ന്യൂഡൽഹി: നോയിഡയിൽ പ്രായപൂർത്തിയാകാത്തയാൾ ഓടിച്ച വാഹനമിടിച്ച് സ്ത്രീ കൊല്ലപ്പെട്ടു. എസ്.യു.വി നിയന്ത്രണംവിട്ടാണ് അപകടമുണ്ടായത്. ഇതിന്റെ സി.സി.ടി.വി ദൃശ്യങ്ങളും പുറത്ത് വന്നിട്ടുണ്ട്. അപകടത്തിന് പിന്നാലെ കൗമാരക്കാരനെ പൊലീസ് കസ്റ്റഡിയിലെടുത്തു.
ട്രാക്ടറിനെ മറികടക്കാൻ ശ്രമിക്കുന്നതിനിടെയാണ് അപകടമെന്നാണ് സി.സി.ടി.വി ദൃശ്യങ്ങളിൽ നിന്നും വ്യക്തമാകുന്നത്. വാഹനം നിയന്ത്രണംവിട്ട് സ്ത്രീയുടെ മേലേക്ക് ഇടിച്ച് കയറുകയായിരുന്നു. അപകടമുണ്ടായ ഉടൻ കൗമാരക്കാരൻ പ്രദേശത്ത് നിന്നും ഓടിരക്ഷപ്പെട്ടു. നോയിഡയിലെ ബിസറാക്കിലെ സി.ആർ.സി സൊസൈറ്റിയിലാണ് അപകടമുണ്ടായത്.
സംഭവത്തിന് പിന്നാലെ തന്നെ പൊലീസ് അപകടമുണ്ടാക്കിയ വാഹനം പിടിച്ചെടുത്തു. ഡ്രൈവർക്കായി പരിശോധന നടത്തുകയും ഒടുവിൽ ഇയാളെ കണ്ടെത്തുകയും കസ്റ്റഡിയിലെടുക്കുകയുമായിരുന്നു.
പൂണെയിൽ കൗമാരക്കാരൻ ഓടിച്ച വാഹനമിടിച്ച് ഐ.ടി പ്രൊഫഷണലുകൾ കൊല്ലപ്പെട്ടതിന് പിന്നാലെ സമാനമായ നിരവധി സംഭവങ്ങൾ ആവർത്തിച്ചിരുന്നു. മെയ് 19നാണ് പൂണെയിൽ കൗമാരക്കാൻ ഓടിച്ച വാഹനമിടിച്ച് രണ്ട് ഐ.ടി പ്രൊഫഷണലുകൾ മരിച്ചിരുന്നു.
പോർഷെ കാറിടിച്ചായിരുന്നു അപകടം. റിയൽ എസ്റ്റേറ്റ് ഡെവലപ്പറുടെ മകനായ പ്രതിക്ക് വേണ്ടി പൊലീസ് നടത്തിയ ഇടപെടലുകൾ വിവാദമായിരുന്നു. പിന്നീട് പൊതുജനങ്ങളുടെ ഭാഗത്ത് നിന്ന് വലിയ പ്രതിഷേധമുണ്ടായതോടെയാണ് കേസിൽ പൊലീസ് ശക്തമായ നടപടികൾ സ്വീകരിച്ചത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.