ടാലന്‍റ് ടീൻസ് ജിദ്ദ സംഘടിപ്പിച്ച 'ടീൻ ടോക്സി'ൽ ആദിൽ
നസീഫ് വിദ്യാർഥികളുമായി സംവദിക്കുന്നു
ജിദ്ദ: ഇന്ത്യൻ ഇസ്‌ലാഹി സെന്റർ ജിദ്ദയുടെ വിദ്യാർഥി വിഭാഗമായ ടാലന്‍റ് ടീൻസിന്റെ നേതൃത്വത്തിൽ വിദ്യാർഥികൾക്കായി സംഘടിപ്പിച്ച 'ടീൻ ടോക്സ്' ശ്രദ്ധേയമായി. വിജ്ഞാനത്തോടൊപ്പം വിനോദവും ഉൾപ്പെടുത്തി സംഘടിപ്പിച്ച പരിപാടി കുട്ടികൾക്ക് നവ്യാനുഭവം പകർന്നു. ഇന്ത്യൻ ഇസ്‌ലാഹി സെന്റർ ഓഡിറ്റോറിയത്തിൽ നടന്ന പരിപാടിയിൽ എം.എസ്‌.എം മുൻ സംസ്ഥാന സെക്രട്ടറി ആദിൽ നസീഫ് വിദ്യാർഥികളുമായി സംവദിച്ചു.
സമകാലിക സാഹചര്യങ്ങളിൽ കുട്ടികൾ അനുഭവിക്കുന്ന പ്രശ്നങ്ങളും അവക്കുള്ള പരിഹാരങ്ങളും ഹൃദ്യവും മനോഹരവുമായ രീതിയിൽ അദ്ദേഹം അവതരിപ്പിച്ചു. കുട്ടികൾ നേരിടുന്ന വെല്ലുവിളികളെക്കുറിച്ചും പുതിയ കാലത്തെ പ്രതീക്ഷകളെക്കുറിച്ചും ചുറ്റുപാടുകളെ എങ്ങനെ നന്മയുടെ തുരുത്തുകളാക്കി മാറ്റാൻ സാധിക്കുമെന്നതിനെക്കുറിച്ചും അദ്ദേഹം സംസാരിച്ചു.
സദസ്സിൽനിന്നുള്ള ചോദ്യങ്ങൾക്ക് അദ്ദേഹം മറുപടി നൽകി. പരിപാടിയിൽ വിദ്യാർഥികൾക്കായി വിവിധ മത്സരങ്ങൾ സംഘടിപ്പിക്കുകയും വിജയികൾക്ക് സമ്മാന വിതരണവും നടത്തി. പ്രസിഡന്‍റ് ആസിഫ് അഹമ്മദ് അധ്യക്ഷത വഹിച്ചു. ടാലന്‍റ് ടീൻസ് ജനറൽ സെക്രട്ടറി ജസീൽ സ്വാഗതവും ട്രഷറർ അബ്ദുൽ ഫത്താഹ് നന്ദിയും പറഞ്ഞു. ആസിം ഖിറാഅത്ത് നടത്തി.
ടാലന്‍റ് ടീൻസ് ജിദ്ദക്ക് കീഴിൽ ടി.ടി.എഫ്.എ എന്ന പേരിൽ ഫുട്ബാൾ അക്കാദമിയും കുട്ടികൾക്കായി നീന്തൽ പരിശീലനവും നടത്തുന്നുണ്ട്. ടാലന്‍റ് ടീൻസ് ഗേൾസ് (ടി.ടി.ജെ) എന്ന പേരിൽ പെൺകുട്ടികൾക്കായി ഒരു വിങ് പ്രവർത്തിച്ചുവരുന്നു. പ്രവാസി വിദ്യാർഥികളുടെ കഴിവും കർമശേഷിയും ഉപയോഗപ്പെടുത്തി പ്രവർത്തിക്കുന്ന ടാലന്‍റ് ടീൻസുമായി സഹകരിക്കാൻ താൽപര്യമുള്ള കുട്ടികൾ കൺവീനർമാരായ പി.സി ശിഹാബ് (0507582701), സകരിയ (0504380615) എന്നിവരുമായി ബന്ധപ്പെടണമെന്നും ഭാരവാഹികൾ അറിയിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.