കേരളത്തിലെ നിയമഭേദഗതി ക്രൂരം, വിയോജിപ്പുകളെ നിശബ്ദമാക്കും -പ്രശാന്ത്​ ഭൂഷൺ

ന്യൂഡൽഹി: കേരളത്തിൽ പൊലീസിന്​ അമിതാധികാരം നൽകുന്ന തരത്തിൽ സംസ്​ഥാന സർക്കാർ നടപ്പാക്കിയ പൊലീസ് ആക്​ട്​ ഭേദഗതിക്കെതിരെ കടുത്ത വിമർശനവുമായി പ്രമുഖ അഭിഭാഷകനും ജുഡീഷ്യൽ ആക്​ടിവിസ്​റ്റുമായ പ്രശാന്ത്​ ഭൂഷൺ. നിയമഭേദഗതി ക്രൂരവും വിയോജിപ്പുകളെ നിശബ്ദമാക്കാൻ ഇടയാക്കുന്നതുമാ​ണെന്ന്​ അദ്ദേഹം അഭിപ്രായപ്പെട്ടു.

''അപകീർത്തികരമെന്ന്​ കരുതുന്ന സൈബർ ഇടപെടലുകൾക്ക്​ ജയിൽ ശിക്ഷ നൽകുന്ന തരത്തിൽ കേരളം പോലീസ് നിയമത്തിൽ ഭേദഗതി വരുത്തിയിട്ടുണ്ട്. ഇത്​ ക്രൂരമായ നിയമമാണ്​. വിയോജിപ്പുകളെ നിശബ്ദമാക്കാൻ ദുരുപയോഗം ചെയ്യപ്പെടും. സുപ്രീം കോടതി റദ്ദാക്കിയ ഐടി നിയമത്തിലെ 66 എ വകുപ്പിന്​ സമാനമാണ്​ പുതിയ ഭേദഗതി'' -അദ്ദേഹം ട്വിറ്ററിൽ കുറിച്ചു.

വ്യക്​തിക​ൾക്ക്​ അപമാനകരമായ രീതിയിൽ ഏതെങ്കിലും കാര്യങ്ങൾ പ്രചരിപ്പിച്ചാൽ അ​ഞ്ച്​ വ​ർ​ഷം വ​രെ ത​ട​വ്​ ശി​ക്ഷ​യും പി​ഴ​യും ല​ഭി​ക്കും വിധമാണ്​ ഭേ​ദ​ഗ​തി​. വാ​റ​ൻ​റി​ല്ലാ​തെ​ത​ന്നെ അ​റ​സ്​​റ്റ്​ ചെ​യ്യാ​നും ഇ​നി പൊ​ലീ​സി​ന്​ ക​ഴി​യും. ച​ട്ട ഭേ​ദ​ഗ​തിയിൽ ഗ​വ​ർ​ണ​ർ ആ​രി​ഫ്​ മു​ഹ​മ്മ​ദ്​ ഖാ​ൻ ശനിയാഴ്​ച ഒ​പ്പി​ട്ടതോ​ടെ​​ നി​യ​മം പ്രാ​ബ​ല്യ​ത്തി​ലാ​യി. ഇതുസംബന്ധിച്ച വിജ്​ഞാപനവും പുറത്തിറങ്ങി.

ഭേദഗതിക്കെതിരെ വിവിധ കേന്ദ്രങ്ങളിൽനിന്ന്​ ഇതിനകം വിമർശനം ഉയർന്നിട്ടുണ്ട്​. സൈ​ബ​ർ ഇടങ്ങളിലെ അ​ധി​ക്ഷേ​പം ത​ട​യാ​ൻ എന്ന പേരിലാണ്​ നിയമഭേദഗതി കൊണ്ടുവന്നതെങ്കിലും വിജ്​ഞാപനത്തിൽ എല്ലാ തരം മാധ്യമങ്ങളെയും ഉൾപ്പെടുത്തുന്നുണ്ട്​. സൈബര്‍ മീഡിയ എന്ന് പ്രത്യേക പരാമര്‍ശമില്ല. ഇതുപ്രകാരം എത് തരം വിനിമയോപാധിയിലൂടെയുള്ള വ്യാജപ്രചാരണവും കുറ്റകരമാകും. ഇത്​ മാധ്യമസ്വാതന്ത്ര്യത്തിന്​ തന്നെ കൂച്ചുവിലങ്ങിടാൻ ഇടയാക്കുമെന്ന്​ പ്രതിപക്ഷവും നിയമ വിദഗ്​ധരും ചൂണ്ടിക്കാട്ടുന്നു. 'വ്യ​ക്തി​യെ ഭീ​ഷ​ണി​പ്പെ​ടു​ത്തു​ന്ന​തി​നോ അ​പ​മാ​നി​ക്കു​ന്ന​തി​നോ ല​ക്ഷ്യ​മി​ട്ട് ഉ​ള്ള​ട​ക്കം നി​ര്‍മി​ക്കു​ക​യോ പ്ര​ച​രി​പ്പി​ക്കു​ക​യോ ചെ​യ്യു​ന്ന​വ​ര്‍ക്ക് അ​ഞ്ചു​വ​ര്‍ഷം വ​രെ ത​ട​വോ 10,000 രൂ​പ വ​രെ പി​ഴ​യോ അ​ല്ലെ​ങ്കി​ല്‍ ര​ണ്ടും കൂ​ടി​യോ' വി​ധി​ക്കു​ന്ന​തി​നു​ള്ള വ്യ​വ​സ്ഥ​യാ​ണ് വ​കു​പ്പി​ൽ ഉ​ൾ​ക്കൊ​ള്ളി​ച്ച​ത്.