റിയാദ്: 2025 ജനുവരി മുതൽ ഭക്ഷ്യവസ്തുക്കൾ ഉൽപാദിപ്പിക്കുന്ന ഫാക്ടറികൾ ശീതീകരിച്ച് സൂക്ഷിക്കുന്ന (ഫ്രോസൺ) ഉൽപന്നങ്ങളുടെയും കോൾഡ് സ്റ്റോറേജിന്റെയും അനുബന്ധ സൗകര്യങ്ങളുടെയും താപനില ‘വസൽ’ പ്ലാറ്റ്‌ഫോമുമായി ബന്ധിപ്പിച്ച് അപ്ഡേറ്റ് ചെയ്യണം.
ശീതീകരിച്ച ഭക്ഷ്യ വസ്തുക്കളുണ്ടാക്കുന്ന ഫാക്ടറികൾക്കും വെയർഹൗസുകൾക്കും ഉൽപന്നങ്ങൾ കൊണ്ടുപോകുന്ന വാഹനങ്ങൾക്കും തീരുമാനം ബാധകമാകും.
ശീതീകരിച്ച ഭക്ഷ്യവസ്തുക്കളുടെ ഫാക്ടറികൾ, വെയർഹൗസുകൾ, കൊണ്ടുപോകാൻ ഉപയോഗിക്കുന്ന വാഹനങ്ങൾ എന്നിവയിലെ താപനിലയും ഈർപ്പവും അളക്കുന്ന മീറ്ററുകളെ ഓൺലൈനായി ‘വസൽ’ പ്ലാറ്റ്‌ഫോമുമായി ബന്ധിപ്പിക്കാനാണ് ഫുഡ് ആൻഡ് ഡ്രഗ് അതോറിറ്റി ഉദ്ദേശിക്കുന്നത്.
ഫുഡ് ആൻഡ് ഡ്രഗ് അഡ്മിനിനിസ്‌ട്രേഷൻ ‘എസ്റ്റിലാ’ പ്ലാറ്റ്‌ഫോമിൽ അവതരിപ്പിച്ച ഒരു പുതിയ പദ്ധതിയിലൂടെയാണ് ഇതിന് തയാറെടുക്കുന്നത്.
ഉപഭോക്തൃ ആരോഗ്യവും സുരക്ഷയും മെച്ചപ്പെടുത്തുന്നതിനുള്ള അതോറിറ്റിയുടെ ശ്രമങ്ങളുടെയും പൊതുതാൽപര്യവും പൊതുജനാരോഗ്യവും കൈവരിക്കുന്നതിന് സർക്കാർ ഏജൻസികളും സ്വകാര്യമേഖലയും തമ്മിലുള്ള സംയോജിത പ്രവർത്തനത്തിന്‍റെ ചട്ടക്കൂടിനുള്ളിലാണിത്. ഭക്ഷ്യശൃംഖലയുടെ ഘട്ടങ്ങളിൽ ഭക്ഷ്യസുരക്ഷക്ക് ഉണ്ടാകാവുന്ന അപകടസാധ്യതകളെ അടിസ്ഥാനമാക്കിയുമാണ്.
‘ശീതീകരിച്ച ഭക്ഷ്യവസ്തുക്കൾ കൊണ്ടുപോകുന്നതിനും സംഭരിക്കുന്നതിനുമുള്ള പൊതുവായ നിബന്ധനകൾ’ എന്നതിനായുള്ള സാങ്കേതിക വ്യവസ്ഥകളെ അടിസ്ഥാനമാക്കിയുള്ളതാണ് പദ്ധതി. താപനില പുറത്തുനിന്ന് എളുപ്പത്തിൽ വായിക്കാൻ കഴിയുന്ന ഒരു സ്ഥലത്തായിരിക്കണമെന്നും വ്യവസ്ഥയിലുണ്ട്.
ശീതീകരിച്ച ഭക്ഷ്യവസ്തുക്കൾ ഉണ്ടാക്കുന്ന എല്ലാ ഫാക്ടറികളോടും വെയർഹൗസുകളോടും അവയുടെ ഗതാഗത മാർഗങ്ങളോടും അതോറിറ്റി നിശ്ചയിക്കുന്ന വ്യവസ്ഥകളും താപനില സൂചിപ്പിക്കുന്ന ഇലക്ട്രോണിക് ലിങ്കേജും പൂർത്തിയാക്കാൻ ഫുഡ് ആന്‍റ് ഡ്രഗ് അതോറിറ്റി ആവശ്യപ്പെട്ടു. 2025 ജനുവരി മുതൽ ഈ മൂന്ന് വ്യവസ്ഥകളും നിർബന്ധമാവും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.