സമ്പദ് വ്യവസ്ഥയിൽ ഇടപെടാൻ സർക്കാറിന് നിർദേശം നൽകണം; ആർ.ബി.ഐയോട് ചിദംബരം

ന്യൂഡൽഹി: 2020-21 വര്‍ഷത്തില്‍ രാജ്യത്തി​​​െൻറ വളര്‍ച്ചാ നിരക്ക് നെഗറ്റീവായി തുടരുമെന്ന് റിസര്‍വ് ബാങ്ക് ഗവര്‍ണര്‍ ശക്തികാന്ത ദാസ് പറഞ്ഞതിന് പിന്നാലെ പ്രതികരണവുമായി കോണ്‍ഗ്രസ് നേതാവും മുന്‍ ധനമന്ത്രിയുമായ പി. ചിദംബരം. രാജ്യത്തി​​​െൻറ സമ്പദ്​ വ്യവസ്ഥ പരിരക്ഷിക്കുന്നതിനാവശ്യമായ ചുമതല നിര്‍വഹിക്കാനും  ധനപരമായ നടപടികളെടുക്കാനും കേന്ദ്ര സര്‍ക്കാറിനോട് റിസര്‍വ് ബാങ്ക് വ്യക്തമായി നിർദേശിക്കണമെന്ന് അദ്ദേഹം ട്വീറ്റിലൂടെ ആവശ്യപ്പെട്ടു. 

‘ഡിമാന്‍ഡ് തകര്‍ന്നുവെന്നും 2020-21ലെ വളര്‍ച്ചാ നിരക്ക് നെഗറ്റീവിലേക്ക് നീങ്ങിയെന്നും റിസർവ്​ ബാങ്ക്​ ഗവർണർ പറഞ്ഞു. എന്തു കൊണ്ടാണ് അദ്ദേഹം കൂടുതല്‍ പണലഭ്യത ആവശ്യപ്പെടുന്നത്? കടമ നിറവേറ്റണമെന്നും ധനപരമായ നടപടികള്‍ കൈക്കൊള്ളണമെന്നും അദ്ദേഹം സര്‍ക്കാരിനോട് വ്യക്തമായി പറയണം’- ചിദംബരം അഭിപ്രായപ്പെട്ടു. 

കേന്ദ്ര സര്‍ക്കാര്‍ പ്രഖ്യാപിച്ച 20 ലക്ഷം കോടിയുടെ സാമ്പത്തിക പാക്കേജില്‍ പുനര്‍വിചിന്തനം നടത്തേണ്ടതുണ്ട്​. 20 ലക്ഷം കോടിയുടെ ഉത്തേജക പാക്കേജ് നടപ്പു സാമ്പത്തിക വര്‍ഷത്തില്‍ ജി.ഡി.പിയില്‍ കാര്യമായ ചലനം സൃഷ്ടിക്കില്ലെന്നാണ് റിസര്‍വ് ബാങ്കി​​​െൻറ അനുമാനത്തില്‍ നിന്ന്​ വ്യക്തമാകുന്നതെന്നും ചിദംബരം പറഞ്ഞു.

പ്രധാനമന്ത്രി നരേന്ദ്ര മോദിയേയും ധനമന്ത്രി നിര്‍മല സീതാരാമനേയും ട്വീറ്റിൽ അദ്ദേഹം വിമര്‍ശിച്ചു. ജി.ഡി.പിയുടെ 10 ശതമാനമെന്ന് സര്‍ക്കാര്‍ വിശേഷിപ്പിച്ച ഉത്തേജന പാക്കേജ് ഒരു ശതമാനത്തിലും താഴെയാണ്. ആർ.ബി.​െഎ ഗവര്‍ണറുടെ പ്രസ്താവനയ്ക്ക് ശേഷവും പ്രധാനമന്ത്രിക്കും ധനമന്ത്രിക്കും ജി.ഡി.പിയുടെ ഒരു ശതമാനത്തിനും താഴെയുള്ള പാക്കേജ്  സംബന്ധിച്ച് സ്വയം പ്രശംസിക്കാനാകുന്നതെങ്ങനെ? -അദ്ദേഹം ചോദിച്ചു.

ലോക്​ഡൗൺ മൂലം രാജ്യത്തെ സാമ്പത്തിക പ്രവർത്തനങ്ങൾ നിലച്ചുവെന്നും സർക്കാറുകളുടെ വരുമാനം വലിയ രീതിയിൽ ഇടിഞ്ഞുവെന്നും ചരിത്രത്തിലില്ലാത്ത ഇടിവാണ്​ വ്യക്​തികളുടെ ഉപഭോഗത്തിലുണ്ടായതെന്നും ആർ.ബി.ഐ ഗവർണർ വ്യക്​തമാക്കിയിരുന്നു. സമ്പദ്​വ്യവസ്ഥയുടെ നാല്​ മേഖലകളിൽ ശ്രദ്ധ കേന്ദ്രീകരിക്കാനാണ്​ ആർ.ബി.ഐയുടെ ശ്രമം. വിപണി മെച്ചപ്പെടുത്തുക, വ്യാപാരത്തിന്​ പിന്തുണ നൽകുക, ധനപ്രതിസന്ധി കുറക്കാനുള്ള നടപടിയെടുക്കുക, സംസ്ഥാന സർക്കാറുകൾക്ക്​ സാമ്പത്തിക പിന്തുണ നൽകുക എന്നിവയാണ്​ ആർ.ബി.ഐയുടെ ലക്ഷ്യങ്ങൾ.