25ാമത് കേരള സ്റ്റേറ്റ് സബ് ജൂനിയര്‍ ഫെന്‍സിങ് ചാമ്പ്യന്‍ഷിപ്പില്‍ മൂന്നാംസ്ഥാനം നേടിയ ജില്ല സ്‌പോര്‍ട്‌സ് അക്കാദമി
കാസർകോട്: ഫെന്‍സിങ്ങില്‍ പുതിയ പ്രതീക്ഷകളുമായി മുന്നേറുകയാണ് കാസര്‍കോട്ടെ താരങ്ങള്‍. തിരുവനന്തപുരം പെരിങ്ങമല ഇന്‍ഡോര്‍ സ്റ്റേഡിയത്തില്‍ ഫെബ്രുവരി 17, 18 തീയതികളില്‍ നടന്ന 25ാമത് കേരള സ്റ്റേറ്റ് സബ് ജൂനിയര്‍ ഫെന്‍സിങ് ചാമ്പ്യന്‍ഷിപ്പില്‍ കാസര്‍കോട് മൂന്നാം സ്ഥാനം കരസ്ഥമാക്കി. റെയ്ഫനാത് അമാന, അനെയ്ത നമ്പ്യാര്‍, മുഹമ്മദ് റൈഹാന്‍ എന്നീ ഫെന്‍സിങ് താരങ്ങള്‍ 2024 മാര്‍ച്ച് 25 മുതല്‍ 28 വരെ ആന്ധ്രപ്രദേശില്‍ നടക്കുന്ന ദേശീയ മത്സരങ്ങളില്‍ പങ്കെടുക്കാന്‍ യോഗ്യത നേടി. എപ്പേ പെണ്‍കുട്ടികളുടെ ഗ്രൂപ് ഇനത്തില്‍ റെയ്ഫനാത് അമാന, അനെയ്ത നമ്പ്യാര്‍, ഡി. അനുഷ്‌ക തുടങ്ങിയവര്‍ സ്വര്‍ണമെഡല്‍ നേടിയപ്പോള്‍ വ്യക്തിഗത ഇനത്തില്‍ റെയ്ഫനാത് അമാന വെള്ളി മെഡലും അനെയ്ത നമ്പ്യാര്‍ വെങ്കലമെഡലും കരസ്ഥമാക്കി.
മുഹമ്മദ് റൈഹാന്‍, സുജയ് കൃഷ്ണ, ടി.എം. മുഹമ്മദ് ഹനാന്‍ എന്നിവരടങ്ങുന്ന ആണ്‍കുട്ടികളുടെ ഫെന്‍സിങ് സാബര്‍ ഗ്രൂപ്പിനത്തില്‍ വെങ്കല മെഡലും കുട്ടികളുടെ ഫെന്‍സിങ് ഫോയില്‍ ഗ്രൂപ്പിനത്തില്‍ തന്‍വീര്‍ അലി, മുഹമ്മദ് സുല്‍ത്താന്‍, മുഹമ്മദ് ഷുജ തുടങ്ങിയവര്‍ വെങ്കല മെഡലുകളും കരസ്ഥമാക്കിയാണ് കാസര്‍കോട് ജില്ല സബ് ജൂനിയര്‍ വിഭാഗത്തില്‍ സംസ്ഥാന തലത്തില്‍ മൂന്നാം സ്ഥാനത്തെത്തിയത്.
കേരള സ്റ്റേറ്റ് സ്‌പോര്‍ട്‌സ് കൗൺസിലിന്റെ കീഴില്‍ ഖേലോ ഇന്ത്യ ഡേ ബോര്‍ഡിങ് സ്‌കീം പ്രകാരം 2022ല്‍ ആണ് ജില്ല സ്‌പോര്‍ട്‌സ് അക്കാദമി കേന്ദ്രമായി ഫെന്‍സിങ് ട്രെയിനിങ് ആരംഭിച്ചത്. പി.ടി.എം.എ.യു.പി സ്‌കൂള്‍ ബെദിര, ടി.ഐ.എച്ച്.എസ്.എസ്.നായന്മാര്‍മൂല, ചിന്മയ വിദ്യാലയ വിദ്യാനഗര്‍, കേന്ദ്രീയ വിദ്യാലയം നമ്പര്‍ ടു വിദ്യാനഗര്‍ എന്നിവിടങ്ങളില്‍ നിന്നും തിരഞ്ഞെടുക്കപ്പെട്ട മുപ്പതോളം വിദ്യാര്‍ഥികള്‍ക്കാണ് രാവിലെയും വൈകീട്ടുമായി ഉദയഗിരിയിലുള്ള ജില്ല സ്‌പോര്‍ട്‌സ് അക്കാദമിയില്‍ പരിശീലനം നല്‍കിവരുന്നത്. ഡോണ മരിയ ടോം ആണ് ഫെന്‍സിങ് പരിശീലക. കാസര്‍കോടിന്റെ നേട്ടത്തില്‍ ജില്ല സ്‌പോര്‍ട്‌സ് കൗണ്‍സില്‍ പ്രസിഡന്റ്, സെക്രട്ടറി എന്നിവര്‍ കായിക താരങ്ങളെ അഭിനന്ദിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.