മടങ്ങിവരവിന്‍റെ ആഘോഷം; പുതു ചരിതമെഴുതി എജുകഫെ

ദുബൈ: മഹാമാരി തീർത്ത രണ്ടു വർഷത്തെ ഇടവേളയിൽനിന്ന്​ വിദ്യാഭ്യാസ മേഖലയുടെ മടങ്ങിവരവ്​ അടയാളപ്പെടുത്തി 'ഗൾഫ്​ മാധ്യമം'എജൂകഫെ ഏഴാം സീസണ്​​ പ്രൗഢഗംഭീര സമാപനം. അടഞ്ഞുകിടന്ന വിദ്യാലയ വാതിലുകൾ വീണ്ടും തുറന്ന​ ശേഷം നടക്കുന്ന ആദ്യ ഇന്ത്യൻ വിദ്യാഭ്യാസ കരിയർ മേളയായ എജൂകഫേയിലേക്ക്​ യു.എ.ഇയുടെ ഏഴ്​ എമിറേറ്റുകളിൽ നിന്നും ആയിരക്കണക്കിന്​ കുട്ടികളാണ് ദുബൈ ഇത്തിസാലാത്ത്​ അക്കാദമിയിലേക്ക്​​ ഒഴുകിയെത്തിയത്​. പാഠ്യേതര പ്രവർത്തനങ്ങളുമായി മുന്നോട്ടുപോകാമെന്ന ആത്മധൈര്യം പകർന്ന എജൂകഫേ, മഹാമാരിക്കു​ ശേഷമുള്ള തിരിച്ചുവരവിന്​ വഴിതെളിച്ച്​ പുതുചരിതമെഴുതിയാണ്​ സമാപിച്ചത്​. നാളെയുടെ നായകരാകാൻ കൊതിക്കുന്ന വിദ്യാർഥികൾക്ക്​ വഴികാട്ടിയാകുന്ന ഒരു ഡസനോളം സെഷനുകൾ, ആത്മധൈര്യം പകർന്ന പ്രചോദന പ്രഭാഷണങ്ങൾ, ഇഷ്ടതൊഴിൽ തേടിയുള്ള യാത്രക്ക്​ ആവശ്യമായ മാർഗനിർദേശങ്ങൾ, മക്കളുടെ ഭാവി സ്വപ്നംകാണുന്ന മാതാപിതാക്കൾക്കുള്ള ഉ​പദേശങ്ങൾ, കരിയർ വളർച്ച ആഗ്രഹിക്കുന്ന അധ്യാപകർക്കുള്ള നിർദേശങ്ങൾ, ഡിജിറ്റൽ കാലത്തെ ജോലി സാധ്യതകൾ, സൈബർ ലോകത്തെ അപകടങ്ങളും സാധ്യതകളും തുടങ്ങി വിദ്യാഭ്യാസ മേഖലയെ അടിമുടി സ്പർശിക്കുന്നതായിരുന്നു ഓരോ സെഷനും. ഇന്ത്യയിലെയും വിദേശത്തെയും സർവകലാശാലകളുടെയും വിദ്യാഭ്യാസ സ്​ഥാപനങ്ങളുടെയും പവിലിയനുകൾ വഴി ഭാവിയിലേക്കുള്ള തയാറെടുപ്പുകൾ ഇപ്പോൾതന്നെ തുടങ്ങാനുള്ള അവസരവും ഒരുക്കിയാണ്​ അറിവിന്‍റെ മഹാമേള കൊടിയിറങ്ങിയത്​.

സദസ്സിനെ കൈയിലെടുത്ത മജീഷ്യൻ ഗോപിനാഥ്​ മുതുകാടിന്‍റെ സെഷനോടെയായിരുന്നു എജൂകഫേയുടെ സമാപനം. പ്രഫഷനൽ മാജിക്കിൽനിന്ന്​ വിരമിക്കൽ പ്രഖ്യാപിച്ച മുതുകാട്​ ഇടവേളക്കു​ശേഷം മായാജാല പ്രകടനങ്ങളുമായി വേദിയിലെത്തുന്നതിനും എജൂകഫെ സാക്ഷ്യം വഹിച്ചു. കുട്ടികളിൽ ചിന്തകൾ വളർത്തിയെടുക്കാൻ എജൂകഫേക്ക്​ കഴിയുമെന്ന്​ അദ്ദേഹം പറഞ്ഞു. അധ്യാപകർ വിദ്യാർഥികളോടും രക്ഷിതാക്കൾ മക്കളോടും വാക്കുകൾ സൂക്ഷിച്ചുപയോഗിക്കണം. ചില വാക്കുകൾ വലിയ ചലനമുണ്ടാക്കും. തിരുവനന്തപുരത്തെ മാജിക്​ പ്ലാനറ്റിലെ വൈകല്യം ബാധിച്ച കുട്ടികളുടെ സംരക്ഷണത്തിനാണ്​ മാജിക്കിൽ നിന്ന്​ പിന്മാറിയത്​. അവരുടെ സുരക്ഷയാണ്​ തനിക്ക്​ മുഖ്യമെന്നും ​മുതുകാട്​ പറഞ്ഞു. പി. ഭാസ്കരന്‍റെ ആദ്യ വിദ്യാലയം എന്ന കവിതയെ ആസ്പദമാക്കിയുള്ള മാജിക് എജൂകഫേ വേദിയിലൂടെ ആദ്യമായി ലോകത്തിന്​ പരിചയപ്പെടുത്തി. മാജിക്​ പ്ലാനറ്റിലെ 20ഓളം കുട്ടികളെ ഒരു വർഷത്തേക്ക്​ ഏറ്റെടുക്കാൻ തയാറാണെന്ന്​ അറിയിച്ച്​ നിരവധി പേർ മു​ന്നോട്ടുവന്നു. എങ്ങനെ മാജിക്​ അവതരിപ്പിക്കാം എന്നും അദ്ദേഹം കുട്ടികളെ പഠിപ്പിച്ചു.

രാവിലെ നടന്ന സെഷനുകളിൽ ഡോ. ധന്യ മേനോൻ, അവെലോ റോയ്​, രാംകുമാർ കൃഷ്ണമൂർത്തി, മദീഹ അഹ്​മദ്​ തുടങ്ങിയവർ സംസാരിച്ചു. എ.പി.ജെ. അബ്​ദുൽകലാം ഇ​ന്നൊവേഷൻ അവാർഡ്​ ജേതാക്കളെ പ്രഖ്യാപിച്ചു. 'മാധ്യമം' ഗ്ലോബൽ ബിസിനസ്​ ഓപറേഷൻസ്​ ജനറൽ മാനേജർ കെ. മുഹമ്മദ്​ റഫീഖ്​, 'ഗൾഫ്​ മാധ്യമം'-മീഡിയവൺ മിഡ്​ൽ ഈസ്റ്റ്​ ഓപറേഷൻസ്​ ഡയറക്ടർ മുഹമ്മദ്​ സലീം അമ്പലൻ എന്നിവർ സമ്മാനം വിതരണം ചെയ്തു.