'നെയ്യ്​' തീവ്രവാദികളുടെ കോഡ്​ വാക്കെന്ന്​ എൻ.​െഎ.എ; തെളിവില്ലെന്നുപറഞ്ഞ്​ പ്രതികളെ വെറുതെവിട്ട്​ കോടതി

ന്യൂഡൽഹി: 'നെയ്യ്​' തീവ്രവാദികളുടെ ​കോഡ്​ വാക്കാണെന്ന്​ കോടതിയിൽ എൻ.​െഎ.എ. സ്​ഫോടകവസ്​തുക്കൾക്കാണ്​ ഗീ അഥവാ നെയ്യ്​ എന്ന്​ ഉപയോഗിക്കുന്നതെന്നായിരുന്നു എൻ.​​െഎ.എ ഡൽഹി കോടതിയിൽ വാദിച്ചത്​. 'ഖിദ്​മത്ത്​' അഥവാ ​േസവനം എന്നത്​ മറ്റൊരു കോഡ്​ വാക്കാണെന്നും, തീവ്രവാദ പരിശീലനത്തിന്​ വിധേയരായവർക്കുള്ള സേവനമാണ്​ ഇതുകൊണ്ട്​ ഉദ്ദേശിക്കുന്നതെന്നും എൻ.​െഎ.എ കോടതിയിൽ പറഞ്ഞു.

തീവ്രവാദ ഫണ്ടിങ്​ സംബന്ധിച്ച കേസ് കേൾക്കുന്ന ഡൽഹി കോടതിയിലായിരുന്നു എൻ.​െഎ.എയുടെ വാദങ്ങൾ. എന്നാൽ വാക്കുകൾക്ക് നിരവധി വ്യാഖ്യാനങ്ങൾ ഉണ്ടാകാമെന്നും ഇൗ പറഞ്ഞതൊന്നും കൃത്യമാണെന്ന്​ തെളിയിക്കാൻ പ്രോസിക്യൂഷന്​ ആയില്ലെന്നും പറഞ്ഞ കോടതി കേസിലെ നാല്​ പ്രതികളെയും വെറുതേവിട്ടു.

മൂന്ന് വർഷം മുമ്പാണ്​ കേസിന്​ ആസ്​പദമായ സംഭവം നടന്നത്​. ഹരിയാനയിലെ പൽവാൾ ജില്ലയിലെ ഉത്തവാർ ഗ്രാമത്തിലെ ഖുലഫാ എ റാഷിദീൻ മസ്​ജിദുമായി ബന്ധപ്പെട്ടാണ്​ കേസ്​ രജിസ്​റ്റർ ചെയ്​തിരിക്കുന്നത്​.​ പള്ളി അധികൃതർക്ക്​ തീവ്രവാദികളുമായി ബന്ധമുണ്ടെന്നും അനധികൃതമായി പണം വിദേശത്തുനിന്ന്​ സ്വീകരിച്ചെന്നുമാണ്​ എൻ.​െഎ.എ പറയുന്നത്​. സംഭവത്തിൽ മുഹമ്മദ് സൽമാൻ, മുഹമ്മദ് സലീം, ആരിഫ് ഗുലാം ബഷീർ ധരംപുരിയ, മുഹമ്മദ് ഹുസൈൻ മൊലാനി എന്നിവരെ അറസ്റ്റ് ചെയ്​തു.

പള്ളിയിലെ ഇമാമായ മുഹമ്മദ് സൽമാൻ പാക് ഭീകര സംഘടനയായ ഫലാ ഇ ഇൻസാനിയത്ത്​ ഫൗണ്ടേഷനിൽ നിന്ന് ഹവാലയായി ഫണ്ട് സ്വീകരിക്കുന്നതായാണ്​ എൻ.ഐ.എ വാദിച്ചത്​. ഇന്ത്യയിൽ അശാന്തി സൃഷ്ടിക്കാനും തീവ്രവാദ പ്രവർത്തനങ്ങൾ നടത്താനും പണം ഉപയോഗി​ച്ചെന്നും എൻ.​​െഎ.എ കുറ്റപത്രം പറയുന്നു. സ്ലീപ്പർ സെല്ലുകളെ സൃഷ്ടിക്കാൻ പണം ഉപയോഗി​െച്ചന്നും എൻ.​െഎ.എ വാദിച്ചിരുന്നു.

സൽമാൻ ചില 'പ്രത്യേക ആവശ്യങ്ങൾക്ക്' വേണ്ടിയാണ് ഈ ഫണ്ട് സ്വരൂപിച്ചതെന്നും ഇയാൾക്ക്​ 'വ്യത്യസ്​തമായ പദ്ധതികൾ' ഉണ്ടായിരുന്നെന്നും അന്വേഷണസംഘം കോടതിയിൽ പറഞ്ഞു. സൽമാൻ ഫോണിൽ സംസാരിക്കുന്നത് കേട്ടു എന്നുള്ള ചില സാക്ഷി മൊഴികളെയാണ് എൻഐഎ കുറ്റകൃത്യം നടന്നതിന്​ തെളിവായി ആശ്രയിച്ചത്. സൽമാൻ 'വിദേശത്ത്" ആരോടോ സംസാരിക്കുന്നത് കേട്ടുവെന്നായിരുന്നു സാക്ഷിാളുടെ വാദം. എന്നാൽ ഇൗ പറയുന്നതിനൊന്നും തെളിവില്ലെന്നും ഉൗഹങ്ങൾ മാത്രമാണെന്നും​ ചൂണ്ടിക്കാട്ടിയാണ്​ കോടതി കുറ്റാരോപിതരെ വെറുതെവിട്ടത്​.