ജയിലുകളിൽ കോവിഡ്​ മാർഗനിർദേശങ്ങൾ: അറസ്​റ്റുകൾ പരമാവധി ഒഴിവാക്കുക; ജാമ്യവും പരോളും പരിഗണിക്കുക

ന്യൂഡൽഹി: കോവിഡ്​ രണ്ടാം തരംഗത്തി​െൻറ പശ്ചാത്തലത്തിൽ ഏഴ്​ വർഷം തടവില്ലാത്ത കേസുകളിൽ അറസ്​റ്റുകൾ പരാമവധി ഒഴിവാക്കാനും തടവ്​ പുള്ളികൾക്ക്​ പരോളും ഇടക്കാല ജാമ്യവും അനുവദിച്ച്​ ജയിലുകളിൽ തിരക്ക്​ കുറക്കാനുമുള്ള മാർഗനിർദേശങ്ങൾ സുപ്രീംകോടതി പുറപ്പെടുവിച്ചു. ചീഫ്​ ജസ്​റ്റിസ്​ എൻ.വി. രമണ, ജസ്​റ്റിസുമാരായ എൽ. നാഗേശ്വര റാവു, സൂര്യകാന്ത്​ എന്നിവരടങ്ങുന്ന ബെഞ്ചാണ്​ സ്വമേധയാ എടുത്ത കോവിഡ്​ കേസിൽ മാർഗനിർദേശങ്ങൾ പുറപ്പെടുവിച്ചത്​.

അറസ്​റ്റി​െൻറ കാര്യത്തിൽ അർ​ണേഷ്​ കുമാർ കേസിൽ സുപ്രീംകോടതി പുറപ്പെടുവിച്ച മാനദണ്ഡങ്ങൾ കോവിഡ്​ പശ്ചാത്തലത്തിൽ ബാധകമാക്കുകയാണെന്ന്​ കോടതി വ്യക്​തമാക്കി. മുൻ ഉത്തരവ്​ പ്രകാരം സംസ്​ഥാനങ്ങളും കേന്ദ്ര ഭരണപ്രദേശങ്ങളും ഉണ്ടാക്കിയ ഉന്നതതല സമിതികൾ കഴിഞ്ഞ വർഷത്തെ മാർഗനിർദേശങ്ങളു​െട അടിസ്​ഥാനത്തിൽ തടവുപുള്ളികളുടെ മോചനം പരിഗണിക്കണം. കഴിഞ്ഞ വർഷം മോചിപ്പിച്ച മുഴുവൻ തടവുകാരെയും ഈ വർഷവും മോചിപ്പിക്കുന്നത്​ പരിഗണിക്കണം. അതിനായി പ്രത്യേക അപേക്ഷ നൽകേണ്ടതില്ല. കഴിഞ്ഞ വർഷം വിട്ടയച്ച 90 ശതമാനത്തിലേറെ പേരും തിരിച്ചുവന്നതായി സുപ്രീംകോടതി ചൂണ്ടിക്കാട്ടി. നേരത്തെ സുപ്രീംകോടതി ഉത്തരവ്​ പ്രകാരം പരോൾ ലഭിച്ചവർക്ക്​ 90 ദിവസത്തെ പരോൾകൂടി അനുവദിക്കണം. അതേസമയം, ജയിലിൽനിന്ന്​ പുറത്തിറങ്ങാൻ ആഗ്രഹിക്കാത്ത ജയിൽപുള്ളികളുടെ അസാധാരണ കേസുകളിൽ അവരുടെ ആശങ്കകൾ പരിഗണിക്കണമെന്നും കോടതി ആവശ്യപ്പെട്ടു.

വൈറസ്​ പടരാനുള്ള സാധ്യത ഭയന്നും സാമൂഹികസ്​ഥിതി ഓർത്തും ജയിൽ തന്നെ സുരക്ഷിതമാണെന്ന്​ കരുതുന്ന തടവുപുള്ളികളുടെ കാര്യത്തിൽ അവരുടെ ആശങ്ക പരിഗണിക്കണമെന്ന്​ സുപ്രീംകോടതി ചുണ്ടിക്കാട്ടി. ഉന്നത സമിതി ഓരോ ജയിലി​െൻറ ശേഷിയും അതിൽ നിലവിലുള്ള തടവുകാരുടെ എണ്ണവും സംബന്ധിച്ച വിവരങ്ങൾ പരസ്യപ്പെടുത്തണം. ജയിലുകളിലെ തിരക്ക്​ ഇന്ത്യപോലുള്ള രാജ്യങ്ങളിൽ വലിയ പ്രശ്​നമാണെന്ന്​ ബെഞ്ച്​ ചൂണ്ടിക്കാട്ടി. തടവിലുള്ളവർക്ക്​ ചികിത്സാസൗകര്യങ്ങൾ ലഭ്യമാക്കണം. ജയിലുകളിൽ തടവുകാരുടെയും ജീവനക്കാരുടെയും കോവിഡ്​ പരിശോധന പതിവായി നടത്തണം.

ഉദ്യോഗസ്​ഥർക്ക്​ കോവിഡ്​ പകരാതിരിക്കാൻ പ്രതികൾക്ക്​ കൈയാമം വെക്കാൻ അനുവദിക്കണമെന്ന്​ അറ്റോണി ജനറൽ കെ.കെ. വേണുഗോപാലും സോളിസിറ്റർ ജനറൽ തുഷാർ മേത്തയും ആവശ്യപ്പെ​ട്ടെങ്കിലും അത്​ പിന്നീട്​ പരിഗണിക്കാനായി മാറ്റി.