എണ്ണക്ക്​ ആദായവിൽപന; ബോർഡ്​ വെച്ച്​ അതിർത്തിയിലെ പമ്പുകൾ

മംഗളൂരു: കേന്ദ്രത്തിനു പിന്നാലെ കർണാടക സർക്കാറും നികുതി കുറച്ചതോടെ കാസർകോടുനിന്ന് ദക്ഷിണ കന്നട ജില്ലയിലേക്ക് എണ്ണയടിക്കാൻ എത്തുന്നത് നിരവധിപേർ. തലപ്പാടി എത്തുന്നതിനു മുമ്പുള്ള കർണാടകയിൽ സ്ഥിതിചെയ്യുന്ന പമ്പിൽ ഡീസലിന് എട്ടും പെട്രോളിന് ആറും രൂപ കുറവാണെന്ന് കാണിച്ച്​ വലിയ ഫ്ലക്സ് ബോർഡുകളും സ്ഥാപിച്ചിട്ടുണ്ട്. കേരളത്തിൽനിന്ന് ദിനേന ആയിരക്കണക്കിനാളുകളാണ് ഇവിടെ എത്തുന്നത്. സ്വകാര്യ ബസുകൾ, ലോറികൾ, സ്കൂൾ ബസുകൾ, ടാക്സികൾ, ഓട്ടോറിക്ഷ തുടങ്ങി പല വാഹനങ്ങളും ഇന്ധനം നിറക്കാനായി തലപ്പാടിയിലെ ഈ പമ്പിൽ എത്തുന്നുണ്ട്. വരുന്ന അധികം പേരും വാഹനത്തിൽ ഫുൾ ടാങ്ക് നിറച്ചും കാനുകളിലും ഇന്ധനം കൊണ്ടുപോകുന്നുണ്ടെന്നാണ് പമ്പിലെ ജീവനക്കാർ പറയുന്നത്. ദക്ഷിണ കന്നട ജില്ലയെയും കാസർകോടിനെയും ബന്ധിപ്പിക്കുന്ന എൻ.എച്ച്​ 66നു സമീപമുള്ള പല പമ്പുകളിലും വലിയ ഫ്ലക്സ് ബോർഡുകൾ സ്ഥാപിച്ചിട്ടുണ്ട്.