പുതിയ ആഭ്യന്തര വിവര ശൃംഖലയുമായി പൊതുജനാരോഗ്യമന്ത്രാലയം

ദോഹ: മന്ത്രാലയത്തിനുള്ളിലെ ആശയവിനിമയം കൂടുതൽ ശക്തിപ്പെടുത്തുന്നതിെൻറ ഭാഗമായി പുതിയ ആഭ്യന്തര വിവര ശൃംഖലക്ക് പൊതുജനാരോഗ്യ മന്ത്രാലയം തുടക്കം കുറിച്ചു.മന്ത്രാലയത്തിനുള്ളിലെ ആശയവിനിമയ സംവിധാനം കൂടുതൽ മെച്ചപ്പെടുത്തുന്നതിനും ഉന്നത അന്താരാഷ്​ട്ര നിലവാരത്തിൽ ആധുനിക സാങ്കേതികവിദ്യ വഴി മന്ത്രാലയത്തിനുള്ളിലെ വിവിധ വകുപ്പുകളും വിഭാഗങ്ങളും തമ്മിലുള്ള സഹകരണം ശക്തിപ്പെടുത്താനും 'നതവാസൽ' എന്ന പോർട്ടലാണ്​ പുതുതായി അവതരിപ്പിച്ചിരിക്കുന്നത്​.

ഭരണ നിർവഹണ ജോലികളുടെ കാര്യക്ഷമത വർധിപ്പിക്കുക, വിവര കൈമാറ്റ രീതികൾ കൂടുതൽ മെച്ചപ്പെടുത്തുക, ഷെയേർഡ് കമ്പ്യൂട്ടിങ്​ ടെക്നിക്സിെൻറ ഗുണം കരസ്​ഥമാക്കുക തുടങ്ങിയവയും 'നതവാസലി'െൻറ ഉദ്ദേശ്യങ്ങളിലുൾപ്പെടുന്നു.മന്ത്രാലയത്തിലെ ജീവനക്കാർക്ക് സഹായമേകുന്നതിനും തൊഴിൽ വികാസത്തിന് ഗുണകരമാകുന്നതിനുമുള്ള മന്ത്രാലയത്തിെൻറ പ്രതിബദ്ധതയുടെ ഭാഗമായാണ് 'നതവാസൽ' ആരംഭിച്ചിരിക്കുന്നത്.തൊഴിൽ രംഗത്ത് മന്ത്രാലയ ജീവനക്കാർക്ക് കൂടുതൽ സഹായമേകുന്നതോടൊപ്പം ജീവനക്കാർക്കിടയിലെ ആശയവിനിമയത്തിന് കൂടുതൽ സാധ്യതയും പുത്തൻ ആശയങ്ങളും നതവാസൽ മുന്നോട്ടുവെക്കുന്നു.