ഡിസം​ബർ അവസാനത്തോടെ എല്ലാ മുതിർന്ന പൗരൻമാർക്കും വാക്​സിൻ നൽകുമെന്ന്​ കേന്ദ്രം

ന്യൂഡൽഹി: രാജ്യത്തെ എല്ലാ മുതിർന്ന പൗരൻമാർക്കും ഡിസംബർ അവസാനത്തോടെ കോവിഡ്​ പ്രതിരോധ വാക്​സിൻ നൽകുമെന്ന്​ കേന്ദ്രം. ലക്ഷ്യം കൈവരിക്കാൻ സാധിക്കുമെന്ന ആത്മവിശ്വാസം പ്രകടിപ്പിച്ച ദേശീയ വിദഗ്​ധ സംഘത്തിന്‍റെ തലവനായ ഡോ. എൻ.കെ. അറോറ വരും മാസത്തിൽ വാക്​സിൻ വിതരണത്തിൽ വലിയ വർധനയുണ്ടാകുമെന്നും പറഞ്ഞു.

വാക്​സിനേഷൻ നിരക്ക്​ ഉയർത്തുന്നതിനായി സംസ്​ഥാനങ്ങൾ വാക്​സിൻ വിതരണ കേന്ദ്രങ്ങൾ വർധിപ്പിക്കണം. വാക്​സിനുകളുടെ ലഭ്യത ക്രമേണ വർധിപ്പിച്ചതായും ഡോ. അറോറ എൻ.ഡി.ടി.വിയോട്​ പറഞ്ഞു.

'ജൂൺ, ജൂലൈ മാസങ്ങളിൽ വാക്​സിനേഷനിൽ വർധനയുണ്ടായി. മേയിൽ രാജ്യത്തിന്​ ലഭിച്ചത്​ 5.6 കോടി ഡോസ്​ വാക്​സിനായിരുന്നു. ഇപ്പോൾ 10 മുതൽ 12 കോടിവരെ വാക്​സിൻ ഡോസുകൾ ലഭിക്കുന്നുണ്ട്​. വരും മാസങ്ങളിൽ അവ 16 മുതൽ 18 ​േകാടിയായി ഉയരും. സെപ്​തംബർ മുതൽ 30 കോടിയിലധികം ​വാക്​സിൻ ഡോസുകൾ ലഭിക്കും' -അദ്ദേഹം പറഞ്ഞു.

വാക്​സിൻ ലഭ്യമാകുമെങ്കിലും വിതരണ കേന്ദ്രങ്ങളുടെ അഭാവം പ്രതികൂലമാകും. അവ സംസ്​ഥാനങ്ങളുടെ ഉത്തരവാദിത്തമാണ്. രാജ്യമെമ്പാടും സർക്കാർതലത്തിൽ 75,000 മുതൽ ലക്ഷം വരെ വാക്​സിനേഷൻ കേന്ദ്രങ്ങളൊരുക്കുകയാണ്​ ലക്ഷ്യം. എന്നാൽ ഇപ്പോൾ സംസ്​ഥാനങ്ങളുടെ പ്രവർത്തനം പരിമിതമാണ്​. വാക്​സിൻ ലഭ്യതയുടെ അടിസ്​ഥാനത്തിൽ വിതരണകേന്ദ്രങ്ങളും വർധിപ്പിക്കണം -അദ്ദേഹം പറഞ്ഞു.

മൂന്നുദിവസമായി രാജ്യത്ത്​ കോവിഡ്​ ബാധിതരുടെ എണ്ണം ഉയർന്നുവരുന്നുണ്ട്​. 56 ദിവസത്തെ താഴ്​ചക്ക്​ ശേഷമാണ്​ കോവിഡ്​ ബാധിതരുടെ എണ്ണം ഉയരുന്നത്​. ജൂലൈ എട്ടിന്​ 11 സംസ്​ഥാനങ്ങളിൽ കോവിഡ്​ കേസുകളുടെ വർധന രേഖപ്പെടുത്തിയതായും അറോറ കൂട്ടി​േച്ചർത്തു.