ദുബൈ: യു.എ.ഇയിലെ വിദ്യാലയങ്ങളിൽ ശൈത്യകാല അവധിക്ക് നാളെ മുതൽ തുടക്കമാവും. ഡിസംബർ 14 മുതൽ മൂന്ന് ആഴ്ചയാണ് അവധി. ഷാർജയിലെ വിദ്യാലയങ്ങളിൽ ശൈത്യകാല അവധി തുടങ്ങുന്നത് ഡിസംബർ 19 മുതലാണ്. രണ്ട് ആഴ്ച മാത്രം അവധി ലഭിക്കുന്ന ചില വിദ്യാലയങ്ങളുമുണ്ട്. ശൈത്യകാല അവധിക്കുശേഷം 2025 ജനുവരി ആറിന് സ്കൂളുകൾ തുറക്കും.
ഏഷ്യൻ പാഠ്യപദ്ധതിയിലുള്ള സ്കൂളുകളുടെ രണ്ടാം പാദത്തിന്‍റെ അവസാനവും ഏഷ്യൻ ഇതര പാഠ്യപദ്ധതിയിലുള്ള സ്കൂളുകളുടെ ആദ്യ പാദത്തിന്‍റെ അവസാനവും ഈ മാസമാണ്. ഏഷ്യൻ പാഠ്യപദ്ധതിയിലുള്ള വിദ്യാലയങ്ങളിൽ കലാ കായിക മത്സരങ്ങളും പഠനയാത്രകളും ആഘോഷ പരിപാടികളുമൊക്കെ ഈ പാദത്തിലാണ് നടന്നത്. കഴിഞ്ഞ വർഷങ്ങളിൽ ജനുവരി രണ്ടിനാണ് ശൈത്യകാല അവധിക്കുശേഷം വിദ്യാലയങ്ങൾ തുറന്നിരുന്നത്. അതിനാൽ പുതുവർഷം ആഘോഷിക്കുന്നവർക്ക് പങ്കെടുക്കാൻ സാധിച്ചിരുന്നില്ല. 2025 ജനുവരി ആറു മുതലാണ് ഏഷ്യൻ സ്കൂളുകളിൽ മൂന്നാം പാദത്തിന്‍റെ ആരംഭം. വാർഷിക പരീക്ഷകളും സി.ബി.എസ്.ഇ, കേരള ബോർഡ് പരീക്ഷകളും നടക്കുക അധ്യയന വർഷത്തിലെ അവസാനത്തിലെ ഈ പാദത്തിലാണ്.
ഫെബ്രുവരി 15നാണ് സി.ബി.എസ്.ഇ ബോർഡ് പരീക്ഷകൾക്ക് തുടക്കമാവുക. ജനുവരി മാസത്തിൽ 12ാം ക്ലാസുകളിലെ പ്രായോഗിക പരീക്ഷകൾ നടക്കും. അവധിക്കാലത്ത് അധ്യാപകർക്കും ഇതര ജീവനക്കാർക്കും രണ്ടാഴ്ചത്തെ അവധി മാത്രമാണ് ലഭിക്കുക. അധ്യാപകർക്ക് ഒരാഴ്ച അധ്യാപക പരിശീലനങ്ങൾ നടക്കും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.