രണ്ടുദിവസം മുമ്പ്​ സഹോദരൻ മരിച്ചു, മറ്റൊരാൾ മരണകിടക്കയിൽ; കുത്തിവെപ്പ്​ നൽകാൻ ഉത്തരവില്ലെന്ന്​ ആശുപത്രി അധികൃതർ

ലഖ്​നോ: കോവിഡ്​ വ്യാപനം രൂക്ഷമായ ഉത്തർപ്രദേശിൽ സ്​ഥിതി അതീവ ഗുരുതരം. സംസ്​ഥാനത്ത്​ ആരോഗ്യ സംവിധാനങ്ങളുടെ അഭാവം പ്രതിസന്ധി രൂക്ഷമാക്കുന്നതായാണ്​ ആരോപണം.

ലഖ്​നോവിലെ കെ.ജി.എം.യു ആശുപത്രിയിലേക്ക്​ രോഗികളുടെ ഒഴുക്ക്​ തുടരുന്നതോടെ മതിയായ ചികിത്സ ഉറപ്പാക്കാൻ സാധിക്കുന്നില്ലെന്നാണ്​ പുറത്തുവരുന്ന വിവരം. രണ്ടു ദിവസം മുമ്പ്​ ഒരു സഹോദരൻ മരിക്കുകയും മറ്റൊരു സഹോദരൻ അത്യാസന്ന നിലയിലായിട്ടും ആശുപത്രി അധികൃതർ ഉത്തരവ്​ ലഭിച്ചിട്ടില്ലെന്ന കാരണത്താൽ കുത്തിവെയ്​പ്പ്​ നൽകാൻ തയാറാകുന്നില്ലെന്ന്​ പരാതി ഉയർന്നു.

'രണ്ടുദിവസം മുമ്പ്​ ഒരു സഹോദരൻ മരിച്ചു. മറ്റൊരാൾ അത്യാസന്നനിലയിലും. ആശുപത്രി അധികൃതരോട്​ സഹോദരന്​ കുത്തിവെയ്​പ്പ്​ നൽകാൻ ആവശ്യപ്പെട്ടിട്ടും തയാറായില്ല. കുത്തിവെയ്​പ്പ്​ നൽകാൻ ഉത്തരവ്​ ലഭിച്ചിട്ടില്ലെന്നാണ്​ അവർ പറയുന്നത്​' -സഹോദരനായ ഭാനു പറയുന്നു.

യു.പിയിൽ 20,000ത്തോളം പേർക്കാണ്​ പ്രതിദിനം കോവിഡ്​ സ്​ഥിരീകരിക്കുന്നത്​. 1,29,848 പേർ ഇവിടെ ചികിത്സയിലുണ്ട്​. 9480 മരണമാണ്​ യു.പിയിൽ ഇതുവരെ സ്​ഥിരീകരിച്ചത്​. അതേസമയം സർക്കാറിന്‍റെ മരണനിരക്ക്​ സംബന്ധിച്ച ഔദ്യോഗിക കണക്കുകളും ശ്​മശാനങ്ങളിൽനിന്ന്​ വരുന്ന കണക്കുകളും തമ്മിൽ വ്യത്യാസമുണ്ടെന്ന വാർത്തകൾ പുറത്തുവന്നിരുന്നു.