സ്​നേഹച്ചിറകിലേറി ഷാഫി നാട്ടിലേക്ക്​; ഈ കരുതൽ ഇനിയും തുടരണം

ദോഹ: ഈ അതിജീവന പോരാട്ടത്തിൽ ഷാഫിക്കും കൂട്ടുകാർക്കും നാട്ടുകാർക്കും തോറ്റുകൂടാ... ആശുപത്രികിടക്കയിൽ വെറുമൊരു ശരീരമായി കിടന്ന യുവാവിനെയും വഹിച്ച്​ ഖത്തർ എയർവേസ്​ വിമാനം തിങ്കളാഴ്​ച​ രാത്രി ദോഹയിൽ നിന്നും കൊച്ചിയിലേക്ക്​ പറന്നുയരു​േമ്പാൾ പ്രതീക്ഷയോടെ ഒരു കുടുംബവും നാടും ഒരുപറ്റം മനുഷ്യ സ്​നേഹികളുമുണ്ട്​. ​

ഖത്തറിലെ ഹമദ്​ ആശുപത്രിയിൽ എട്ടുമാസമായി ചികിത്സയിലായിരുന്ന കുമരനെല്ലൂർ എൻജിനീയർ റോഡ് സ്വദേശി മുഹമ്മദ്‌ ഷാഫിയെന്ന 38കാരൻ അതിജീവനത്തിനായി പോരാട്ടത്തിലായിരുന്നു. വെൻറിലേറ്ററുകളും മരുന്നുകളുമായി തുടരുന്ന അദ്ദേഹത്തിൻെറ ചെറുത്തു നിൽപിനൊടുവിലാണ്​ നാട്ടുകാരും സുഹൃത്തുക്കളും ഒന്നിച്ചപ്പോൾ ഈ അവസ്​ഥയിലും നാട്ടിലേക്കുള്ള യാത്ര യാഥാർത്ഥ്യമാവുന്നത്​.

ഖത്തറിൽ ലിമോസിൻ ഡ്രൈവറായി ജോലി ചെയ്​തിരുന്ന ഷാഫിയെ കഴിഞ്ഞ മാർച്ചിലാണ്​ വിധി വീഴ്​ത്തുന്നത്​. നെയ്​തുകൂട്ടിയ സ്വപ്​നങ്ങളിലേക്ക്​ ജീവിതം പതുക്കെ കരപിടിപ്പിക്കുന്നതിനിടയിൽ​ കോവിഡ്​ മഹാമാരി ഷാഫിയെയും പിടികൂടി​. ഹമദ്​ ആശുപത്രിയിൽ പ്രവേശിപ്പിക്കപ്പെട്ടു. കോവിഡ്​ രൂക്ഷമായി ​െവൻറിലേറ്ററിൽ പ്രവേശിപ്പിക്കപ്പെട്ടപ്പോൾ രണ്ടു തവണ ഹൃദയാഘാതമെത്തിയതോടെ നില വഷളായി. ആരോഗ്യ നില അതീവ ഗുതുരതാവസ്​ഥയിലായി. സംസാര ശേഷിയും ഓർമയും നഷ്​ടമായി.

ഈ ഘട്ടത്തിലാണ്​ ഷാഫിയെ നാട്ടിലെത്തിച്ച്​ കുടുംബാംഗങ്ങളുടെ കൂടി സാമീപ്യത്തിൽ വിദഗ്​ധ ചികിത്സ നൽകാൻ സുഹൃത്തുക്കൾ തീരുമാനിക്കുന്നത്​. പക്ഷേ, വെൻറിലേറ്റർ സഹായത്തോടെ ജീവിക്കുന്ന ചെറുപ്പക്കാരൻെറ യാത്ര വെല്ലുവിളിയായി. ​വിദഗ്​ധ ഡോക്​ടർമാരുടെയും, പാരാമെഡിക്കൽ ടീമിൻെറയും സംഘത്തിനൊപ്പമേ യാത്ര സാധ്യമാവൂ. വിമാനത്തിനുള്ളിൽ ചെറു ആശുപത്രി സംവിധാനവും ഒരുക്കണം. വിമാനടിക്കറ്റും, മരുന്നുകളും വെൻറിലേറ്റർ സംവിധാനങ്ങളും ഉൾപ്പെടെ ഭീമമായ സംഖ്യയായിരുന്നു നിർദേശിച്ചത്. ഇതുകാരണം നാട്ടിലേക്കുള്ള യാത്രയും അനിശ്​ചിതമായി വൈകി.

