ന്യൂസ്​ ക്ലിക്ക്​ എഡിറ്ററെ ആഗസ്​റ്റ്​​ അഞ്ച്​ വരെ അറസ്റ്റ്​ ചെയ്യരുതെന്ന്​ ഡൽഹി ഹൈകോടതി

ന്യൂഡൽഹി: വിദേശ ധനസഹായം സംബന്ധിച്ച്​ ഡൽഹി പൊലീസ്​ രജിസ്​റ്റർ ചെയ്​ത കേസിൽ ന്യൂസ്​ പോർട്ടലായ 'ന്യൂസ്‌ ക്ലിക്കി'ന്‍റെ എഡിറ്ററും ഉടമയുമായ പ്രഭിർ പുർകായസ്തയെ ആഗസ്​റ്റ്​ അഞ്ച്​ വരെ അറസ്റ്റ് ചെയ്യരുതെന്ന് ഡൽഹി ഹൈകോടതി. അന്വേഷണ ഉദ്യോഗസ്ഥരുമായി സഹകരിക്കണമെന്ന്​ 71 കാരനായ പ്രഭിറിനോട്​ ജസ്റ്റിസ് യോഗേഷ് ഖന്ന നിർദേശിച്ചു.

ന്യൂസ്‌ ക്ലിക്കിന്‍റെ ഉടമസ്​ഥരായ പി.‌പി.‌കെ ന്യൂസ്‌ ക്ലിക്ക് സ്റ്റുഡിയോ പ്രൈവറ്റ് ലിമിറ്റഡ്​ എന്ന സ്​ഥാപനം 2018- 19 സാമ്പത്തിക വർഷം അമേരിക്കയിലെ വേൾഡ് വൈഡ് മീഡിയ ഹോൾഡിംഗ്സ് എൽ‌എൽ‌സിയിൽ നിന്ന് 9.59 കോടി രൂപ വിദേശ നിക്ഷേപം (എഫ്ഡിഐ) സ്വീകരിച്ചുവെന്നാണ്​ കേസ്​. ഒരു ഡിജിറ്റൽ ഇൻഫർമേഷൻ വെബ് സൈറ്റിന്​ സ്വീകരിക്കാവുന്ന എഫ്​.​ഡി.ഐ പരിധി മൂലധനത്തിന്‍റെ 26 ശതമാനമാണെന്നും ന്യൂസ്​ ക്ലിക്​ ഇത്​ ലഘിച്ചുവെന്നും എഫ്​​.ഐ.ആറിൽ പറയുന്നു. നേരിട്ടുള്ള വിദേശ നിക്ഷേപം സംബന്ധിച്ച വിവിധ നിയമങ്ങൾ ന്യൂസ്​ ക്ലിക്ക്​ ലംഘിച്ചതായും ​രാജ്യത്തിന്​ നഷ്​ടമുണ്ടാക്കിയതായും പൊലീസ്​ പറഞ്ഞു.

2009ൽ ആരംഭിച്ച ന്യസ്‌ക്ലിക്ക് ഡോട്ട്​​ ഇൻ ​രാജ്യത്തിനകത്തും പുറത്തും പ്രശസ്​തി നേടിയ വാർത്താ വെബ്​സൈറ്റാ​ണെന്ന്​ പുർകായസ്ത കോടതിയെ ബോധിപ്പിച്ചു. ''ഡിജിറ്റൽ വാർത്താ മാധ്യമങ്ങളിൽ വിദേശനിക്ഷേപത്തിന്​ 26% എന്ന നിയന്ത്രണ​ം 2019 സെപ്റ്റംബറിലാണ്​ അവതരിപ്പിച്ചത്. തങ്ങൾ നിക്ഷേപം സ്വീകരിച്ച 2018ൽ വിദേശ നിക്ഷേപത്തിന്​ സർക്കാർ നിയന്ത്രണം ഏർപ്പെടുത്തിയിട്ടി​ല്ല. ഇത്​ സംബന്ധിച്ച്​ വിവര-പ്രക്ഷേപണ മന്ത്രാലയത്തിൽ നിന്ന് തനിക്ക്​ വിശദീകരണം ലഭിച്ചിട്ടുണ്ട്​'' -അദ്ദേഹം കോടതിയിൽ അറിയിച്ചു.

ഇടതുപക്ഷ നിലപാടുള്ള വാർത്താ പോർട്ടലായ ന്യൂസ്ക്ലിക്കിൽ മുമ്പും നിരവധി തവണ എൻഫോഴ്സ്മെന്‍റ്​ ഡയറക്ടറേറ്റ് റെയ്ഡ് നടത്തിയിരുന്നു. ന്യൂസ്‍ക്ലിക്ക്​ ഓഫിസിലും പ്രഭിറിന്‍റെ വസതിയിലും ദിവസങ്ങളോളം നീണ്ട റെയ്​ഡ്​ നടത്തിയതിനെതിരെ എഡിറ്റേഴ്​സ്​ ഗിൽഡും വിവിധ പാർട്ടികളും രൂക്ഷമായ വിമർശനം ഉന്നയിച്ചിരുന്നു. ന്യൂസ്‌ക്ലിക്ക്‌ എഡിറ്റർ ഇൻ ചീഫ്‌ പ്രഭിർ പുർകായസ്ത ജെ.എൻ.യു വിദ്യാർഥിയായിരിക്കെ അടിയന്തരാവസ്ഥയിൽ തടവിലാക്കപ്പെട്ടയാളാണ്‌. പുരോഗമനപരവും സ്വതന്ത്രവുമായ ശബ്ദത്തെ അടിച്ചമർത്താനുള്ള ശ്രമമാണ് ഇഡി റെയ്ഡിലൂടെ നടക്കുന്നതെന്ന് ന്യൂസ്ക്ലിക്ക് പ്രതികരിച്ചിരുന്നു.