അൽബെയ്ത് സ്റ്റേഡിയം സന്ദർശിക്കുന്ന മൊറോക്കോ പ്രധാനമന്ത്രി അസിസ് അകനൗഷ്
ദോഹ: ഖത്തർ സന്ദർശിക്കുന്ന മൊറോക്കോ പ്രധാനമന്ത്രി അസിസ് അകനൗഷ് അമീർ ശൈഖ് തമീം ബിൻ ഹമദ് ആൽഥാനിയുമായി കൂടിക്കാഴ്ച നടത്തി. തിങ്കളാഴ്ച രാവിലെ ദോഹയിലെത്തിയ മൊറോക്കോ പ്രധാനമന്ത്രി അമിരി ദിവാനിലായിരുന്നു അമീറിനെ സന്ദർശിച്ചത്. ഇരു രാജ്യങ്ങളും തമ്മിലെ സൗഹൃദവും ഉഭയകക്ഷി ബന്ധവും ചർച്ച ചെയ്തു.
ഖത്തർ പ്രധാനമന്ത്രി ശൈഖ് ഖലിദ് ബിൻ ഖലീഫ ബിൻ അബ്ദുൽ അസീസ് ആൽഥാനി, വിദേശകാര്യ മന്ത്രി ശൈഖ് മുഹമ്മദ് ബിൻ അബ്ദുൽറഹ്മാൻ ആൽഥാനി, അമിരി ദിവാൻ ചീഫ് ശൈഖ് സൗദ് ബിൻ അബ്ദുൽറഹ്മാൻ ആൽഥാനി എന്നിവർ പങ്കെടുത്തു.
ഖത്തർ -മൊറോക്കോ സംയുക്ത ഉന്നത സമിതി യോഗത്തിന്‍റെ എട്ടാം സെഷനിലും മൊറോക്കോ പ്രധാനമന്ത്രി പങ്കെടുത്തു. ഖത്തർ പ്രധാനമന്ത്രി ശൈഖ് ഖാലിദ് ബിൻ ഖലീഫ ബിൻ അബ്ദുൽ അസീസ് ആൽഥാനിക്കൊപ്പമായിരുന്നു സംയുക്ത യോഗത്തിൽ പങ്കാളിയായത്. സാമ്പത്തിക, നിക്ഷേപ, സാംസ്കാരിക, കായിക, വിനോദ സഞ്ചാര മേഖലകളിലെ സഹകരണം സംബന്ധിച്ച് ചർച്ച ചെയ്തു. രാജ്യാന്തര തലത്തിലെയും മേഖലയിലെയും രാഷ്ട്രീയ സംഭവവികാസങ്ങൾ യോഗം ചർച്ച ചെയ്ത. ഇരു പ്രധാനമന്ത്രിമാരും വിവിധ വിഷയങ്ങളിൽ ധാരണപത്രത്തിൽ ഒപ്പുവെച്ചു.
വൈകീട്ടോടെ ഖത്തർ ലോകകപ്പിന്‍റെ വേദിയായ അൽ ബെയ്ത് സ്റ്റേഡിയവും സന്ദർശിച്ചു. സ്റ്റേഡിയവും ഗ്രൗണ്ടും വി.ഐ.പി ഏരിയ, ഹോസ്പിറ്റാലിറ്റി സ്യൂട്ട് തുടങ്ങിയ വിവിധ കേന്ദ്രങ്ങൾ സന്ദർശിച്ചു. കായിക മന്ത്രി സലാഹ് ബിൻ ഗാനിൽ അൽ അലി, സുപ്രീംകമ്മിറ്റി ഡയറക്ടർ ജനറൽ യാസർ അൽ ജമാൽ, ഡെപ്യൂട്ടി ഡയറക്ടറ ജനറൽ ഗാനിം അൽ കുവാരി എന്നിവരും അദ്ദേഹത്തോടൊപ്പമുണ്ടായിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.