പിന്നീടായിരുന്നു ഖത്തറിലെ ജീവകാരുണ്യ പ്രവർത്തകരുടെയും ഹമദ്​ ആശുപത്രി അധികൃതരുടെയും കെ.എം.സി.സി പ്രവർത്തകരുടെയും ഇടപെടലുണ്ടാവുന്നത്​. ഒടുവിൽ ചിലവ്​ 20,000 റിയാലിലെത്തി. പക്ഷേ, അതും സമാഹരിക്കൽ വെല്ലുവിളിയായിരുന്നു. അപ്പോഴാണ്​ ഷാഫി കൂടി അംഗമായ ഖത്തറിലെ കുമരനല്ലൂർ മഹല്ല്​ കമ്മിറ്റി പ്രവർത്തകർ സ്​പോൺസറെ ബന്ധപ്പെടുന്നത്​. അദ്ദേഹം 5000റിയാൽ വാഗ്​ദാനം ചെയ്​തു. ​ബാക്കിയുള്ള തുക മഹല്ല്​ കമ്മിറ്റിയിലെ അംഗങ്ങളും ​​ഖത്തറിലെ മനുഷ്യ സ്​നേഹികളും ഒന്നിച്ചപ്പോൾ സാധ്യമായി. ഒടുവിൽ ഷാഫി തിങ്കളാഴ്​ച​ നാട്ടിലേക്ക്​ വിമാനം കയറുകയാണ്​.

കുടുംബത്തിനായി കണ്ട സ്വപ്​നങ്ങളെല്ലാം പാതിവഴിയിൽ ഉപേക്ഷിച്ച്​ ഒന്നുമറിയാതെയാണ്​ ഈ യുവാവിൻെറ മടക്കം. പ്രിയതമൻെറ ദുരിതവാർത്തകൾ അറിഞ്ഞ്​ നെഞ്ചുതകർന്നിരിക്കുന്ന ഭാര്യ ഷമീറക്ക​ും, ബാപ്പയെ കാത്തിരിക്കുന്ന 15ഉം, ഏഴും വയസ്സുള്ള പെൺകുട്ടികൾക്കും, ​പ്രിയപ്പെട്ട മകൻെറ വിധിയോർത്ത്​ കണ്ണീർവാർക്കുന്ന മാതാപിതാക്കൾക്കും ഒരേയെരു പ്രാർഥനയേ ഉള്ളൂ, അദ്ദേഹം ആരോഗ്യത്തോടെ തങ്ങൾക്കൊപ്പം ചേരണം.

എട്ടുമാസമായി ഹമദിലെ ചികിത്സ മുഴുവൻ സൗജന്യമായിരുന്നു. പക്ഷേ, നാട്ടിൽ ഇനി വിദഗ്​ധ ചികിത്സക്ക്​ ലക്ഷങ്ങൾ മുടക്കേണ്ടി വരും. അതിന്​ എവിടെ നിന്ന്​ പണം​കണ്ടെത്തും എന്ന ആശങ്കയിലാണ്​ ഇതുവരെ സഹായിച്ച ഖത്തർ കുമരനല്ലൂർ അറക്കൽ മഹല്ല് കമ്മിറ്റി ഭാരവാഹികൾ. എന്ത്​ വിലകൊടുത്തും നാട്ടുകാരനെ ജീവിതത്തിലേക്ക്​ തിരികെയെത്തിക്കാനുള്ള ശ്രമത്തിലാണ്​ അവർ. ​

ചൊവ്വാഴ്​ച പുലർച്ചെയോടെ കൊച്ചിയിലെത്തുന്ന മുഹമ്മദ്​ ഷാഫിയെ നേരിട്ട്​ പെരിന്തൽമണ്ണ എം.ഇ.എസ്​ ആശുപത്രിയിൽ പ്രവേശിപ്പിക്കും. ഏറ്റവും മികച്ച ചികത്സ നൽകാമെന്ന്​ ആശുപത്രി അധികൃതർ അറിയിച്ചിട്ടുണ്ട്​. 

ഖത്തറിലെയും നാട്ടിലേയും സുമനസ്സുകളുടെ സഹായം വിദഗ്​ധ ചികിത്സക്കായി ജനറൽ സെക്രട്ടറി ടി.പി മുഹമ്മദലിയും പ്രസിഡൻറ്​ ടി. അബ്​ദുറഹ്​മാനും ആവശ്യപ്പെടുന്നു. ASHARAF PEEDIKA,  Account Number : 4770-515718-001 IBAN : QA87CBQA000000004770515718001 എന്ന ബാങ്ക്​ അക്കൗണ്ടിലേക്ക്​ സഹായങ്ങൾ ആവശ്യപ്പെടുകയാണ്​ കുമരനല്ലൂർ മഹല്ല്​ കമ്മിറ്റി പ്രവർത്തകർ. വിവരങ്ങൾക്ക്​ 7020 7065 നമ്പറിൽ ബന്ധപ്പെടാം.