യു.പിയിൽ ക്രിസ്​ത്യാനികൾക്ക്​ നേരെ അക്രമം: വി.എച്ച്​.പിക്കെതിരെ പരാതിയുമായി നേതാക്കൾ

ഷാജഹാൻപൂർ (ഉത്തർപ്രദേശ്​): പ്രാർഥന ചടങ്ങിനിടെ അതിക്രമിച്ചു കയറി മർദിക്കുകയും ജയ്​ശ്രീറാം വിളിപ്പിക്കുകയും ചെയ്​ത സംഭവത്തിൽ വിശ്വഹിന്ദു പരിഷത്ത് (വി.എച്ച്​.പി) പ്രവർത്തകർക്കെതിരെ കേസെടുക്കണമെന്നാവശ്യ​പ്പെട്ട്​ ക്രിസ്ത്യൻ നേതാക്കൾ ജില്ല പോലീസ് മേധാവിയെ കണ്ടു. 20 ഓളം വരുന്ന സംഘമാണ്​ കഴിഞ്ഞ ദിവസം പ്രാർഥന കേന്ദ്രത്തിൽ അതിക്രമിച്ചു കയറി സ്​ത്രീകളും കുട്ടികളുമടക്കമുള്ളവരെ ക്രൂരമായി മർദിച്ചത്​. എന്നാൽ, മർദനമേറ്റവർക്കെതിരെയാണ്​ പൊലീസ്​ കേസെടുത്തത്​. ലൗ ജിഹാദിന്‍റെ പേരിൽ പുതുതായി ഉണ്ടാക്കിയ മതംമാറ്റ നിരോധന നിയമപ്രകാരമാണ്​ പ്രാർഥനക്ക്​ നേതൃത്വം കൊടുത്ത പാസ്റ്റർ അടക്കമുള്ളവർക്കെതിരെ കേസെടുത്തത്​.

'സ്വർഗ് കാ ശുഭ്​ സമാചാർ' എന്ന പേരിൽ നടന്ന ചടങ്ങിലേക്ക്​ വി.എച്ച്.പി നേതാവ് രാജേഷ് അവസ്തി, ശ്യാം മിശ്ര, ബജ്​റംഗ്​ ദൾ സിറ്റി കൺവീനർ രാം ലഖൻ വർമ തുടങ്ങിയവരുടെ നേതൃത്വത്തിലുള്ള സംഘമാണ്​ ആയുധങ്ങളുമായി എത്തി അക്രമം അഴിച്ചുവിട്ടത്​. തുടർന്ന്​ പാസ്റ്റർ അടക്കമുള്ളവരെ ഇവർ പിടികൂടി പൊലീസിൽ ഏൽപ്പിക്കുകയായിരുന്നു. അക്രമികളുടെ നിർദേശപ്രകാരം പൊലീസ്​ ഏകപക്ഷീയമായി ക്രസ്​തുമത വിശ്വാസികൾക്കെതിരെ കേസെടുക്കുകയായിരുന്നുവെന്ന്​ ഷാജഹാൻപൂർ എസ്.പി ആനന്ദിന്​ നൽകിയ പരാതിയിൽ ക്രിസ്​ത്യൻ നേതാക്കൾ ചൂണ്ടിക്കാട്ടി. സംഭവത്തിൽ നിഷ്​പക്ഷമായ അന്വേഷണം നടത്തണമെന്നും കുറ്റക്കാർക്കെതിരെ നടപടിയെടുക്കണമെന്നും ഇവർ ആവശ്യപ്പെട്ടു. ഇക്കാര്യം അന്വേഷിച്ചുവരികയാണെന്നും വസ്തുതകൾ അടിസ്​ഥാനമാക്കി നടപടിയെടുക്കുമെന്നും എസ്.പി ആനന്ദ് പറഞ്ഞു.

കഴിഞ്ഞ ഞായറാഴ്​ചയാണ്​ കേസിനാസ്​പദമായ സംഭവം. പ്രാർഥനക്കെത്തിയ സ്​ത്രീകളും കുട്ടികളുമടങ്ങുന്ന വിശ്വാസികളെ മർദിച്ച്​ തെരുവിലൂടെ വലിച്ചിഴക്കുകയായിരുന്നു​. ആക്രമണത്തിൽ നേഹ എന്ന സ്​ത്രീക്ക്​ കൈക്കും നൈന എന്ന പതിനാലുകാരിക്ക് കാലിനും ഒടിവുണ്ട്​. ജയ്​ ശ്രീറാം വിളിക്കണമെന്നും യേശു ​ക്രിസ്​തുവിനെ നിന്ദിക്കണമെന്നും ആവശ്യപ്പെട്ട അക്രമികൾ അല്ലെങ്കിൽ കൊല്ലുമെന്ന്​ ഭീഷണിപ്പെടുത്തുകയും ചെയ്​തിരുന്നു.

തുടർന്ന്​ ബജ്​റം​ഗ്​ദൾ, വി.എച്ച്​.പി നേതാക്കളുടെ പരാതിയിൽ പൊലീസ്​ വിവാദ നിയമപ്രകാരം കേസ്​ രജിസ്​റ്റർ ചെയ്യുകയായിരുന്നു. തമിഴ്​നാട്ടുകാരനായ പാസ്​റ്റർ ഡേവിഡ്​, കന്യാകുമാരിയിൽ നിന്ന്​ അദ്ദേഹത്തെ കാണാൻ വന്ന ജഗൻ, അവർ താമസിച്ച കെട്ടിടത്തി​െൻറ ഉടമകൾ എന്നിവർക്കെതിരെയാണ്​ കേസെടുത്തത്​​.