ലോകത്തിലെ ആദ്യ ഇൻഡോർ ഫുട്​ബാൾ വിനോദപാർക്ക്​ തുറന്നു

ദുബൈ: ​ലോകോത്തര ഫുട്​ബാളി​െൻറ വിസ്​മയ ലോകത്തേക്ക്​ ആരാധകരെയും കുട്ടികളെയും മുതിർന്നവരെയും കൂട്ടിക്കൊണ്ടുപോകുന്ന '​ഫുട്​ലാബ്​' ദുബൈയിൽ തുറന്നു.ഫ​ുട്​ബാളിനൊപ്പം മറ്റ്​ വിനോദങ്ങളും ഒരു കുടക്കീഴിൽ അണിനിരക്കുന്ന ലോകത്തിലെ ആദ്യ അന്താരാഷ്​ട്ര ഇൻഡോർ ഫുട്​ബാൾ വേദിയാണ്​ ദുബൈയിൽ തുറന്നത്​. നിർമിത ബുദ്ധിയുടെ സഹായത്തോടെയാണ്​ പ്രവർത്തനം.

ഫുട്​ബാൾ ഗ്രൗണ്ടിന്​ പുറമെ അമ്യൂസ്​മെൻറ്​ പാർക്കിന്​ സമാനമായ വിനോദോപാധികളും ഫിറ്റ്​നസ്​ സെൻററുകളും കുട്ടികളുടെ പരിശീലന കേന്ദ്രങ്ങളുമെല്ലാം അണിനിരക്കുന്നു എന്നതാണ്​ ഏറ്റവും വലിയ പ്രത്യേകത. യൂറോ കപ്പി​െൻറ ആരവങ്ങളിലേക്ക്​ ആവേശം വിതറുന്നതിന്​ ഫുട്​ലാബി​െൻറ ഉദ്​ഘാടനം മുൻ പോർച്ചുഗീസ്​ താരം റൂയി കോസ്​റ്റ നിർവഹിച്ചു. കോസ്​റ്റയുടെ നേതൃത്വത്തിലാണ്​ ഫുട്​ലാബ്​ തുടങ്ങിയത്​.

ദുബൈ സ്​പോർട്​സ്​ സിറ്റിയിലെ 2000 ചതുരശ്ര മീറ്ററിലാണ്​ ഫുട്​ലാബ്​ തുറന്നത്​. സ്​ട്രീറ്റ്​ സോക്കർ, ഫുട്​വോളി, ഫൈവ്​സ്​ ഫുട്​ബാൾ ഗ്രൗണ്ട്​, സ്​കിൽ പരിശീലിക്കാനുള്ള സൗകര്യം എന്നിവ ഇവിടെയുണ്ട്​. ഞായർ മുതൽ ബുധൻ വരെ രാവിലെ പത്ത്​ മുതൽ രാത്രി പത്ത്​ വരെയും ബാക്കി ദിവസങ്ങളിൽ രാവിലെ പത്ത്​ മുതൽ രാത്രി ഒരു മണി വരെയും തുറന്നിരിക്കും.

നിർമിത ബുദ്ധിയുടെ സഹായത്തോടെയാണ്​ ഫുട്​ബാൾ സ്​കിൽ പരിശീലനം.പെനാൽറ്റിയും ഫ്രീക്കിക്കും ഇങ്ങനെ ഗോൾവല ലക്ഷ്യമിട്ട്​ ഷൂട്ട്​ ചെയ്യാം. വമ്പൻ മൈതാനങ്ങളിലേക്ക്​ താരങ്ങൾ ഇറങ്ങിവരുന്ന ചാമ്പ്യൻസ്​ ടണലും നിർമിത ബുദ്ധിയുടെ സഹായത്തോടെ സ്​ഥാപിച്ചിരിക്കുന്നു. ആരവങ്ങൾക്ക്​ നടുവിലൂടെ ഇറങ്ങിവരുന്ന പ്രതീതി കുട്ടികൾക്കടക്കം വേറിട്ട അനുഭവമാകും. കുട്ടികൾ, കൗമാരക്കാർ, മുതിർന്നവർ, സുഹൃത്തുക്കൾ, കുടുംബങ്ങൾ, സ്​ഥാപനങ്ങൾ, സംഘടനകൾ തുടങ്ങിയവർക്ക്​ ഒരുമിച്ച്​ കായിക പ്രവർത്തനങ്ങളിൽ ഏർപ്പെടാൻ കഴിയും.

തങ്ങളുടെ ആദ്യ അന്താരാഷ്​ട്ര ഫുട്​ലാബിന്​ ഏറ്റവും അനുയോജ്യമായ വേദിയാണ്​ ദുബൈ എന്ന്​ റൂയി കോസ്​റ്റ പറഞ്ഞു. ഫുട്​ബാൾ എ​െൻറ ജീവിതമാണ്​. ഫുട്​ബാളിനോടുള്ള എ​െൻറ സ്​നേഹം പങ്കിടാൻ കഴിയുന്ന ഏറ്റവും മികച്ച നഗരമാണ്​ ദുബൈ. എല്ലാ പ്രായത്തിലുമുള്ള ഫുട്​ബാൾ താരങ്ങളെ വളർത്തുക എന്നതാണ്​ പ്രധാന ലക്ഷ്യം. പ്രഫഷനൽ ആകാതെ ഫുട്​ബാളി​െൻറ സൗന്ദര്യം ആസ്വദിക്കാൻ കഴിയുന്നു എന്നതാണ്​ ഫുട്​ലാബി​െൻറ പ്രത്യേകത.

നിങ്ങളുടെ കായികക്ഷമത അളക്കാനും ഏതൊക്കെ മേഖലകളിലാണ്​ മെച്ചപ്പെടേണ്ടത്​ എന്ന്​ വ്യക്​തമാക്കാനും ഇവിടെയുള്ള കൃത്രിമ ബുദ്ധി സഹായിക്കുമെന്നും അദ്ദേഹം കൂട്ടിച്ചേർത്തു. കുട്ടികളുമായി ഫുട്​വോളി കളിക്കാനും അദ്ദേഹം സമയം കണ്ടെത്തി.ഇത്​ ദുബൈയുടെ പുതിയ വിനോദ സഞ്ചാര ലക്ഷ്യസ്​ഥാനമാണെന്ന്​ ഫുട്​ലാബ്​ മാനേജിങ്​ ഡയറക്​ടർ ഹുസൈൻ മുറാദ്​ പറഞ്ഞു. യു.എ.ഇയിലെ എല്ലാ സമൂഹങ്ങളെയും ഇവിടേക്ക്​ ക്ഷണിക്കുന്നുവെന്നും അദ്ദേഹം അറിയിച്ചു.