രണ്ടു ഡോസ്​ വാക്​സിൻ കിട്ടിയവർ 5.50 കോടി മാത്രം

ന്യൂഡൽഹി: ഇന്ത്യയിൽ ​ചുരുങ്ങിയത്​ ഒരു ഡോസ്​​ കോവിഡ്​ പ്രതിരോധ കുത്തിവെപ്പ്​​ സ്വീകരിച്ചവരുടെ എണ്ണം 31 കോടി കവിഞ്ഞു. കഴിഞ്ഞ ഒരു ദിവസം കൊണ്ട്​ 61.19 ലക്ഷം പേർ വാക്​സിൻ സ്വീകരിച്ചു. അതേസമയം, 130 കോടിയിൽപരം വരുന്ന ജനങ്ങളിൽ രണ്ടു ഡോസ്​ വാക്​സിൻ സ്വീകരിച്ചവർ 5.50 കോടി മാത്രം. ആരോഗ്യ, മുൻനിര പ്രവർത്തകർ അടക്കമാണിത്​.

18നും 44നും ഇടയിലുള്ള 7.91 കോടി പേർക്ക്​ ആദ്യ ഡോസും 17.15 ലക്ഷം പേർക്ക്​ രണ്ടാമത്തെ ഡോസും നൽകി. 45-59 പ്രായപരിധിയിലുള്ളവരുടെ കാര്യത്തിൽ ആദ്യ ഡോസ്​ ലഭിച്ചവർ 8.59 കോടി; രണ്ടു ഡോസും കിട്ടിയവർ 1.40 കോടി. 60നു മേൽ പ്രായമുള്ളവരിൽ രണ്ടു​ ഡോസും ലഭിച്ചവർ 2.29 കോടിയാണ്​. ആദ്യഡോസ്​ മാത്രം കിട്ടിയവർ 6.71 കോടി.

കഴിഞ്ഞ ഒരു ദിവസ​ത്തെ പുതിയ കോവിഡ്​ ബാധിതർ 48,698. ​മൊത്തം കോവിഡ്​ ബാധിതരുടെ എണ്ണം 5.95 ലക്ഷമായി ചുരുങ്ങി. 86 ദിവസത്തിനിടയിൽ ഇതാദ്യമാണ്​ ആറു ലക്ഷത്തിന്​ താഴേക്ക്​ ഈ കണക്ക്​ വരുന്നത്​. പുതിയ വൈറസ്​ ബാധിതരേക്കാൾ കോവിഡ്​ മുക്​തരായവരുടെ എണ്ണവും 44 ദിവസമായി ഉയർന്നു നിൽക്കുന്നു. 96.72 ശതമാനം പേരും സുഖപ്പെടുന്നു. ദേശീയ ശരാശരി പ്രകാരം പ്രതിദിന കോവിഡ്​ സ്​ഥിരീകരണ നിരക്ക്​ 2.79 മാത്രം; തുടർച്ചയായ 19 ദിവസവും അഞ്ചു ശതമാനത്തിൽ താഴെ.