'ഈ​ അക്രമോത്സുകത ഇന്ത്യയിലേക്ക്​ കടന്നു കയറിയ അയൽ രാജ്യത്തോട്​ പോലുമില്ല'രാജ്യസഭയിൽ ആഞ്ഞടിച്ച്​​ പ്രതിപക്ഷം

ന്യൂഡൽഹി: വിവാദ കാർഷിക നിയമങ്ങൾക്കെതിരെ പ്രതിഷേധിക്കുന്ന കർഷകരോടുള്ള കേന്ദ്ര സർക്കാറി​െൻറ മനുഷ്യത്വരഹിതമായ സമീപനങ്ങൾ​െക്കതിരെ രാജ്യസഭയിൽ ​ആഞ്ഞടിച്ച്​ പ്രതിപക്ഷ കക്ഷികൾ. മന്ത്രിമാർ സംഭാഷണത്തിലല്ല, പകരം ഏകഭാഷണത്തിലാണ്​ വിശ്വസിക്കുന്നതെന്ന്​ പ്രതിപക്ഷം കുറ്റപ്പെടുത്തി

ആർ.ജെ.ഡി എം.പി മനോജ്​ കുമാർ ഝാ കടുത്ത ഭാഷയിലാണ്​ സർക്കാറിനെതിരെ ആഞ്ഞടിച്ചത്​. ''കടുത്ത ശൈത്യത്തിലും നിങ്ങൾ കർഷകർക്കുള്ള ജല വിതരണവും ശൗചാലയ സൗകര്യങ്ങളും നിർത്തലാക്കി. കുഴികൾ വെട്ടി, മുള്ളു കമ്പികൾ സ്ഥാപിച്ചു, ആണികൾ തറക്കുകയും ചെയ്​തു. ഇന്ത്യൻ മണ്ണിലേക്ക്​ കടന്നു കയറിയ അയൽ രാജ്യത്തോട്​ പോലും ഇത്തരത്തിൽ അക്രമോത്സുക സമീപനം കേട്ടിട്ടില്ല. കൈ കെട്ടി നിന്നുകൊണ്ട്​ ഞാൻ അപേക്ഷിക്കുകയാണ്​, ദയവായി കർഷകരു​ടെ വേദന മനസ്സിലാക്കൂ... '' -മനോജ്​ കുമാർ ഝാ പറഞ്ഞു.

താൻ അതിർത്തിയിൽ പോയിട്ടില്ല. എന്നാൽ കണ്ട ചിത്രങ്ങളിലൊന്നും കർഷക പ്രക്ഷോഭ സ്ഥലത്ത്​ നടന്ന പോലുള്ള കാര്യങ്ങളില്ല. ഞങ്ങൾ നിങ്ങളെ പിന്തുണക്കും എന്നാൽ മുഴുവൻ ലോകവും നിങ്ങൾക്കെതിരാവുന്നത്​ ദേശവിരുദ്ധമല്ല. ദേശസ്​നേഹം കൈയിൽ ധരിക്കാനുള്ളതല്ലെന്നും പകരം ഹൃദയത്തിൽ സൂക്ഷിക്കാനുള്ളതാണെന്നും അദ്ദേഹം പറഞ്ഞു.

''നിങ്ങൾ ആരോടാണ്​ പോരാടുന്നത്​? അവർ നിങ്ങളുടെ കർഷകരാണ്​. ഇൗ രാജ്യം നിർമിച്ചത് പൊലീസിനെക്കൊണ്ടോ ആയുധംകൊ​ണ്ടോ​ ജനഗണ മനയോ വന്ദേ മാതരമോ കൊണ്ടോ അല്ല. ബന്ധങ്ങൾകൊണ്ടാണ് ഈ രാജ്യം രൂപപ്പെട്ടത്​. ആ ബന്ധങ്ങളെയാണ്​​ നിങ്ങൾ ദുഷിപ്പിച്ചുത്​'' -​മനോജ്​ കുമാർ ഝാ കുറ്റപ്പെടുത്തി.

പ്രതിഷേധങ്ങളും സമരങ്ങളും ജനാധിപത്യത്തി​െൻറ ജീവരക്തമാണ്​. മന്ത്രിമാർ സംഭാഷണത്തിലല്ല, പകരം ഏകഭാഷണത്തിലാണ്​ വിശ്വസിക്കുന്നതെന്നും 11 തവണ കർഷകരുമായി ചർച്ച പൂർത്തീകരിച്ചുവെന്ന സർക്കാർ വാദത്തെ വിമർശിച്ചുകൊണ്ട്​ മനോജ്​ ഝാ ആരോപിച്ചു.

