പെൻഷൻ അക്കൗണ്ടിലെ '52 കോടി' ബാലൻസി​ൽ ഞെട്ടി കർഷകൻ; ഈ കുടുംബത്തിന്​ സർക്കാരിനോട്​ ഒരു അഭ്യർഥന മാത്രം

ന്യൂഡൽഹി: നിങ്ങളുടെ ബാങ്ക്​ അക്കൗണ്ടിൽ പെട്ടന്നൊരു ദിവസം കോടികൾ നിക്ഷേപമായെത്തിയാൽ എന്തു​െചയ്യും? ബിഹാറിലെ ഒരു കർഷകന്​ തന്‍റെ പെൻഷൻ അക്കൗണ്ടിൽ എത്തിയത്​ 52 കോടി രൂപയായിരുന്നു. അക്കൗണ്ട്​ ബാലൻസ്​ കണ്ട്​ ഞെട്ടിയെങ്കിലും 'ഈ തുകയിൽ നിന്ന്​ കുറച്ച്​ ഞങ്ങൾക്ക്​ നൽകണം, ജീവിതകാലം മുഴുവൻ സന്തോഷമായി ജീവിച്ചോളാം' എന്നാണ്​ സർക്കാറിനോട്​ ഈ കർഷകന്‍റെ അഭ്യർഥന.

മുസഫർപുർ ജില്ലയിലെ കാത്തിഹാർ പൊലീസ്​ സ്​റ്റേഷൻ പരിധിയിലെ ഗ്രാമവാസിയാണ്​ രാം ബഹദൂർ ഷാ. തന്‍റെ പെൻഷൻ തുക പരിശോധിക്കാൻ തൊട്ടടുത്ത കസ്റ്റമൻ സർവിസ്​ പോയിന്‍റിൽ എത്തിയതായിരുന്നു ഈ കർഷകൻ. ആധാർ കാർഡും കൈയടയാളവും നൽകിയതോടെ ബാങ്ക്​ ബാലൻസ്​ കണ്ട് ബഹദൂർ ഷായും സി.എസ്​.പി ഓഫിസറും ഒരേപോലെ ​െഞട്ടി. 52കോടി രൂപയായിരുന്നു അക്കൗണ്ട്​ ബാലൻസ്​.

തുക കേട്ടതോടെ ഞെട്ടിപ്പോയെന്നും എവിടെനിന്നാണ്​ ഈ തുക അക്കൗണ്ടിലെത്തിയതെന്ന്​ അറിയില്ലെന്നും വൃദ്ധൻ പറയുന്നു. 'ഞങ്ങളുടെ ജീവിതം കൃഷിക്കായി സമർപ്പിച്ചു. എനിക്ക്​ സർക്കാരിനോടുള്ള അഭ്യർഥന ഈ തുകയിൽ കുറച്ച്​ ഞങ്ങൾക്ക്​ നൽകണം, ജീവിതകാലം മുഴുവൻ സന്തോഷമായി ജീവിച്ചോളാം' -ബഹദൂർ ഷാ പറയുന്നു.

തന്‍റെ പിതാവിന്‍റെ അക്കൗണ്ടിൽ 52 കോടിയിലധികം രൂപ നിക്ഷേപമായെത്തിയതായി സുജിത്​ കുമാർ ഗുപ്​തയും പറഞ്ഞു. 'ഈ തുക എത്തിയതിൽ ആശങ്കയുണ്ട്​. എങ്കിലും ഞങ്ങളൊരു കർഷക കുടുംബവും പാവപ്പെട്ടവരുമായതിനാൽ കുറച്ചുതുക ഞങ്ങൾക്ക്​ നൽകണമെന്നാണ്​ സർക്കാരിനോടുള്ള അഭ്യർഥന' -സുജിത്​ കുമാർ ഗുപ്​ത പറഞ്ഞു.

സംഭവത്തിൽ പൊലീസ്​ കേസ്​ രജിസ്റ്റർ ചെയ്​തു. 'പ്രാദേശിക അധികാരി​കളെ വിവരം അറിയിച്ചിട്ടുണ്ട്​. സംഭവത്തിൽ അന്വേഷണം ആരംഭിച്ചു. കർഷക​ന്‍റെ പെൻഷൻ അക്കൗണ്ടുള്ള ബാങ്കിലെ ഓഫിസറെ ചോദ്യം ചെയ്യുകയും ചെയ്യും' -സബ്​ ഇൻസ്​പെക്​ടർ മനോജ്​ പ​ണ്ഡേർ പറഞ്ഞു.

ബിഹാറിലെ ജനങ്ങളുടെ ബാങ്ക്​ അക്കൗണ്ടിൽ ആദ്യമായല്ല വൻതുക ഇത്തരത്തിൽ നിക്ഷേപിക്കുന്നത്​. കാത്തിഹാർ ജില്ലയിലെ രണ്ടു സ്​കൂൾ വിദ്യാർഥികളുടെ അക്കൗണ്ടിലേക്ക്​ 900 കോടി രൂപ എത്തിയിരുന്നു. കൂടാതെ കഗാരിയ സ്വദേശിയുടെ അക്കൗണ്ടിൽ 1.16ലക്ഷം രൂപയും നിക്ഷേപമായെത്തിയിരുന്നു. പ്രധാനമന്ത്രി നരേന്ദ്രമോദിയുടെ സാമ്പത്തിക സഹായം ലഭിച്ചതാണെന്ന്​ ചൂണ്ടിക്കാട്ടി തുക തിരിച്ചുനൽകാൻ ഇയാൾ വിസമ്മതിച്ചിരുന്നു.