മലപ്പുറം: കേരള മുസ്ലിം ജമാഅത്ത് സംസ്ഥാന കമ്മിറ്റിയുടെ നേതൃത്വത്തിൽ വെള്ളിയാഴ്ച മലപ്പുറത്ത് ആദർശ സമ്മേളനം സംഘടിപ്പിക്കുമെന്ന് ഭാരവാഹികൾ വാർത്തസമ്മേളനത്തിൽ അറിയിച്ചു. മലപ്പുറം വലിയങ്ങാടിയിൽ വൈകീട്ട് 4.30ന് കേരള മുസ്ലിം ജമാഅത്ത് ജനറല്‍ സെക്രട്ടറി ഇബ്റാഹീമുല്‍ ഖലീലുല്‍ ബുഖാരി തങ്ങൾ ഉദ്ഘാടനം ചെയ്യും. സമസ്ത (കാന്തപുരം വിഭാഗം) പ്രസിഡന്‍റ് ഇ. സുലൈമാന്‍ മുസ്ലിയാര്‍ അധ്യക്ഷത വഹിക്കും. പൊന്മള അബ്ദുല്‍ ഖാദിര്‍ മുസ്ലിയാര്‍, പേരോട് അബ്ദുറഹ്മാന്‍ സഖാഫി, ഡോ. അബ്ദുല്‍ ഹകീം അസ്ഹരി തുടങ്ങിയവർ സംസാരിക്കും.
സമസ്ത കേരള ജംഇയ്യത്തുല്‍ ഉലമയുടെ നേതൃത്വത്തില്‍ നടന്നുവരുന്ന ആദര്‍ശപ്രചാരണത്തിന്‍റെ തുടര്‍ച്ചയായാണ് സമ്മേളനമെന്ന് ഭാരവാഹികൾ പറഞ്ഞു. അതേസമയം, കോഴിക്കോട് സമാപിച്ച മുജാഹിദ് സംസ്ഥാന സമ്മേളനത്തിൽ ഉന്നയിച്ച ചില വിഷയങ്ങൾക്കുള്ള വിശദീകരണവും സമ്മേളനത്തിലുണ്ടാകും. മുജാഹിദ് സമ്മേളനത്തിനുള്ള മറുപടിയായി പരിപാടിയെ കാണാമെന്നും മാധ്യമ പ്രവർത്തകരുടെ ചോദ്യത്തിന് മറുപടിയായി അവർ പറഞ്ഞു.
മുസ്ലിം ജമാഅത്തിന് രാഷ്ട്രീയ നിലപാടുകൾ ഉണ്ടെന്നും മതസംഘടനയുടെ പരിധിയിൽ നിന്നുകൊണ്ടാണ് രാഷ്ട്രീയ നിലപാടുകൾ എടുക്കുകയെന്നും അവർ പറഞ്ഞു. വാർത്തസമ്മേളനത്തിൽ കേരള മുസ്ലിം ജമാഅത്ത് സംസ്ഥാന സെക്രട്ടറി വണ്ടൂര്‍ അബ്ദുറഹ്മാന്‍ ഫൈസി, പൊന്മള മൊയ്തീന്‍കുട്ടി ബാഖവി, സി.പി. സെയ്തലവി മാസ്റ്റര്‍, കൂറ്റമ്പാറ അബ്ദുറഹ്മാന്‍ ദാരിമി, പി.എം. മുസ്തഫ കോഡൂര്‍ എന്നിവർ സംബന്ധിച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.