സ്വകാര്യ കോർപറേറ്റുകൾ ശീതീകരണ അറകളും കേന്ദ്രങ്ങളുടെയും ഗോഡൗണുകളുടേയും ശൃംഖല നിർമിച്ചുവെന്ന റിപ്പോർട്ടുകളിലും അദ്ദേഹം കേന്ദ്രത്തിനെതിരെ വിമർശന ശരമെയ്​തു.

''നിങ്ങളുടെ ന​ട്ടെല്ല്​ കർഷകനാണ്​. 303(എൻ.ഡി.എ നേടിയ സീറ്റുകൾ) ശീതീകരണ അറയിൽ നിന്നോ ഗോഡൗണിൽനിന്നോ വരില്ല. ജനങ്ങളിൽ നിന്നേ ലഭിക്കൂ. നിങ്ങൾക്ക്​ കേൾക്കാനുള്ള ക്ഷമ നഷ്​ടപ്പെട്ടിരിക്കുന്നു. നിങ്ങൾ പറഞ്ഞുകൊണ്ടിരിക്കുക മാത്രമാണ്​ ചെയ്യുന്നത്​. പാലങ്ങൾ നിർമിക്കാനാണ്​ സർക്കാറുകൾ രൂപീകൃതമായത്​, എന്നാൽ നിങ്ങൾ മതിലുകളാണ്​ പണിതുയർത്തുന്നത്​'' ഝാ പറഞ്ഞു.

കർഷകർ രാജ്യത്തി​െൻറ ന​ട്ടെല്ലാണെന്ന്​ മുൻ പ്രധാനമന്ത്രിയും ജെ.ഡി(എസ്​) നേതാവുമായ എച്ച്​.ഡി. ദേവഗൗഡ പറഞ്ഞു. റിപ്പബ്ലിക്​ ദിനത്തിൽ നടന്ന സംഭവങ്ങൾക്ക്​ പിന്നിൽ സാമൂഹ്യ വിരുദ്ധരാണ്​. എല്ലാ രാഷ്​ട്രീയ പാർട്ടികളും അവരുടെ നടപടിയെ അപലപിക്കുകയും ശിക്ഷ ലഭിക്കണമെന്ന്​ അംഗീകരിക്കുകയും ചെയ്​തതാണെന്നും കർഷകരുടെ പ്രശ്​നങ്ങളെ ഇതുമായി കൂട്ടിക്കുഴക്കേണ്ടതില്ലെന്നും അദ്ദേഹം പറഞ്ഞു.

മോദി സർക്കാരി​​െൻറ വാഗ്ദാനങ്ങളും നടപ്പാക്കലും തമ്മിലുള്ള അന്തരം വളരെ വലുതാണെന്ന്​ കോൺഗ്രസ്​ നേതാവ്​ ദ്വിഗ്​വിജയ്​ സിങ്​ പറഞ്ഞു. ദരിദ്രരോ കർഷകരോ തൊഴിലാളികളോ ആകട്ടെ ജനങ്ങളുടെ മനസ്സ് കീഴടക്കാൻ സർക്കാറിന്​ സാധിച്ചിട്ടില്ലെന്നും അദ്ദേഹം ആരോപിച്ചു.

പ്രധാനമന്ത്രി നരേന്ദ്രമോദിയിലുള്ള വിശ്വാസം നഷ്​ടപ്പെട്ടിരിക്കുന്നു. ഭാരതീയ കിസാൻ സംഘ്​ പോലും സർക്കാറി​െൻറ ചില നീക്കങ്ങളെ എതിർക്കുന്നു. ആർ‌​.എസ്‌.എസുമായി ബന്ധം നിലനിർത്താൻ ആഗ്രഹിക്കുന്നുണ്ടോ എന്ന് ചോദിച്ച് അദ്ദേഹത്തെ പരിഹസിക്കുകയുമുണ്ടായി.

"ജനാധിപത്യത്തിൽ ജനങ്ങളുടെ വൈകാരികതയെ വിപ്ലവമായി കാണുന്നുവെങ്കിൽ അത് സ്വേച്ഛാധിപത്യമാണ്​. നിങ്ങൾക്ക് ഭൂരിപക്ഷം ലഭിച്ചു, പക്ഷേ വിയോജിക്കുന്നവരാണ്​ ജനാധിപത്യത്തി​െൻറ സത്ത്​" -സിങ്​ പറഞ്ഞു