തീർഥാടകരുടെ തിരിച്ചു പോക്ക്​ തുടങ്ങി: പ്രവേശന കവാടങ്ങളിൽ വിപുലമായ ഒരുക്കം 

ജിദ്ദ: ഹജ്ജ്​ തീർഥാടകരുടെ തിരിച്ചു പോക്ക്​ തുടങ്ങി.  യാത്രാനടപടികൾ എളുപ്പമാക്കുന്നതിന്​ പ്രവേശന കവാടങ്ങളിൽ വിപുലമായ സൗകര്യങ്ങളൊരുക്കിയിട്ടുണ്ട്​. രാജ്യത്തെ വിവിധ കര,​േവ്യാമ, കടൽ പ്രവേശന കവാടങ്ങളിലാണ്​ സിവിൽ ഏവിയേഷൻ, പാസ്​പോർട്ട്​, ഹജ്ജ്​ മന്ത്രാലയം, മതകാര്യം വകുപ്പുകൾ  ഒരുങ്ങിയത്​. ജിദ്ദ വിമാനത്താവളം വഴി തിങ്കളാഴ്​ച മുതൽ തീർഥാടകരുടെ മടക്കയാത്ര ആരംഭിച്ചു​. ആദ്യദിവസം ആഭ്യന്തര തീർഥാടകരായ 15000 പേർ യാത്ര തിരിച്ചതായാണ്​ കണക്ക്​. ഇന്നലെ മുതലാണ്​ വിദേശ ഹാജിമാരെയും വഹിച്ചുള്ള വിമാനങ്ങളുടെ മടക്കയാത്ര തുടങ്ങിയത്​. ഏകദേശം 12 ലക്ഷം തീർഥാടകർ ജിദ്ദ വിമാനത്താവളം വഴി യാത്ര തിരിക്കുമെന്ന്​ സിവിൽ ഏവിയേഷൻ പബ്​ളിക്​ റിലേഷൻ മേധാവി തുർക്കി അൽദീബ്​ പറഞ്ഞു.

മുഹറം പകുതി വരെ മടക്കയാത്ര തുടരും. ഗവൺമ​െൻറ്​, സ്വകാര്യ വകുപ്പുകൾക്ക്​ കീഴിലെ 13000 പേർ തീർഥാടകരുടെ സേവനത്തിനായി രംഗത്തു​ണ്ടെന്നും അദ്ദേഹം പറഞ്ഞു. ഹജ്ജ്​ ടെർമിനലിൽ തീർഥാടകരുടെ മടക്കയാത്രക്കുള്ള ഒരുക്കങ്ങൾ സൗദി പാസ്​പോർട്ട്​ മേധാവി കേണൽ സുലൈമാൻ ബിൻ അബ്​ദുൽ അസീസ്​ അൽയഹ്​യ സന്ദർശിച്ചു വിലയിരുത്തി. 

മദീനയിലെ അമീർ മുഹമ്മദ്​ ബിൻ അബ്​ദുൽ അസീസ്​ വിമാനത്താവളത്തിലും വിപുലമായ ഒരുക്കങ്ങളാണ്​ മടക്കയാത്രക്ക്​ പൂർത്തിയാക്കിയിരിക്കുന്നത്​.  5000 പേർ സേവനത്തിനായി രംഗത്തുണ്ട്​.  സിവിൽ ഏവിയേഷൻ മേധാവി അബ്​ദുൽ ഹക്കീം ബിൻ മുഹമ്മദ്​ അൽതമീമി വിമാനത്താവളം സന്ദർശിച്ചു  ഒരുക്കങ്ങൾ  വിലയിരുത്തി.   സിവിൽ ഏവിയേഷനും അനുബന്ധ വകുപ്പുകളുകളുമായി സഹകരിച്ചു തീർഥാടകരുടെ മടക്കയാത്ര നടപടികൾക്കാവശ്യമായ കാര്യങ്ങൾ ഒരുക്കിയതായും അദ്ദേഹം പറഞ്ഞു.

മദീന വിമാനത്താവളം വഴി തിരിച്ചുപോകുന്ന തീർഥാടകർ മുൻ വർഷത്തേക്കാൾ ഏകദേശം 45 ശതമാനം കൂടുമെന്ന്​  ഒാപറേഷൻ കമ്പനി മേധാവി എൻജിനീയർ സുഫ്​യാൻ അബ്​ദുൽസലാം പറഞ്ഞു. വിമാനത്താവള സേവനവുമായ ബന്ധപ്പെട്ട മുഴുവൻ വകുപ്പുകളുമായി സഹകരിച്ചു വേണ്ട ഒരുക്കങ്ങൾ പൂർത്തിയാക്കിയിട്ടുണ്ട്​. 6,76000 തീർഥാടകർ ഇത്തവണ മദീന വിമാനത്താവളം വഴി എത്തിയിട്ടുണ്ട്​. മുൻവർഷത്തേക്കാൾ 23 ശതമാനം കൂടുതലാണിത്​. ഇന്നു മുതൽ തീർഥാടകരുടെ മടക്കയാത്ര ആരംഭിക്കുമെന്നും അദ്ദേഹം പറഞ്ഞു. കരമാർഗം തീർഥാടകരെത്തുന്ന പ്രവേശന കവാടങ്ങളിലും ആവശ്യമായ ഒരുക്കങ്ങൾ പൂർത്തിയാക്കിയിട്ടുണ്ട്​.