വാർത്താവിനിമയ ബന്ധം നിലച്ചു; മാങ്കുളത്ത് വൈദ്യുതി ഇല്ലാതായിട്ട് അഞ്ചുദിവസം

അ​ടി​മാ​ലി: അ​വി​ക​സി​ത ഗ്രാ​മ​പ​ഞ്ചാ​യ​ത്താ​യ മാ​ങ്കു​ള​ത്ത് വൈ​ദ്യു​തി മു​ട​ങ്ങി​യി​ട്ട് അ​ഞ്ചു ദി​വ​സം. വൈ​ദ്യു​തി മു​ട​ങ്ങു​ക​യും ഇ​ന്ധ​നം തീ​രു​ക​യും ചെ​യ്ത​തോ​ടെ വാ​ർ​ത്ത വി​നി​മ​യ ബ​ന്ധം അ​വ​താ​ള​ത്തി​ലാ​യി. ബി.​എ​സ്.​എ​ൻ.​എ​ൽ, ജി​യോ, വി.​ഐ തു​ട​ങ്ങി എ​ല്ലാ നെ​റ്റു​വ​ർ​ക്കും നി​ല​ച്ചു. വൈ​ദ്യു​തി ഇ​ല്ലാ​ത്ത​തി​നാ​ൽ ഹോ​ട്ട​ൽ ഉ​ൾ​പ്പെ​ടെ വ്യാ​പാ​ര സ്ഥാ​പ​ന​ങ്ങ​ളും തു​റ​ക്കു​ന്നി​ല്ല. ജ​ന​റേ​റ്റ​ർ വാ​ട​ക​ക്കെ​ടു​ത്ത് വ്യാ​പാ​ര സ്ഥാ​പ​ന​ങ്ങ​ൾ തു​റ​ക്കു​ന്ന​വ​ർ ഉ​ണ്ടെ​ങ്കി​ലും ആ​വ​ശ്യ​ക്കാ​ർ​ക്കെ​ല്ലാം ഇ​വ കി​ട്ടാ​ത്ത സാ​ഹ​ച​ര്യ​മാ​ണ്.

വൈ​ദ്യു​തി​യും ഇ​ന്‍റ​ർ​നെ​റ്റും ഇ​ല്ലാ​ത്ത​തി​നാ​ൽ അ​ക്ഷ​യ കേ​ന്ദ്രം അ​ട​ക്കം സേ​വ​ന​ങ്ങ​ളും നി​ല​ച്ചു. വൈ​ദ്യു​തി നി​ല​ച്ച​തോ​ടെ വി​വി​ധ സ​ർ​ക്കാ​ർ ഓ​ഫി​സു​ക​ളു​ടെ പ്ര​വ​ർ​ത്ത​ന​വും പ്ര​തി​സ​ന്ധി​യി​ലാ​യി. കാ​ല​വ​ർ​ഷം രൂ​ക്ഷ​മാ​യ​തും മ​ര​ങ്ങ​ൾ വ്യാ​പ​ക​മാ​യി ലൈ​നു​ക​ളി​ലേ​ക്ക് പ​തി​ച്ച​തു​മാ​ണ് വൈ​ദ്യു​തി മു​ട​ങ്ങാ​ൻ കാ​ര​ണം.

ചി​ത്തി​ര​പു​രം ഇ​ല​ക്​​ട്രി​ക്ക​ൽ മേ​ജ​ർ സെ​ക്ഷ​ന്‍റെ കീ​ഴി​ൽ വ​രു​ന്ന പ്ര​ദേ​ശ​ത്ത് വൈ​ദ്യു​തി പു​നഃ​സ്ഥാ​പി​ക്കാ​ൻ ജീ​വ​ന​ക്കാ​ർ ഇ​ല്ലാ​ത്ത​താ​ണ് പ്ര​ശ്നം. ക​ല്ലാ​ർ മു​ത​ൽ വി​രി​പാ​റ​വ​രെ വ​ൻ​മ​ര​ങ്ങ​ൾ ധാ​രാ​ളം നി​ൽ​ക്കു​ന്ന ഏ​ല​ക്കാ​ട്ടി​ലൂ​ടെ​യാ​ണ് മാ​ങ്കു​ള​ത്ത് വൈ​ദ്യു​തി എ​ത്തി​ക്കു​ന്ന​ത്.

ഈ ​ഭാ​ഗ​ത്ത് മ​ണ്ണി​ന​ടി​യി​ലൂ​ടെ കേ​ബി​ൾ സ്ഥാ​പി​ച്ച്​ പ്ര​ശ്നം പ​രി​ഹ​രി​ക്കാ​മെ​ങ്കി​ലും ന​ട​പ​ടി​യി​ല്ല. സ്വ​ന്ത​മാ​യി വൈ​ദ്യു​തി ഉ​ൽ​പാ​ദി​പ്പി​ച്ച് ച​രി​ത്ര​ത്തി​ന്‍റെ ഭാ​ഗ​മാ​യ പ​ഞ്ചാ​യ​ത്താ​ണ് മാ​ങ്കു​ളം. ഈ ​പ​ദ്ധ​തി​യി​ൽ ഉ​ൽ​പാ​ദി​പ്പി​ക്കു​ന്ന വൈ​ദ്യു​തി മു​മ്പ്​ കെ.​എ​സ്.​ഇ.​ബി വാ​ങ്ങി​യി​രു​ന്നു. 2018ലെ ​പ്ര​ള​യ​ത്തി​ൽ മ​ണ്ണും വെ​ള്ള​വും ക​യ​റി പ​ഞ്ചാ​യ​ത്തി​ന്‍റെ വൈ​ദ്യു​തി നി​ല​യം ത​ക​ർ​ന്നു. പി​ന്നീ​ട് ഇ​ത്​ ന​ന്നാ​ക്കി​യി​ല്ല. ഇ​തോ​ടെ വ​ലി​യ വ​രു​മാ​ന ന​ഷ്ട​മാ​ണ് പ​ഞ്ചാ​യ​ത്തി​ന് ഉ​ണ്ടാ​യ​ത്.