവൈത്തിലും ലെ റിയാൻ സന്ദർശനം നടത്തും. 
ജൂലൈ 15, 16 തിയതികളിലാണ് പരിഹാരശ്രമങ്ങളുമായി ഫ്രഞ്ച് വിദേശകാര്യമന്ത്രി പശ്​ചിമേഷ്യ സന്ദർശിക്കുകയെന്ന് അദ്ദേഹത്തി​െൻറ ഓഫീസ്​ പുറത്തിറക്കിയ വാർത്താകുറിപ്പിൽ വ്യക്തമാക്കി. 
ഗൾഫ് പ്രതിസന്ധി പരിഹരിക്കുന്നതിന് വേണ്ടി അമേരിക്ക, ബ്രിട്ടൻ, ജർമനി തുടങ്ങിയ രാജ്യങ്ങൾ മുന്നോട്ട് വെച്ച അതേ രീതിയിലൂടെ തന്നെയായിരിക്കും ഫ്രാൻസും മുന്നോട്ട് പോകുകയെന്നും  ഫ്രാൻസ്​ വിദേശകാര്യമന്ത്രാലയം വ്യക്തമാക്കി.
ഗൾഫ് പ്രതിസന്ധി പരിഹരിക്കുന്നതുമായി ബന്ധപ്പെട്ട് കഴിഞ്ഞ ദിവസങ്ങളിലാണ് അമേരിക്കൻ വിദേശകാര്യ സെക്രട്ടറി റെക്സ്​ ടില്ലേഴ്സൺ ഖത്തറടക്കമുള്ള രാജ്യങ്ങൾ സന്ദർശിച്ചതും രാഷട്രത്തലവന്മാരുമായി കൂടിക്കാഴ്ച നടത്തിയതും.