അൽ സദ്ദ് ഫുട്ബാൾ ടീം
ദോഹ: രാജ്യത്തെ ഒന്നാം ഡിവിഷൻ ഫുട്ബാൾ ലീഗായ ഖത്തർ സ്റ്റാർസ് ലീഗ് അടുത്ത മാസം തുടങ്ങാനിരിക്കെ നിലവിലെ ചാമ്പ്യന്മാരായ അൽ സദ്ദ് പ്രീ സീസൺ പരിശീലനത്തിനായി സ്പെയിനിലെ മലാഗയിലേക്ക്. ജൂലൈ ഒമ്പത് മുതൽ 29 വരെ മലാഗയിലെ മാർബെല്ല ഫുട്ബാൾ സെന്ററിൽ ക്യാമ്പ് നടത്തുമെന്ന് ടീമിന്റെ ഔദ്യോഗിക എക്സ് അക്കൗണ്ടിലൂടെ അറിയിച്ചു.
സ്പെയിനിലെ വിവിധ ടീമുകളുമാണ് സൗഹൃദ മത്സരങ്ങളും കളിക്കും. നിലവിലെ ലീഗ് ചാമ്പ്യന്മാർ എന്ന നിലയിൽ എ.എഫ്.സി ചാമ്പ്യൻസ് ലീഗ് എലൈറ്റിൽ പങ്കെടുക്കാൻ തയാറെടുക്കുകയാണ് അൽ സദ്ദ്. ഏഷ്യയിലെ മികച്ച 24 ടീമുകളെ പങ്കെടുപ്പിച്ചുള്ള ഈ ടൂർണമെന്റ് സെപ്റ്റംബർ പകുതിയോടെ ആരംഭിക്കും. കഴിഞ്ഞ സീസണിൽ ഖത്തരി ലീഗും അമീരി കപ്പും സ്വന്തമാക്കിയ തലയെടുപ്പോടെയാണ് ഇത്തവണ അൽ സദ്ദ് ഇറങ്ങുന്നത്. 1989, 2011 വർഷങ്ങളിൽ എ.എഫ്.സി ചാമ്പ്യൻസ് ലീഗ് കിരീടം സ്വന്തമാക്കിയ പാരമ്പര്യവും ടീമിനുണ്ട്. അൽ അഹ്‍ലി, അൽ അറബി, അൽ വക്റ, ഖത്തർ എഫ്.സി, അൽ റയ്യാൻ, അൽ സദ്ദ്, അൽ ഗറാഫ, ഉമ്മു സലാൽ, അൽ ഷമൽ, അൽ മർഖിയ, മുഐതിർ, അൽ ദുഹൈൽ എന്നീ ടീമുകളാണ് ഖത്തർ ഒന്നാം ഡിവിഷനിൽ മാറ്റുരക്കുന്നത്.
കഴിഞ്ഞ സീസണിൽ അൽ സദ്ദിന് പിറകിൽ അൽ റയ്യാൻ രണ്ടാം സ്ഥാനവും അൽ ഗറാഫ മൂന്നാം സ്ഥാനവും സ്വന്തമാക്കി. അൽ വക്റ, അൽ അറബി, അൽ ദുഹൈൽ, ഖത്തർ എഫ്.സി, അൽ ഷമൽ, അൽ അഹ്‍ലി, അൽ മർഖിയ, മുഐതിർ എന്നിവയായിരുന്നു യഥാക്രമം അടുത്ത സ്ഥാനങ്ങളിൽ. 26 ഗോൾ നേടി അൽ സദ്ദിന്റെ അക്റം ആതിഫ് ടോപ് സ്കോററായി.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.