ദോഹ: മേയ്‌ അഞ്ചിന് നടക്കുന്ന മെഡിക്കൽ പ്രവേശന പരീക്ഷയായ നാഷനൽ എലിജിബിലിറ്റി കം എൻട്രൻസ് ടെസ്റ്റിന് (നീറ്റ്) വിദേശ രാജ്യങ്ങളിൽ പരീക്ഷ കേന്ദ്രങ്ങൾ അനുവദിക്കേണ്ട എന്ന തീരുമാനം പുനഃപരിശോധിക്കണമെന്ന് കൾചറൽ ഫോറം സംസ്ഥാന കമ്മിറ്റി ആവശ്യപ്പെട്ടു.
എൻ.ടി.എ കഴിഞ്ഞ ദിവസം പുറത്തിറക്കിയ പരീക്ഷ കേന്ദ്രങ്ങളുടെ ലിസ്റ്റില്‍ ഗൾഫ് രാജ്യങ്ങൾ ഉൾപ്പെടെ ഇന്ത്യക്ക് പുറത്തുള്ള സെന്ററുകള്‍ ഉള്‍പ്പെടുത്താത്തത് വിദ്യാർഥികളിലും രക്ഷിതാക്കളിലും വലിയ ആശങ്കയാണ്‌ സൃഷ്ടിച്ചിരിക്കുന്നത്. ഒരു മുന്നറിയിപ്പില്ലാതെയാണ് വിദേശ രാജ്യങ്ങളിലെ പരീക്ഷകേന്ദ്രങ്ങൾ ഈ വർഷം നിർത്തൽ ചെയ്തത്. കഴിഞ്ഞ വർഷങ്ങളിൽ ആറ് ഗൾഫ് രാജ്യങ്ങൾ ഉൾപ്പെടെ 12 വിദേശ രാജ്യങ്ങളിൽ നീറ്റ് പരീക്ഷകേന്ദ്രങ്ങൾ ഉണ്ടായിരുന്നു. പ്രവാസികളുടെ നിരന്തര മുറവിളികളുടെ ഭാഗമായാണ് ഗൾഫിൽ കേന്ദ്രങ്ങൾ അനുവദിച്ചത്.
കൾചറൽ ഫോറം ഉൾപ്പെടെയുള്ള സംഘടനകൾ വിദേശകാര്യ മന്ത്രാലയം, എംബസി തുടങ്ങിയ കേന്ദ്രങ്ങളിൽ നിവേദനങ്ങൾ സമർപ്പിച്ചിരുന്നു.
ആയിരക്കണക്കിന് വിദ്യാർഥികളാണ് ഓരോ വർഷവും വിദേശ രാജ്യങ്ങളിൽനിന്നും നീറ്റ് പരീക്ഷ എഴുതുന്നത്. പെട്ടെന്നുള്ള ഈ തീരുമാനം വിദ്യാർഥികളുടെ തയാറെടുപ്പിനെ ബാധിക്കും. രക്ഷിതാക്കളുടെ ലീവ്, അവധിക്കാല സീസണിലെ ഉയര്‍ന്ന ടിക്കറ്റ് നിരക്ക് തുടങ്ങിയ നിരവധി കാരണങ്ങളാൽ ഇത് പ്രവാസികൾക്ക് പ്രയാസമുണ്ടാക്കും.
കഴിഞ്ഞ രണ്ട് വര്‍ഷം മുമ്പ് മാത്രമാണ് ദോഹയില്‍ പരീക്ഷകേന്ദ്രം അനുവദിച്ചത്. ഖത്തറിലെ ഇന്ത്യൻ എംബസി ഉൾപ്പെടെ ഈ വിഷയത്തിൽ ഇടപെടണമെന്നും, ഇന്ത്യൻ വിദേശകാര്യ മന്ത്രാലയം, കേരള മുഖ്യമന്ത്രി, ഖത്തറിലെ ഇന്ത്യൻ അംബാസഡർ തുടങ്ങിയവർക്ക് ഈ ആവശ്യം ഉന്നയിച്ച് നിവേദനങ്ങൾ നൽകുമെന്നും കൾചറൽ ഫോറം ഭാരവാഹികൾ അറിയിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.