തിരുവനന്തപുരം: ക്രിസ്ത്യൻ പെൺകുട്ടികൾക്ക് സദാചാരബോധമുണ്ടാക്കുന്നതിനുള്ള ഒറ്റമൂലിയായി കേരള സ്റ്റോറി പ്രദർശിപ്പിക്കാൻ തത്രപ്പെടുന്ന ബിഷപ്പുമാർ ദയവായി വിചാരധാര വായിക്കണമെന്ന് സി.പി.ഐ സംസ്ഥാന സെക്രട്ടറി ബിനോയ് വിശ്വം. ചില ബിഷപ്പുമാർ നസ്രേത്തിൽ നിന്ന് നന്മ പ്രതീക്ഷിക്കുകയാണ്. ‘ഇവർ ചെയ്യുന്നതെന്താണെന്ന് ഇവർ അറിയുന്നില്ല. ഇവരോട് പൊറുക്കണോ വേണ്ടയോ എന്നത് കർത്താവ് തീരുമാനിക്കട്ടെ’ യെന്നും മീറ്റ് ദി പ്രസ് പരിപാടിയിൽ അദ്ദേഹം പറഞ്ഞു.
മുസ്ലിംകളെയും ക്രിസ്ത്യാനികളെയും കമ്യൂണിസ്റ്റുകളെയും ആഭ്യന്തര ശത്രുക്കളായാണ് വിചാരധാര കണക്കാക്കുന്നത്. വിചാരധാരയുടെ അവസാനത്തിലെ അഭിമുഖത്തിൽ ആർ.എസ്.എസ് വിഭാവനം ചെയ്യുന്ന ഹിന്ദുരാഷ്ട്രത്തിൽ ന്യൂനപക്ഷങ്ങളുടെ നില എന്തായിരിക്കുമെന്നൊരു ചോദ്യമുണ്ട്. രാഷ്ട്രത്തിന്‍റെ മതം അംഗീകരിച്ചാൽ അവർക്കിവിടെ പൗരന്മാരായി ജീവിക്കാമെന്നും അല്ലെങ്കിൽ വിദേശികളെപ്പോലെ വേണമെങ്കിൽ കഴിഞ്ഞുകൂടാമെന്നുമാണ് ഗോൾവാൾക്കറുടെ മറുപടി.
രാഷ്ട്രത്തിന് മതം എന്നൊന്ന് ഇന്ത്യക്കില്ല. അങ്ങനെയൊന്നുണ്ടായാൽ രാജ്യം തകരുമെന്നും ബിനോയ് പറഞ്ഞു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.