മുഖർജിക്കും ദേശ്​മുഖിനും ഹസാരികക്കും ഭാരത്​ രത്​ന

ന്യൂഡൽഹി: റിപ്പബ്ലിക്​ദിനം പ്രമാണിച്ച്​ മുൻ രാഷ്​ട്രപതി പ്രണബ്​ മുഖർജി, ഭാരതീയ ജനസംഘം നേതാവ്​ നാനാജി ദേശ്​മുഖ്​, ഗായകനും ബി.ജെ.പി അനുഭാവിയുമായിരുന്ന ഭൂപൻ ഹസാരിക എന്നിവർക്ക്​ രാജ്യത്തി​​​െൻറ പരമോന്നത സിവിലിയൻ ബഹുമതിയായ ഭാരത്​ രത്​ന. നാനാജി ദേശ്​മുഖിനും ഭൂപൻ ഹസാരികക്കും മരണാനന്തര ബഹുമതിയായാണ്​ ഭാരത്​ രത്​ന സമ്മാനിക്കുന്നത്​. മോദി സർക്കാർ അധികാരത്തിൽ വന്നശേഷം മുൻ പ്രധാനമന്ത്രി വാജ്​പേയിക്ക്​ ഭാരത്​ രത്​ന സമ്മാനിച്ചിരുന്നു. അതിനുശേഷം മൂന്നു പേരെ ഭാരത്​ രത്​നക്ക്​​ തിരഞ്ഞെടുത്തത്​ അത്യപൂർവതയാണ്​.

മോദി സർക്കാർ മാസങ്ങൾക്കകം ലോക്​സഭ തെരഞ്ഞെടുപ്പിലേക്ക്​ നീങ്ങാനിരിക്കെയാണ്​ സംഘ്​പരിവാർ ആചാര്യനെയും അനുഭാവിയെയും ഒര​ുപോലെ ആദരിച്ചത്​. ഇതിനൊപ്പം, പഴയ കോൺഗ്രസ്​ നേതാവുകൂടിയായ പ്രണബ്​ മുഖർജിക്ക്​ ഭാരത്​ രത്​ന നൽകി സന്തുലിത പരിഗണനയെന്ന പ്രതിച്ഛായ സൃഷ്​ടിക്കുകയാണ്​. മോദി സർക്കാറി​​​െൻറ പല നിർണായക നടപടികളെയും അദ്ദേഹം പിന്താങ്ങുകയും ചെയ്​തിരുന്നു. നാഗ്​പുർ ആർ.എസ്​.എസ്​ കാര്യാലയത്തിൽ വിജയദശമി സന്ദേശം നൽകാൻ പോയത്​ കോൺഗ്രസിൽനിന്നടക്കം ഏറെ വിമർശനം ഉയർത്തുകയും ചെയ്​തു. മുഖർജി രാഷ്​ട്രപതിയായിരിക്കെ, ആർ.എസ്​.എസ്​ നേതാവ്​ മോഹൻ ഭാഗവത്​ രാഷ്​ട്രപതിഭവനിലെ സന്ദർശകനായിരുന്നു.

ചന്ദികാദാസ്​ അമൃത്​രാജ്​ ദേശ്​മുഖ്​ എന്ന നാനാജി ദേശ്​മുഖിന്​ വിദ്യാഭ്യാസ, ആരോഗ്യ മേഖലകളിലെ മികച്ച പ്രവർത്തനം മുൻനിർത്തി ​നേര​േത്ത പത്മവിഭൂഷൺ നൽകിയിട്ടുണ്ട്​. മറാത്തി ബ്രാഹ്​മണ കുടുംബത്തിൽ ജനിച്ച നാനാജി രാജ്യസഭാംഗവുമായിരുന്നു. 2010 ഫെബ്രുവരിയിൽ അന്തരിച്ചു. സംഘ്​പരിവാറിന്​ ആവേശം നൽകുന്നതിനൊപ്പം, മുന്നാക്ക വിഭാഗങ്ങളെയും മഹാരാഷ​​്ട്രയെയും തെരഞ്ഞെടുപ്പു കാലത്ത്​ സ്വാധീനിക്കുക എന്ന രാഷ്​ട്രീയ ലക്ഷ്യവും ഭാരത്​ രത്​നയിൽ പ്രതിഫലിക്കുന്നു.

2004ലെ തെരഞ്ഞെടുപ്പിൽ ഗുവാഹതി മണ്ഡലത്തിൽനിന്ന്​ ബി.ജെ.പി ടിക്കറ്റിൽ മത്സരിച്ചുതോറ്റ ഭൂപൻ ഹസാരിക, ജനപ്രിയ ഗാനപ്രതിഭയെന്ന നിലയിൽ 2003 വരെയുള്ള അഞ്ചു വർഷം കേന്ദ്ര സംഗീത നാടക അക്കാദമി ചെയർമാനായി പ്രവർത്തിച്ചിട്ടുണ്ട്​. പത്മവിഭൂഷണിനും അർഹനായി. 2011 നവംബറിൽ അന്തരിച്ചു. അസം അടക്കം വടക്കുകിഴക്കൻ സംസ്​ഥാനങ്ങളെ രാഷ്​ട്രീയമായി സന്തോഷിപ്പിക്കുന്ന തീരുമാനമാണ്​ ഭാരത്​ രത്​ന പ്രഖ്യാപനം.