ഓണം ഗംഭീരമാക്കാൻ പ്രവാസികളും ഉത്രാടപ്പാച്ചിലിൽ

ദമ്മാം: മഹാമാരി കവർന്ന മൂന്ന്​​ വർഷങ്ങൾക്ക്​ ശേഷംആഘോഷിക്കാൻ കിട്ടിയ ഓണത്തെ ഗംഭീരമാക്കാനുള്ള ഓട്ടത്തിലാണ്​ പ്രവാസികൾ. ദുരിതങ്ങളുടെ കാർമേഘങ്ങൾ പെയ്തുതോർന്ന പുതിയ വർഷത്തിൽ പഴയ നഷ്​ടങ്ങളെ മുഴുവൻ നികത്തി ആഘോഷ പ്രതാപങ്ങളെ തിരിച്ച പിടിക്കാൻ പ്രവാസി സംഘടനകൾ ഒരുങ്ങികഴിഞ്ഞു. മലയാളികളുടെ ഓണാഘോഷങ്ങളെ മനസ്സറിഞ്ഞ്​ പിന്തുണച്ച്​ വമ്പൻ ഓഫറുകളുമായി ഹൈപർ, സൂപർ മാർക്കറ്റുകളും വസ്ത്രശാലകളും ഓണ ലൈൻ വ്യാപാരസംഘങ്ങളും രംഗത്ത്​ എത്തിയതോടെ നാടിനേക്കാൾ ഗരിമയിൽ ഗൾഫിലെ ഓണം കെ​​​​ങ്കേമമാകുമെന്നുറപ്പ്​.

സ്കൂൾ അവധിപ്രമാണിച്ച്​ നാട്ടിൽ പോയ കുടുംബങ്ങളിൽ മിക്കവയും സ്കുൾ തുറന്നതോടെ ഗൾഫിലേക്ക്​ തിരിച്ചെത്തിയിട്ടുണ്ട്​. നാട്ടിൽ മഴ കവർന്ന ഓണക്കാലത്തിനപ്പുറത്ത്​ ഗൾഫിലെ ചൂടു കുറഞ്ഞുവരുന്ന സുഖകരമായ കാലാവസ്ഥ ഓണാഘോഷങ്ങൾക്ക്​ അനുകൂല സാഹചര്യമാകുന്നുണ്ട്​.

വ്യാഴാഴ്ചയാണ്​ ഓണ​മെങ്കിലും അവധി ദിവസങ്ങളായ വെള്ളി, ശനി ദിവസങ്ങളിലാണ്​​ ഓണാഘോഷത്തിനായി തെരഞ്ഞെടുത്തിട്ടുള്ളത്​. ദീർഘമായ ഇടവേളക്ക്​ ശേഷമായതിനാൽ ഏതാണ്ടെല്ലാ സംഘടനകളും ആഘോഷങ്ങൾ ഒരുക്കുന്നതിനാൽ ഓണക്കാലം, കന്നി മാസം വരെ നീണ്ടു പോകുമെന്നുറപ്പാണ്​​. ഹൈപർ മാർക്കറ്റുകൾ മലയാളിക്ക്​ ഒരു കുറവും കൂടാതെ ഓണം കൂടാനുള്ള എല്ലാ വിഭവങ്ങളും നേരത്തെ തന്നെ എത്തിച്ചിട്ടുണ്ട്​. കൂടാതെ അവധി കഴി​ഞ്ഞെത്തിയ മലയാളി കുടുംബങ്ങൾ അമ്മമാർ നാട്ടിൽനിന്ന്​ തയാറാക്കിക്കൊടുത്തയച്ച ഉപ്പേരികളും ഓണാഘോഷത്തിനായി കരുതിവെച്ചിട്ടുണ്ട്​. ഓണക്കോടിയും കസവുമുണ്ടും ജുബ്ബയുമെല്ലാം കുറഞ്ഞനിരക്കിൽ ഹൈപർ മാർക്കറ്റുകളിൽ നേരത്തെ തന്നെ ഇടംപിടിച്ചിരുന്നു. ഓണക്കോടിയെടുക്കാനും ഓണവിഭവങ്ങൾ വാങ്ങാനും പലകടകൾ കയറിയിറങ്ങണ്ട എന്നതാണ്​ ഹൈപർ മാർക്കറ്റുകൾ മലയാളികൾക്ക്​ നൽകുന്ന ആശ്വാസം.

'വാഴയില' തന്നെയാണ്​ ഇത്തവണയും ഓണാഘോഷത്തിലെ പ്രധാന താരം. രണ്ട്​ റിയാൽ വരെ ഒരിലക്ക്​ വിലയുണ്ട്​. ചില ഹൈപർ മാർക്കറ്റുകൾ ഇലക്ക്​ വിലക്കിഴിവ്​ പ്രഖ്യാപിച്ചിട്ടുണ്ടെങ്കിലും ഒരാൾക്ക്​ മൂന്ന്​ ഇലയിൽ കൂടതൽ കൊടുക്കില്ലെന്നാണ്​ നിയമം. ഉപ്പേരിയും ശർക്കരപെരട്ടിയും കദളിപ്പഴവുമൊക്കെ വമ്പിച്ച വിലക്കിഴിവിൽ ലഭ്യമാണ്.​ മിക്ക സംഘടനകളും ഓണ സദ്യയുൾപ്പടെയുള്ള ഓണപ്പരിപാടികൾ ആസൂത്രണം ചെയ്തിരിക്കുകയാണ്​​. തിരുവോണ ദിവസം മലയാളികൾ അധികം ജോലിചെയ്യുന്ന പല കമ്പനികളും ഓണസദ്യകൾ സംഘടിപ്പിച്ചിട്ടുണ്ട്​. സദ്യയിലെ വിഭവങ്ങളുടെ എണ്ണത്തിലുള്ള മത്സരമാണ്​ ഹോട്ടലുകൾ തമ്മിൽ നടക്കുന്നത്​. ആഴ്ചകൾക്ക്​ മുമ്പ്​ ആരംഭിച്ച ബുക്കിങ്​ ഉത്രാട ദിവസം പൂർത്തിയാക്കി.

25 റിയാൽ മുതൽ 40 റിയാൽ വരെ വിലയാണ്​​ ഓണസദ്യക്ക്​ റസ്​റ്റോറൻറുകൾ ഈടാക്കുന്നത്​. ഓണസദ്യയുണ്ടാക്കാൻ താൽക്കാലിക പാചകക്കാരെ തേടിയും ഹോട്ടലുകാർ പരക്കം പായുകയായിരുന്നു. ഓണപ്പൂക്കളമൊരുക്കാൻ പൂക്കളൊന്നും കിട്ടാൻ സാധ്യതയില്ലാത്തതിനാൽ പതിവുപോലെ തേങ്ങാപ്പൊടിയും ഉപ്പും നിറങ്ങൾ ചേർത്ത് അതുകൊണ്ട്​ പൂക്കളം വരച്ച്​​ തൃപ്തിപ്പെടുകയാണ്​. ഇത്തവണ പലയിടത്തും പ്രത്യക്ഷപ്പെടുന്ന മാവേലി ന്യൂജൻ സ്​റ്റൈലിലാണ്​. ഓണമെത്തുന്നതിന്​ മുമ്പേ കിട്ടിയ അവധി ദിവസമെന്നനിലയിൽ കഴിഞ്ഞ വെള്ളിയാഴ്​ച ഓണാഘോഷം സംഘടിപ്പിച്ച സംഘടനകളുമുണ്ട്​. കിഴക്കൻ പ്രവിശ്യയിൽ നവോദയ അങ്ങനെ ഓണത്തിനെ ആഘോഷിച്ച്​ കയറി. ഗൃഹാതുരത്വമുള്ള ഓർമകളെ തിരസ്കരിക്കാൻ കഴിയാത്ത മലയാളിക്ക്​ പ്രവാസ മണ്ണിലും ഓണത്തെ ഗംഭീരമായി ആഘോഷിക്കാതെ വയ്യ.